കർണാടകയിലേക്ക്​ കടക്കാൻ കോവിഡില്ലാ സർട്ടിഫിക്കറ്റ്​ നിർബന്ധമാക്കി; അതിർത്തി കടക്കാൻ പൊറുതിമുട്ടി ജനം

കാസർകോട്​: കേരളത്തിലെ കോവിഡ്​ കണക്കുകൾ കണ്ട്​ കർണാടക നിലപാട്​ കടുപ്പിച്ചതോടെ പൊറുതിമുട്ടി ജനം. കർണാടകയിലേക്ക്​ പ്രവേശിക്കാൻ കോവിഡ്​ ഇല്ലെന്ന്​ തെളിയിക്കുന്ന സർട്ടിഫിക്കറ്റ്​ നിർബന്ധമാക്കിയതാണ്​ ജനത്തെ ദുരിതത്തിലാക്കിയത്​. എന്തിനും ഏതിനും മംഗളൂരുവിലേക്ക്​ പോകുന്ന കാസർകോട്​, കണ്ണൂർ ജില്ലയിലുള്ളവർ ഇതോടെ വീണ്ടും പ്രതിസന്ധിയിലായി. പുതിയ മുഖ്യമന്ത്രി ചുമതലയേറ്റതിനുശേഷമാണ്​ കർണാടക നിയന്ത്രണം കർശനമാക്കിയത്​. 72 മണിക്കൂറിനുമുമ്പ്​ എടുത്ത ആർ.ടി.പി.സി.ആർ ​പരിശോധനയുടെ നെഗറ്റിവ്​ റിപ്പോർട്ടാണ്​ അതിർത്തി കടക്കാൻ യാത്രക്കാർ ഹാജരാക്കേണ്ടത്​. രണ്ടു വാക്​സിൻ എടുത്തവരെ പോ​ലും കടത്തിവിടരുതെന്നാണ്​ കർണാടക ആരോഗ്യവക​ുപ്പ്​ ചീഫ്​ സെക്രട്ടറിയുടെ നിർദേശം. ഇതിനുപിന്നാലെ കേരളത്തിലേക്കുള്ള ബസ്​ സർവിസ്​ ഒരാഴ്​ചത്തേക്ക്​ കർണാടക നിർത്തിവെച്ചു.

ബസുകൾ തലപ്പാടി വരെ

​കാസർകോടുനിന്നുള്ള ബസുകൾ തലപ്പാടി വരെ പോയി യാത്ര അവസാനിപ്പിക്കുകയാണ്​. കർണാടകയിൽനിന്നുള്ള ബസുകളും തലപ്പാടിവരെയാണ്​ വരുന്നത്​. ഞായറാഴ്​ച സമ്പൂർണ ലോക്​ഡൗൺ ആയതിനാൽ ചുരുക്കം ചില ബസുകൾ മാത്രമാണ്​ സർവിസ്​ നടത്തിയത്​.

തിങ്കളാഴ്​ച കൂടുതൽ ബസുകൾ തലപ്പാടി വരെ പോകുമെന്ന്​ കെ.എസ്​.ആർ.ടി.സി അധികൃതർ അറിയിച്ചു.യാത്രക്കാർക്ക്​ ആർ.ടി.പി.സി.ആർ നെഗറ്റിവ്​ റിപ്പോർട്ട്​ ഉണ്ടെന്ന്​ ഉറപ്പാക്കാൻ കണ്ടക്​ടർമാർക്കാണ്​ നിർദേശം നൽകിയത്​​.

വീഴ്​ച വരുത്തുന്നവർക്കെതിരെ നടപടിയെടുക്കുമെന്നും അതിർത്തി പങ്കിടുന്ന ജില്ലകളിലെ ഡെപ്യൂട്ടി കമീഷണർമാർക്ക്​ നിർദേശം നൽകി. ഏതാനും ദിവസങ്ങൾക്കുമുമ്പാണ്​ കാസർകോട്​- മംഗളൂരു ബസ്​ സർവിസ്​ ആരംഭിച്ചിരുന്നത്​.കോവിഡ്​ രണ്ടാംതരംഗം തുടങ്ങിയശേഷം രണ്ടാമത്തെ തവണയാണ്​ ബസ്​ സർവിസ്​ നിർത്തിവെക്കുന്നത്​.

അടിയന്തര ആവശ്യങ്ങൾക്ക്​ ഇളവ്​

മരണം പോലുള്ള അടിയന്തര വിഷയങ്ങളിൽ ഇളവു നൽകിയിട്ടുണ്ട്​. ട്രെയിൻ യാത്രക്കാർക്കും കടുത്ത പരിശോധനയാണ്​ ഏർപ്പെടുത്തിയത്​.

റെയിൽവേ സ്​റ്റേഷനിൽ ഇതിനായി പ്രത്യേക സൗകര്യം ഒരുക്കിയിട്ടുണ്ട്​. ​നെഗറ്റിവ്​ റിപ്പോർട്ട്​ ഇല്ലാത്തവർക്കായി അതിർത്തിയിൽ ആൻറിജൻ പരിശോധന കൗണ്ടറും ആരംഭിച്ചു.രണ്ടു വാക്​സിൻ എടുത്തവരെ കടത്തിവിടാൻ നിർദേശമില്ലെങ്കിലും അപൂർവം ചിലരെ പ്രവേശിപ്പിക്കുന്നുണ്ട്​. ഹൈവേകളെ അപേക്ഷിച്ച്​ അതിർത്തി ഗ്രാമങ്ങളിൽ കാര്യമായ പരി​േശാധനയില്ല.