ജാഗ്രത അൽപം കൈവിട്ടു; കാസർകോട് കോവിഡ്​ വീണ്ടും മേലോട്ട്​

കാസർകോട്​: ആത്​മവിശ്വാസം അൽപം കൂടുകയും ജാഗ്രത കുറയുകയും ചെയ്​തതോടെ ജില്ലയിൽ കോവിഡ്​ കേസുകൾ വീണ്ടും മേ​േലാട്ട്​. സംസ്​ഥാനത്ത്​ ഏറ്റവും വേഗത്തിൽ രോഗികളുടെ എണ്ണം കുറച്ചുകൊണ്ടുവന്ന ജില്ലയിലാണ്​​ കാര്യങ്ങൾ മാറിമറിയുന്നത്​. ജില്ലയിൽ രോഗ സ്​ഥിരീകരണ നിരക്ക്​ വീണ്ടും എട്ട്​ ശതമാനത്തിലെത്തി.

ഒക്​ടോബറിൽ മൂന്നുശതമാനം വരെയായി കുറഞ്ഞ സ്​ഥാനത്താണ്​ ഈ ആവസ്​ഥ. മൂന്നോ നാലോ​ ദിവസമായാണ്​ ​രോഗ സ്​ഥിരീകരണ നിരക്കിലും രോഗികളുടെ എണ്ണത്തിലും ജില്ല മുന്നിലേക്ക്​ വന്നു തുടങ്ങിയത്​. ജില്ലയിലെ കോവിഡ്​ കേസുകളിലെ ഈ മാറ്റം നിരീക്ഷിക്കുകയാണ്​ ആരോഗ്യവകുപ്പ്​ അധികൃതർ. കോവിഡ് പൂർണമായും മാറിയ സാഹചര്യം പോലെയാണ്​ നാടും നഗരവും​. സാമൂഹിക അക​ലമോ നേരാംവണ്ണം മാസ്​ക്​ ഉപയോഗിക്കലോ സാനിറ്റൈസർ ഉപയോഗമോ ഏറക്കുറെ മറന്ന മട്ടാണെന്ന്​ ആരോഗ്യ വകുപ്പിലെ ഉദ്യോഗസ്​ഥൻ പറഞ്ഞു. ജില്ലയിലെ ബീച്ചുകളിൽ റെക്കോഡ്​ ജനമാണ്​ കഴിഞ്ഞ അവധി ദിവസങ്ങളിൽ ദൃശ്യമായത്​. കോവിഡ്​ നിയന്ത്രണങ്ങളിൽ അയവ്​ വരുത്തിയത്​ ഉപജീവനമാർഗം തടസ്സപ്പെടാതിരിക്കാൻ വേണ്ടിയെന്ന കാര്യം പലരും മറന്നതായും ഉദ്യോഗസ്​ഥർ പറയുന്നു. സംസ്​ഥാനത്ത്​ ആകെ രോഗികളുടെ എണ്ണത്തിൽ ഏറ്റവും കുറവ്​ കാസർകോട്​ തന്നെയാണ്. ഒക്​ടോബറിൽ​ അതിവേഗത്തിലാണ്​ രോഗികളുടെ എണ്ണം കുറഞ്ഞു തുടങ്ങിയത്​​. എന്നാൽ, ഒരാഴ്​ചയിലധികമായി രോഗികളുടെ എണ്ണത്തിൽ നേരിയ വർധന അനുഭവപ്പെടാൻ തുടങ്ങി.

ജില്ലയിൽ ചിലരെങ്കിലും ഒരു ഡോസ്​ വാക്​സിനെടുത്ത്​ രണ്ടാമത്തേതിന്​ വിമുഖത കാണിക്കുന്നതും തിരിച്ചടിയാണ്​. ഒറ്റ ഡോസിൽ വാക്​സിനേഷൻ അവസാനിപ്പിക്കുന്ന പ്രവണത സംസ്​ഥാനത്ത്​ മൊത്തത്തിലുണ്ട്​. ഇത്തരക്കാരെ ബോധവത്​കരിക്കുന്നുണ്ടെങ്കിലും കാര്യമായ ഫലം ലഭിക്കുന്നില്ല. ലക്ഷണങ്ങളില്ലാത്ത രോഗികൾ പുറത്തിറങ്ങുന്നതും പ്രശ്​നമാവുന്നതായി ഉദ്യോഗസ്​ഥർ പറയുന്നു.