കാസർകോട് ഭൂമിദാന കേസ്: വി.എസിനെതിരായ അപ്പീൽ സർക്കാർ പിൻവലിച്ചു

കൊച്ചി: ബന്ധുവായ വിമുക്​ത ഭടന്​ ഭൂമി പതിച്ചു നൽകിയെന്ന വിജിലൻസ്​ കേസിൽ മുൻമുഖ്യമന്ത്രി വി.എസ്​. അച്യുതാനന്ദ നെ കുറ്റവിമുക്​തനാക്കിയതിനെതിരെ സർക്കാർ നൽകിയ അപ്പീൽ പിൻവലിച്ചു. മുഖ്യമന്ത്രിയായിരുന്നപ്പോള്‍ വി.എസ് അച്യു താനന്ദന്‍ ആലപ്പുഴ സ്വദേശിയായ സോമന് ചട്ടം ലംഘിച്ച് ഭൂമി പതിച്ചുനല്‍കിയെന്ന കേസി​​െൻറ അപ്പീലാണ്​ ​ഡിവിഷൻബെഞ ്ചി​​െൻറ പരിഗണനയിലുണ്ടായിരുന്നത്​.

2010ൽ അന്നത്തെ എല്‍.ഡി.എഫ്. സര്‍ക്കാര്‍ കാസര്‍കോട് ജില്ലയില്‍ 2.33 ഏക്കര്‍ ഭൂമി പതിച്ച് നല്‍കിയതാണ്​ കേസി​നിടയാക്കിയത്​. വിമുക്തഭടന്‍ എന്ന പേരില്‍ ബന്ധുവിന് ഭൂമി നല്‍കിയത് ചട്ടവിരുദ്ധമാണെന്ന് കണ്ടെത്തിയതിനെ തുടർന്ന്​ ഉമ്മൻ ചാണ്ടി സര്‍ക്കാറാണ്​ അച്യുതാനന്ദനെതിരെ വിജിലന്‍സ് അന്വേഷണത്തിന് ഉത്തരവിട്ടത്​. ഇതിനെതിരെ അച്യുതാനന്ദൻ നൽകിയ ഹരജിയിൽ ഹൈകോടതി സിംഗിൾബെഞ്ച്​ അദ്ദേഹത്തെ പ്രതിസ്​ഥാനത്തുനിന്ന്​ ഒഴിവാക്കി.

അച്യുതാനന്ദന്​ വേണ്ടി കുരിശുണ്ടാക്കി അദ്ദേഹത്തെ അതിൽ തറക്കുകയാണെന്നും കേസ്​ നിലനിൽക്കില്ലെന്നും​ മറ്റുമുള്ള പരാമർശങ്ങളോടെയായിരുന്നു അച്യുതാനന്ദനെ കുറ്റവിമുക്​തനാക്കി സിംഗിൾബെഞ്ച്​ ഉത്തരവ്​​. എന്നാൽ, മണിക്കൂറുകള്‍ക്കകം അന്നത്തെ യു​.ഡി.എഫ്​ സർക്കാർ ഇതിനെതിരെ അപ്പീൽ നൽകുകയും ചീഫ്​ ജസ്​റ്റിസ്​ അധ്യക്ഷയായ ഡിവിഷൻ​ബെഞ്ച്​ ഉത്തരവ്​​ സ്​​റ്റേ ചെയ്യുകയും ചെയ്​തിരുന്നു. ഈ അപ്പീലാണ്​ ഇപ്പോൾ പിൻവലിച്ചിരിക്കുന്നത്​.

അപ്പീലുമായി മുന്നോട്ടു പേ​ാകേണ്ടതില്ലെന്ന്​ സർക്കാർ തീരുമാനിച്ചെന്നും അതിനാൽ പിൻവലിക്കാൻ അനുവദിക്കണമെന്നും സർക്കാർ കോടതിയിൽ രേഖാ മൂലം ആവശ്യപ്പെടുകയായിരുന്നു. തുടർന്ന്​ ഈ ആവശ്യം ചീഫ്​ ജസ്​റ്റിസ്​ ഋഷികേശ്​ റോയ്​, ജസ്​റ്റിസ്​ എ​. കെ. ജയശങ്കരൻ നമ്പ്യാർ എന്നിവരടങ്ങുന്ന ഡിവിഷൻബെഞ്ച്​ അനുവദിച്ചു.