മൂന്നാമൂഴത്തിന് ​കരുത്തുകൂട്ടി​ കാനം; ജി​ല്ല​ക​ളി​ൽ സ്വാ​ധീ​നം ഉ​റ​പ്പി​ച്ച കാ​നം വീ​ണ്ടും സംസ്ഥാന സെ​ക്ര​ട്ട​റി​ പദത്തിലേക്ക്

തി​രു​വ​ന​ന്ത​പു​രം: സം​സ്ഥാ​ന സ​മ്മേ​ള​ന​ത്തി​ന് ര​ണ്ടാ​ഴ്ച​മാ​ത്രം ശേ​ഷി​ക്കെ വീ​ണ്ടും സി.​പി.​ഐ സം​സ്ഥാ​ന സെ​ക്ര​ട്ട​റി​യാ​കാ​നു​ള്ള ക​രു​ത്താ​ർ​ജി​ച്ച്​ കാ​നം രാ​ജേ​​ന്ദ്ര​ൻ. ക​ഴി​ഞ്ഞ മ​ല​പ്പു​റം സ​മ്മേ​ള​ന​ത്തി​ന്​ മു​മ്പ്​ എ​തി​ർ​ചേ​രി ഉ​യ​ർ​ത്തി​യ വെ​ല്ലു​വി​ളി​ക​ളെ അ​തി​ജീ​വി​ച്ച​തി​ന്​ സ​മാ​ന​മാ​ണ്​ ഇ​​ക്കു​റി​യും നീ​ക്ക​ങ്ങ​ൾ.

ഭൂ​രി​പ​ക്ഷം ജി​ല്ല​ക​ളി​ലും സ്വാ​ധീ​നം ഉ​റ​പ്പി​ച്ച കാ​നം വീ​ണ്ടും സെ​ക്ര​ട്ട​റി​യാ​യി എ​ത്തു​മെ​ന്നാ​ണ്​ പാ​ർ​ട്ടി വൃ​ത്ത​ങ്ങ​ളും പ​റ​യു​ന്ന​ത്. പാ​ർ​ട്ടി​ക്ക് സ്വീ​കാ​ര്യ​മെ​ങ്കി​ൽ അ​ടു​ത്ത​ത​വ​ണ​യും സെ​ക്ര​ട്ട​റി സ്ഥാ​ന​ത്തു​ണ്ടാ​കു​മെ​ന്ന്​ കാ​നം രാ​ജേ​ന്ദ്ര​നും വ്യ​ക്ത​മാ​ക്കി​ക്ക​ഴി​ഞ്ഞു. 'താ​ൻ സെ​ക്ര​ട്ട​റി​യാ​യി തു​ട​രു​ന്ന​ത് ദ​ഹി​ക്കാ​ത്ത​വ​ർ​ക്കു​ള്ള മ​രു​ന്ന് ന​ൽ​കാ​ന​റി​യാം'​എ​ന്ന കാ​ന​ത്തി​​ന്‍റെ വാ​ക്കു​ക​ൾ ശ​രി​വെ​ക്കു​ന്ന​നി​ല​യി​ലാ​ണ്​ കാ​ര്യ​ങ്ങ​ൾ. കെ.​ഇ. ഇ​സ്മ​യി​ൽ പ​ക്ഷ​ത്തി​ന്‍റെ സെ​ക്ര​ട്ട​റി സ്ഥാ​നാ​ർ​ഥി​യാ​യേ​ക്കു​മെ​ന്ന്​ പ്ര​ചാ​ര​ണ​മു​ള്ള അ​സി. സെ​ക്ര​ട്ട​റി കെ. ​പ്ര​കാ​ശ്​ ബാ​ബു​വും ചേ​രി​മാ​റി​യെ​ന്ന​നി​ല​യി​ലാ​ണ്​ ഒ​ടു​വി​ലെ വി​വ​ര​ങ്ങ​ൾ.

എ​ന്നാ​ൽ, പാ​ർ​ട്ടി​യു​ടെ ഔ​ദ്യോ​ഗി​ക വി​ശ​ദീ​ക​ര​ണ​ത്തെ 'ചേ​രി​മാ​റ​ൽ'​എ​ന്ന നി​ല​യി​ൽ വ്യാ​ഖ്യാ​നി​ക്കേ​ണ്ട​തി​ല്ലെ​ന്നാ​ണ്​ പാ​ർ​ട്ടി വൃ​ത്ത​ങ്ങ​ൾ പ​റ​യു​ന്ന​ത്. പ്ര​കാ​ശ്​ ബാ​ബു ഒ​രു ചേ​രി​യു​ടെ​യും ഭാ​ഗ​മ​ല്ലെ​ന്നും അ​വ​ർ വി​ശ​ദീ​ക​രി​ക്കു​ന്നു. പാ​ർ​ട്ടി ശ​ത്രു​ക്ക​ളു​മാ​യി ചേ​ർ​ന്ന് ചി​ല​ർ ന​ട​ത്തു​ന്ന നീ​ക്കം ശ​ക്ത​മാ​യി നേ​രി​ടു​മെ​ന്ന്​ അ​ദ്ദേ​ഹം പ​ര​സ്യ​മാ​യി​ത​ന്നെ വ്യ​ക്ത​മാ​ക്കി​യി​ട്ടു​ണ്ട്. വി​ഭാ​ഗീ​യ​ത​ക്ക്​ ത​ട​യി​ടാ​നു​ള്ള നീ​ക്ക​വും കാ​ന​ത്തി​ന്‍റെ നേ​തൃ​ത്വ​ത്തി​ൽ ഔ​ദ്യോ​ഗി​ക​പ​ക്ഷം ആ​രം​ഭി​ച്ചി​ട്ടു​ണ്ട്.

