അന്തരീക്ഷം നേരെയായാൽ നിരോധനാജ്ഞ പിൻവലിക്കും-മന്ത്രി

തിര​ുവനന്തപുരം: ശബരിമലയിൽ അന്തരീക്ഷം നേരെയായാൽ നിലവിലെ നിരോധനാജ്ഞയും നിയന്ത്രണങ്ങളും പിൻവലിക്കുമെന്ന്​ മന്ത്രി കടകംപള്ളി സ​ുരേന്ദ്രൻ വാർത്തസമ്മേളനത്തിൽ പറഞ്ഞു. മാസ്​റ്റർ പ്ലാൻ പ്രകാരമുള്ള പദ്ധതികളായിരിക്കും നടപ്പാക്കുക. പമ്പക്ക്​ പകരം നിലക്കൽ അടിസ്ഥാന ക്യാമ്പായി മാറ്റിയിട്ടുണ്ട്​. പമ്പയിലെ ​ശൗചാലയങ്ങൾ അടക്കമുള്ള മുഴുവൻ സൗകര്യങ്ങളും പ്രളയത്തിൽ തകർന്നു. അവിടെ പകരം ടോയ്​ലറ്റുകൾ ഏർപ്പെടുത്തിയിട്ടുണ്ട്​. പമ്പ മുതൽ സന്നിധാനം വരെ കോൺക്രീറ്റ്​ കെട്ടിടങ്ങൾ വേണ്ടതില്ലെന്നാണ്​ തീ​രുമാനം.

അവിടെ തകർന്ന കെട്ടിടങ്ങൾക്ക്​ വേണ്ടത്ര അടിസ്ഥാനമുണ്ടായിരുന്നില്ല. ആർക്കാണ് ​നിർമാണ ഉത്തരവാദിത്തമെന്നും ഏത്​ കാലത്താണ്​ നിർമിച്ചതെന്നും അന്വേഷിക്കേണ്ടതാണ്​. രണ്ടടി മാത്രമായിന്നു രാമമൂർത്തി മണ്ഡപത്തിൻറ ഫൗണ്ടേഷനെന്നും അ​േദ്ദഹം പറഞ്ഞു. പമ്പയിൽ അടിഞ്ഞുകൂടിയിരിക്കുന്ന മണൽ നീക്കാത്തത്​ പ്രശ്​നങ്ങൾ സൃഷ്​ടിക്കുന്നുണ്ട്​. ഇത്​ മാറ്റണമെന്നാവശ്യപ്പെട്ട്​ സുപ്രീംകോടതിയെ സമീപിക്കും. വനംവകുപ്പാണ്​ മാ​റ്റേണ്ടത്​. നില​ക്കലിൽ 20,000 വാഹനങ്ങൾ പാർക്ക്​ ചെയ്യാൻ സൗകര്യമൊരുക്കി. 9000 പേർക്ക്​ ഒരേസമയം വിരിവെക്കാൻ സൗകര്യമൊരുക്കി. കുടിവെള്ളവും ​ശൗചാലയങ്ങളും ഏർപ്പെടുത്തിയെന്നും അദ്ദേഹം പറഞ്ഞു.