എസ്.എസ്.എഫ് ജില്ല കാമ്പസ് അസംബ്ലി 18നും 19നും

കാസർകോട്: 'ലെറ്റ്സ്മൈൽ; ഇറ്റ്സ് ചാരിറ്റി' എന്ന പ്രമേയത്തിൽ എസ്.എസ്.എഫ് ജില്ല കമ്മിറ്റി സംഘടിപ്പിക്കുന്ന കാമ്പസ് അസംബ്ലി ഡിസംബർ 18, 19 തീയതികളിൽ മഞ്ചേശ്വരം മള്ഹറിൽ നടക്കുമെന്ന്​ സംഘാടകർ വാർത്തസമ്മേളനത്തിൽ അറിയിച്ചു. രണ്ട് ദിനങ്ങളിലായി നടക്കുന്ന കാമ്പസ് അസംബ്ലിയിൽ ജില്ലയിലെ പ്രഫഷനൽ, ആർട്സ് & സയൻസ് കോളജുകളിലെ ആയിരത്തോളം വിദ്യാർഥികൾ സംബന്ധിക്കും. 18ന് വൈകീട്ട്​ സംഘാടക സമിതി ചെയർമാൻ സയ്യിദ് അബ്​ദുറഹ്മാൻ ശഹീർ അൽ ബുഖാരി പതാക ഉയർത്തും. 19ന് രാവിലെ ഒമ്പതിന്​ നടക്കുന്ന ഉദ്ഘാടന സംഗമത്തിൽ അബ്​ദുറഹ്മാൻ സഖാഫി പൂത്തപ്പലം അധ്യക്ഷത വഹിക്കും. സംസ്ഥാന ജനറൽ സെക്രട്ടറി സി.എൻ. ജഅഫർ സ്വാദിഖ് ഉദ്ഘാടനം നിർവഹിക്കും. സ്​റ്റേറ്റ് യൂനിവേഴ്സിറ്റി ഓഫ് ന്യൂയോർക്കിൽ പ്രവേശനം ലഭിച്ച എസ്.എസ്.എഫ് ജില്ല എക്സിക്യൂട്ടിവ്​ അംഗം മുഹമ്മദ് മുദ്ദസിർ മഞ്ചേശ്വരത്തിന് സൈനുൽ ആബിദീൻ മുത്തുക്കോയ തങ്ങൾ അൽ അഹ്ദൽ ഉപഹാരം നൽകും. ഡോ. അബൂബക്കർ, ഡോ. നൂറുദ്ദീൻ, ഡോ. ദേവർഷോല അബ്​ദുസ്സലാം മുസ്​ലിയാർ, സി.കെ. റാഷിദ് ബുഖാരി, എം. മുഹമ്മദ് നിയാസ് കോഴിക്കോട്, ഇബ്രാഹീം ബാഖവി മേൽമുറി, അനസ് അമാനി കണ്ണൂർ, ഫാസിൽ നൂറാനി, ശമീൽ നുസ്രി, ശിഹാബ് ക്ലായിക്കോട്, അഹമ്മദ് ഫസാരിയ ജാമിഅ മില്ലിയ, അഡ്വ. മുഈനുദ്ദീൻ തങ്ങൾ വിവിധ സെഷനുകൾ നയിക്കും. വൈകീട്ട്​ നാലിന്​ നടക്കുന്ന സമാപന സമ്മേളനം സമസ്ത കേന്ദ്ര മുശാവറ അംഗം കെ.എസ്. ആറ്റക്കോയ തങ്ങൾ കുമ്പോൽ ഉദ്ഘാടനം ചെയ്യും. വിദ്യാർഥി റാലിയോടെ കാമ്പസ് അസംബ്ലി സമാപിക്കും. വാർത്തസമ്മേളനത്തിൽ സയ്യിദ് അബ്​ദുറഹ്മാൻ ശഹീർ അൽ ബുഖാരി, പള്ളങ്കോട് അബ്​ദുൽ ഖാദിർ മദനി, അബ്​ദുറഹ്മാൻ സഖാഫി പൂത്തപ്പലം, ഉമറുൽ ഫാറൂഖ് പൊസോട്ട്, സ്വാദിഖ് ആവള എന്നിവർ സംബന്ധിച്ചു.