പ്രാ​യ​പ​രി​ധി നി​ര്‍ബ​ന്ധ​മാ​ക്കു​ന്ന​തി​നെ​തി​രെ സം​സ്ഥാ​ന കൗ​ൺ​സി​ലി​ൽ ഉ​യ​ര്‍ന്ന വി​മ​ര്‍ശ​ന​ങ്ങ​ള്‍ക്ക്​ മ​റു​പ​ടി പ​റ​ഞ്ഞ​താ​ണ്​ പ്ര​കാ​ശ് ബാ​ബു​വി​ന്‍റെ ചേ​രി​മാ​റ്റ​മാ​യി ചൂ​ണ്ടി​ക്കാ​ട്ടു​ന്ന​ത്. എ​ന്നാ​ൽ, സം​സ്ഥാ​ന കൗ​ൺ​സി​ലി​ൽ മ​റു​പ​ടി പ​റ​യാ​നു​ള്ള ചു​മ​ത​ല​യാ​ണ്​ പ്ര​കാ​ശ്​ ബാ​ബു നി​ർ​വ​ഹി​ച്ച​തെ​ന്നാ​ണ്​ പാ​ർ​ട്ടി വൃ​ത്ത​ങ്ങ​ൾ ന​ൽ​കു​ന്ന​ത്. 12 ജി​ല്ല സ​മ്മേ​ള​ന​ങ്ങ​ള്‍ പൂ​ര്‍ത്തി​യാ​യ​പ്പോ​ള്‍ ബ​ഹു​ഭൂ​രി​പ​ക്ഷം ജി​ല്ല​ക​ളി​ലും കാ​നം രാ​ജേ​ന്ദ്ര​ന്‍ സ്വാ​ധീ​നം ഉ​റ​പ്പി​ച്ച​ത് ഇ​സ്മ​യി​ല്‍ പ​ക്ഷ​ത്ത്​ വി​ള്ള​ലി​ന്​ കാ​ര​ണ​മാ​യി​ട്ടു​ണ്ട്. മ​ല​പ്പു​റം, വ​യ​നാ​ട് ജി​ല്ല സ​മ്മേ​ള​ന​ങ്ങ​ള്‍ മാ​ത്ര​മാ​ണ്​ ശേ​ഷി​ക്കു​ന്ന​ത്.

കൊ​ല്ല​ത്ത്​ ഇ​സ്മ​യി​ലി​നും പ്ര​കാ​ശ് ബാ​ബു​വി​നും ഒ​പ്പം നി​ന്ന പി.​എ​സ്. സു​പാ​ലി​നെ സ്വ​ന്തം ക്യാ​മ്പി​ലെ​ത്തി​ച്ച് സെ​ക്ര​ട്ട​റി​യാ​ക്കി​യാ​ണ് കാ​നം ഇ​ക്കു​റി ത​ന്‍റെ സ്വാ​ധീ​നം ഉ​റ​പ്പി​ച്ചു​ള്ള നീ​ക്കം ആ​രം​ഭി​ച്ച​ത്.

സി.​പി.​ഐ​യു​ടെ ശ​ക്തി​കേ​ന്ദ്ര​ങ്ങ​ളാ​യ കോ​ട്ട​യ​ത്തും ഇ​ടു​ക്കി​യി​ലും ഔ​ദ്യോ​ഗി​ക പ​ക്ഷ​ത്തെ തോ​ല്‍പ്പി​ച്ചെ​ങ്കി​ലും സം​സ്ഥാ​ന സ​മ്മേ​ള​ന​ത്തി​ല്‍ ഏ​റ്റു​മു​ട്ടാ​നു​ള്ള ഇ​സ്മ​യി​ല്‍ പ​ക്ഷ​ത്തി​ന്റെ ക​രു​ത്ത്​ കു​റ​യു​ക​യാ​ണെ​ന്നാ​ണ്​ കാ​ര്യ​ങ്ങ​ൾ വ്യ​ക്ത​മാ​ക്കു​ന്ന​ത്.