കൽപറ്റ നഗരസഭ: എൽ.ഡി.എഫ് അവിശ്വാസം പാസായി; യു.ഡി.എഫിന് ഭരണനഷ്ടം

കൽപറ്റ: യു.ഡി.എഫ്​ ഭരണസമിതിക്കെതിരെ കൽപറ്റ നഗരസഭയിൽ എൽ.ഡി.എഫ് കൊണ്ടുവന്ന അവിശ്വാസ പ്രമേയം പാസായി. യു.ഡി.എഫ്​ ബാന്ധവം അവസാനിപ്പിച്ച്​ ജനതാദൾ^യു ഇടതുപാളയത്തിലേക്ക്​ ചേക്കേറിയതിനെ തുടർന്നാണ്​ കൽപറ്റയിൽ ഭരണമാറ്റത്തിന്​ കളമൊരുങ്ങിയത്​. ദളി​​​െൻറ മുന്നണി മാറ്റത്തോടെ​ സംസ്​ഥാനത്ത്​ ഇതാദ്യമായാണ്​ യു.ഡി.എഫിന്​ ഭരണത്തിൽനിന്ന്​ പടിയിറങ്ങേണ്ടിവന്നത്​. 

നഗരസഭാ ചെയർപേഴ്സൻ മുസ്​ലിം ലീഗിലെ ഉമൈബ മൊയ്തീൻകുട്ടിക്കെതിരായ അവിശ്വാസ പ്രമേയം 13നെതിരെ 15 വോട്ടുകൾക്കാണ് പാസായത്. ജനതാദൾ-യു അംഗങ്ങളായ ഡി. രാജനും ബിന്ദു ജോസിനും പുറമെ കോൺഗ്രസ് വിമതനായി മത്സരിച്ച് ജയിച്ച സ്വതന്ത്രൻ ആർ. രാധാകൃഷ്ണനും എൽ.ഡി.എഫിന് അനുകൂലമായി വോട്ടു ചെയ്തു. വൈസ്​ ചെയർമാൻ കോൺഗ്രസിലെ പി.പി. ആലിക്കെതിരായ അവിശ്വാസവും 13^15 എന്ന നിലയിൽ പാസായി. 

28 അംഗ കൗൺസിലിൽ 15 പേരുടെ പിന്തുണയുമായാണ്​ യു.ഡി.എഫ്​ നേരത്തേ, അധികാരത്തിലെത്തിയത്​. കോൺഗ്രസിന്​ എട്ടും ലീഗിന്​ അഞ്ചും കൗൺസിലർമാരാണുള്ളത്​. സി.പി.എമ്മി​​​െൻറ പത്തും സി.പി.​െഎയുടെ രണ്ടും അടക്കം ഇടതുപക്ഷത്തിന്​ 12 കൗൺസിലർമാരാണ്​ ഉണ്ടായിരുന്നത്​. രണ്ടു ജെ.ഡി.യു അംഗങ്ങളും കോൺഗ്രസ്​ വിമതനും ചേർന്നതോടെ എൽ.ഡി.എഫിനിപ്പോൾ 15 പേരുടെ പിന്തുണയായി.

ചെയർപേഴ്​സൻ സ്​ഥാനം വനിത സംവരണമായ കൽപറ്റയിൽ വൈസ്​ ചെയർമാൻ സ്​ഥാനം ആർ. രാധാകൃഷ്​ണന്​ എൽ.ഡി.എഫ്​ വാഗ്​ദാനം ചെയ്​തിട്ടുണ്ട്​. യു.ഡി.എഫിലെ ധാരണ പ്രകാരം ആദ്യ ഒരുവർഷം മുനിസിപ്പൽ ചെയർപേഴ്​സനായത്​ ജെ.ഡി.യുവിലെ ബിന്ദു ജോസായിരുന്നു. ലീഗി​​​െൻറ രണ്ടുവർഷം കഴിഞ്ഞ്​ അവസാന രണ്ടു വർഷം കോൺഗ്രസിന്​ ചെയർപേഴ്​സൻ സ്​ഥാനം നൽകാനായിരുന്നു മുന്നണിയിലെ ധാരണ. എന്നാൽ, അവിശ്വാസം പാസായതോടെ സി.പി.എം പ്രതിനിധി ചെയർപേഴ്​സനാവും. കൽപറ്റ നഗരസഭയിൽ ഭരണത്തിലെത്തിയതോടെ ജില്ലയിലെ മൂന്ന് നഗരസഭകളിലും ഇടതു ഭരണമായി.

എം.പി. വീരേന്ദ്രകുമാറി​​​െൻറ വിപ്പ് അനുസരിച്ച്​ ഇടതുപക്ഷത്തെ പിന്തുണച്ച ജനതാദൾ അംഗങ്ങൾ ജെ.ഡി.യു നിതീഷ്കുമാർ വിഭാഗം സംസ്ഥാന പ്രസിഡൻറ്​ എ.എസ്. രാധാകൃഷ്ണൻ നൽകിയ വിപ്പ് ഗൗനിച്ചില്ല. ദേശീയതലത്തിൽ ജനതാദൾ^യു നേതൃത്വവുമായി തെറ്റിപ്പിരിഞ്ഞ്​ നിൽക്കുന്ന വീരേന്ദ്രകുമാർ വിഭാഗത്തിന്​ പാർട്ടി ചിഹ്നത്തിൽ മത്സരിച്ചു ജയിച്ച കൗൺസിലർമാർക്ക്​ വിപ്പു നൽകാൻ അവകാശമില്ലെന്നും വിപ്പ് ലംഘിച്ചവർക്കെതിരെ തെരഞ്ഞെടുപ്പു കമീഷനെ സമീപിക്കുമെന്നും നിതീഷ്കുമാർ വിഭാഗം അറിയിച്ചു.