മൊഗ്രാലിൽ പുതുതായി രണ്ട് റോഡുകൾ

കുമ്പള: ഏറെ കാത്തിരിപ്പിനൊടുവിൽ മൊഗ്രാലിൽ രണ്ട് ലിങ്ക് റോഡുകൾ യാഥാർഥ്യമാവുന്നു. മൊഗ്രാൽ കെ.കെ പുറം-കാടിയംകുളം ലിങ്ക് റോഡ്, നാങ്കി -മീലാദ് നഗർ ലിങ്ക് റോഡ് എന്നിവയുടെ ജോലികൾ പുരോഗമിക്കുന്നു. പ്രദേശവാസികൾ വർഷങ്ങളായി ആവശ്യപ്പെടുന്നതാണ് ഈ ലിങ്ക് റോഡുകളുടെ നിർമാണം. കെ.കെ. പുറം നിവാസികൾക്ക് മൊഗ്രാൽ ഗവ. വൊക്കേഷനൽ ഹയർ സെക്കൻഡറി സ്കൂൾ, യൂനാനി ഡിസ്പെൻസറി, അംഗൻവാടി എന്നിവിടങ്ങളിലേക്ക് എളുപ്പത്തിൽ എത്തിച്ചേരാൻ ഏറെ ഉപകരിക്കുന്നതാണ് കാടിയംകുളം -കെ.കെ പുറം ലിങ്ക് റോഡ്. ഈ വർഷം തന്നെ റോഡ് കോൺക്രീറ്റ് ചെയ്തു ഗതാഗതയോഗ്യമാക്കുമെന്ന് വാർഡ് മെംബറും, കുമ്പള ഗ്രാമ പഞ്ചായത്ത് വൈസ് പ്രസിഡന്‍റുമായ നാസർ മൊഗ്രാൽ പറഞ്ഞു. രണ്ടു വാഹനങ്ങൾ എതിരെ വന്നാൽ ഗതാഗത തടസ്സം നേരിടുന്ന മീലാദ് നഗറിന് ഏറെ ആശ്വാസമേകുന്നതാണ് നാങ്കി - മീലാദ് നഗർ ലിങ്ക് റോഡ്. റോഡ് യാഥാർഥ്യമായാൽ മീലാദ് നഗറിൽ നിന്ന് നാങ്കി വഴിയും, മീലാദ് നഗറിലൂടെയും മൊഗ്രാൽ ടൗണിൽ എത്തിച്ചേരാനാവും. ഇതിനായി ഈ വാർഡിനെ പ്രതിനിധീകരിക്കുന്ന റിയാസ് മൊഗ്രാലിന്റെ നേതൃത്വത്തിൽ റോഡ് നിർമാണ ജോലികൾ ആരംഭിച്ചിട്ടുണ്ട്.