കണ്ണൂർ വിമാനത്താവളം: വിവാദത്തിനില്ല; ജനങ്ങളെ തെറ്റിദ്ധരിപ്പിക്കാനാവില്ല -ഉമ്മൻചാണ്ടി

കോട്ടയം: കണ്ണൂർ വിമാനത്താവളവുമായി ബന്ധപ്പെട്ട മുഖ്യമന്ത്രി‍യുടെ പ്രസ്താവനക്കെതിരെ മുൻ മുഖ്യമന്ത്രി ഉമ്മ ൻ ചാണ്ടി. കേരളത്തിലെ ജനങ്ങളെ അങ്ങനെ ആർക്കും തെറ്റിദ്ധരിപ്പിക്കാൻ കഴിയില്ലെന്ന് അദ്ദേഹം കോട്ടയത്ത് മാധ്യമങ്ങളോട് പ്രതികരിച്ചു. ‘വിമാനത്താവളം സംബന്ധിച്ച കാര്യങ്ങളെല്ലാം എന്താണ്, എങ്ങനെയാെണന്ന് ജനങ്ങൾക്ക് നന്നായി അറിയാം. ഞാനേതായാലും വിവാദത്തിനില്ല. കാരണം, ഇത് സന്തോഷിക്കേണ്ട നിമിഷമാണ്. കണ്ണൂർ വിമാനത്താവളം എന്നത് കേരള വികസനത്തി​​​െൻറ പുതിയ തലമാണ്.

2017ൽതന്നെ ഉദ്ഘാടനം നടത്താൻ സമയബന്ധിത പ്രവർത്തനങ്ങൾ നടത്തിയിരുന്നു. എന്നാൽ, പാറ പൊട്ടിക്കുന്നതും സ്ഥലം ഏറ്റെടുക്കുന്നതുമായി ബന്ധപ്പെട്ട് അന്ന് സി.പി.എം ഭരിച്ചിരുന്ന ഒരു പഞ്ചായത്തി​​​െൻറ ഭാഗത്തുനിന്നുള്ള നിസ്സഹരണം വിമാനത്താവളത്തി​​​െൻറ വർക്ക് ഷെഡ്യൂളിൽ താമസം വരുത്തി. എന്നിട്ടും റൺവേയുടെ പണി 100 ശതമാനം പൂര്‍ത്തിയാക്കി വിമാനം ഇറക്കിയിരുന്നു. അവശേഷിച്ചത് ടെർമിനലി​​​െൻറ പണി മാത്രമായിരുന്നു. അതും 80 ശതമാനം യു.ഡി.എഫ് സർക്കാർ അധികാരത്തിൽനിന്ന് ഇറങ്ങുമ്പോൾ പൂർത്തിയാക്കിയിരുന്നു. ഏതായാലും ഇപ്പോഴെങ്കിലും കണ്ണൂർ വിമാനത്താവളം യാഥാർഥ്യമായതിൽ സന്തോഷം’- ഉമ്മൻ ചാണ്ടി പറഞ്ഞു.

യു.ഡി.എഫ്​ സർക്കാറി​​​െൻറ കാലത്തെ നിഷ്ക്രിയ നിലപാടാണ്​ വിമാനത്താവളം വൈകാൻ കാരണമായതെന്ന്​ മുഖ്യമന്ത്രി പിണറായി വിജയൻ ഉദ്ഘാടന ചടങ്ങിൽ അഭിപ്രായപ്പെട്ടിരുന്നു.