കരിപ്പൂർ ഭൂമിയേറ്റെടുക്കൽ: പ്രാരംഭ നടപടികൾ 18 മുതൽ

കരിപ്പൂർ: കോഴിക്കോട്​ വിമാനത്താവള വികസനത്തിന്​ ഭൂമി ഏറ്റെടുക്കുന്നതിനുള്ള പ്രാരംഭ നടപടികൾ ഏപ്രിൽ 18ന്​ ആരംഭിക്കും. 18.5 ഏക്കർ ഭൂമിയാണ്​ റൺവേ എൻഡ്​ സേഫ്​റ്റി ഏരിയ (റെസ) നീളം കൂട്ടുന്നതിനായി കേന്ദ്രം ആവശ്യപ്പെട്ടത്​. പടിഞ്ഞാറ്​ ഭാഗത്തെ 11 ഏക്കറും കിഴക്ക്​ വശത്തെ​ ഏഴര ഏക്കറുമാണ്​ ഏറ്റെടുക്കുക. ഇതിന്​ മുന്നോടിയായി 18ന്​ റവന്യു വകുപ്പ്​ ഉദ്യോഗസ്ഥരും വിമാനത്താവള അതോറിറ്റി ഉദ്യോഗസ്ഥരും കൂടിക്കാഴ്ച നടത്തും.

തുടർന്ന്​ ഏറ്റെടുക്കേണ്ട സ്ഥലം സംബന്ധിച്ച സ്​കെച്ച്​ തയാറാക്കും. പിന്നീടാണ്​ സ്ഥലം ഏറ്റെടുക്കുന്നതിന്​ സർവേ നമ്പറുകൾ അടക്കം ഉൾപ്പെടുത്തി വിജ്​ഞാപനം പുറപ്പെടുവിക്കുക. നടപടികൾ വേഗത്തിലാക്കാൻ കഴിഞ്ഞ ദിവസം ചീഫ്​ സെക്രട്ടറി വി.പി. ജോയിയുടെ അധ്യക്ഷതയിൽ ചേർന്ന യോഗത്തിൽ തീരുമാനിച്ചിരുന്നു. ഇതിന്‍റെ തുടർച്ചയായാണ്​ വിമാനത്താവള ഉദ്യോഗസ്ഥരുമായുള്ള ചർച്ച. ഭൂമി വിട്ടുനൽകുന്നവരെ ബോധവത്​കരിക്കാൻ​ ഉദ്യോഗസ്ഥർ സ്ഥലം സന്ദർശിക്കാനും നഷ്ടപരിഹാര പാക്കേജ്​ വിശദീകരിക്കാനും പദ്ധതിയുണ്ട്​. അഞ്ച്​ മാസത്തിനകം വിജ്ഞാപന നടപടികൾ പൂർത്തീകരിക്കാനാണ്​ നീക്കം.

വലിയ വിമാന സർവിസുകൾ പുനരാരംഭിക്കാനാണ്​ ഭൂമി ഏറ്റെടുത്ത്​ നൽകാൻ കേന്ദ്രം ആവശ്യപ്പെട്ടത്​. 2023 മാർച്ചിന്​ മുമ്പ്​ ഭൂമി ഏറ്റെടുത്ത്​ നിരപ്പാക്കി നൽകണമെന്നാണ്​ കേന്ദ്ര​ വ്യോമയാന മന്ത്രാലയം സംസ്ഥാനത്തോട്​ ആവശ്യപ്പെട്ടത്​.