'നരേന്ദ്ര മോദിയുടെ ഇന്ത്യക്ക് ആരുടെ മുന്നിലും കൈനീട്ടേണ്ടതില്ല'; സുരേന്ദ്രൻെറ പ്രളയകാലത്തെ പോസ്​റ്റ്​ 'കുത്തിപ്പൊക്കി' സമൂഹമാധ്യമങ്ങൾ

കോഴിക്കോട്​: കോവിഡ്​ രണ്ടാ തരംഗം രാജ്യത്ത്​ രൂക്ഷമായ സാഹചര്യത്തിൽ കേന്ദ്രസർക്കാർ വ്യാപകമായി വിദേശ സഹായം സ്വീകരിക്കാൻ തീരുമാനിച്ചതിന്​ പിന്നാലെ ​ബി.ജെ.പി സംസ്ഥാന അധ്യക്ഷൻ കെ.സുരേന്ദ്രന്‍റെയും ബി.ജെ.പിയുടെയും പഴയ നിലപാട്​ ചർച്ചയാകുന്നു. 2018ൽ കേരളത്തിൽ മഹാപ്രളയമുണ്ടായതിനുപിന്നാലെ യു.എ.ഇ അടക്കമുള്ള ഗൾഫ്​ രാജ്യങ്ങൾ കേരളത്തിന്​ വൻതുക വാഗ്​ദാനം ചെയ്​തിരുന്നു. എന്നാൽ ഇന്ത്യക്ക്​ വിദേശസഹായം ആവശ്യമില്ലെന്ന നിലപാടായിരുന്നു കേന്ദ്രസർക്കാർ സ്വീകരിച്ചിരുന്നത്​.

​ബി.ജെ.പി സംസ്ഥാന അധ്യക്ഷൻ കെ.സുരേന്ദ്രൻ പ്രസ്​തുത സമയത്ത്​ കുറിച്ച ഫേസ്​ബുക്ക്​ പോസ്​റ്റ്​ സമൂഹമാധ്യമങ്ങളിൽ വീണ്ടും ചർച്ചയാകുകയാണ്​. ഇന്ദിരാഗാന്ധിയുടെ കാലത്ത് അമേരിക്ക കടലിൽ തള്ളാൻ വെച്ച ഗോതമ്പ് നാം നമ്മുടെ കുട്ടികൾക്ക് കൊടുത്തിട്ടുണ്ട്. അന്നത്​ ആവശ്യമായിരുന്നു. പക്ഷേ ആ ഇന്ത്യയല്ല ഇന്നത്തെ ഇന്ത്യയെന്നും കേരളം പുനർനിർമിക്കാൻ ഇന്ത്യക്ക്​ ആരുടെയും മുന്നിൽ കൈ​നീ​ട്ടേണ്ടതില്ല എന്നുമാണ്​ കെ.സുരേന്ദ്രൻ കുറിച്ചിരുന്നത്​.

എന്നാൽ ഇന്ത്യയിൽ ഓക്​സിജൻ ക്ഷാമം രൂക്ഷമായതിനെത്തുടർന്ന്​ ജർമനി, യു.എസ്​.എ, സൗദി അറേബ്യ, കുവൈത്ത്​, ഖത്തർ​ അടക്കമുള്ള രാജ്യങ്ങൾ ഇന്ത്യയിലേക്ക്​ സഹായം എത്തിച്ചിരുന്നു. ഫ്രാൻസ്​, പാകിസ്​താൻ അടക്കമുള്ള രാജ്യങ്ങളും ഇന്ത്യക്ക്​ സഹായം വാഗ്ദാനം ചെയ്​തിട്ടുണ്ട്​. ആസ്​ട്രേലിയൻ ക്രിക്കറ്റ്​ താരങ്ങളായ പാറ്റ്​ കമ്മിൻസ്​, ബ്രറ്റ്​ ലീ അടക്കമുള്ളവരും ഇന്ത്യക്കായി സഹായം നൽകുകയും പാകിസ്​താൻ താരങ്ങൾ ഇന്ത്യയെ സഹായിക്കാൻ ആഹ്വാനം ചെയ്യുകയും ചെയ്​തിരുന്നു​. നേരത്തേ പ്രധാനമന്ത്രിയുടെ പി.എം കെയർ ഫണ്ടിലേക്ക്​ വിദേശ പണം സ്വീകരിക്കാനും കേന്ദ്രസർക്കാർ തീരുമാനിച്ചിരുന്നു.