കളർകോട്​ വാഹനാപകടം: സമയക്രമം പാലിച്ചില്ല, ഹോസ്റ്റൽ ജീവനക്കാരും ഉത്തരവാദികളെന്ന്​​ ആൽവിന്‍റെ അമ്മ

ആലപ്പുഴ: കളർകോട്​ വാഹനാപകടത്തിൽ മെഡിക്കൽ വിദ്യാർഥികൾ മരിച്ച സംഭവത്തിൽ ഹോസ്റ്റൽ ജീവനക്കാരും ഉത്തരവാദിയെന്ന്​ മരിച്ച എടത്വ പള്ളിച്ചിറയിൽ ആൽവിൻ ജോർജിന്‍റെ അമ്മ​. ഹോസ്റ്റൽ ജീവനക്കാരുടെ അനാസ്ഥയാണ് എല്ലാത്തിനും ഇടയാക്കിയതെന്ന് ആൽവിന്‍റെ അമ്മ മീന കൊച്ചുമോൻ വാർത്ത ചാനലിന് പ്രതികരിച്ചു.

ഹോസ്റ്റലിൽ നിന്ന്​ വിദ്യാർഥികൾ രാത്രി ഒമ്പത്​ മണിയോടെയാണ്​ പുറത്തുപോയത്​. 7.30ന്​ മുമ്പ്​ എല്ലാവരും ഹോസ്റ്റലിൽ കയറണം എന്നാണ്​ നിബന്ധന. ഒമ്പതിന്​ ശേഷം അവരെ പുറത്തേക്ക്​ വിടുക, അവർ കാർ വാടകക്കെടുത്ത്​ പോകുക ഇതിനെല്ലാം ഇടയാക്കിയത്​ ഹോസ്റ്റൽ ജീവനക്കാരുടെ അനാസ്ഥയാണ് -മീന കൊച്ചുമോൻ വാർത്ത ചാനലിനോട്​ പറഞ്ഞു.

എപ്പോൾ വേണമെങ്കിലും വരാനും പോകാനും കഴിയുന്ന വിധത്തിലാണോ ഹോസ്റ്റൽ നടത്തുന്നത്​. താൻ ഒപ്പിട്ട്​ നൽകിയ രേഖയിൽ​ 7.30ന്​ എല്ലാവരും ഹോസ്റ്റലിൽ കയറണം എന്നാണെന്നും മീന പറഞ്ഞു.

അപകടത്തിൽ പരിക്കേറ്റ്​ ചികിത്സയിലിരിക്കെ കഴിഞ്ഞ വ്യാഴാഴ്ചയാണ്​ ആൽവിൻ മരിച്ചത്​. അപകടത്തിൽ വണ്ടാനം മെഡിക്കൽ കോളജിലെ ആറ്​ മെഡിക്കൽ വിദ്യാർഥികളാണ്​ മരിച്ചത്​.