മെ​ഡി​ക്ക​ൽ ഓ​ഫി​സ് പൂ​ട്ടി​യ സം​ഭ​വം: പ​ഞ്ചാ​യ​ത്ത് ഭ​ര​ണ​സ​മി​തി​യും ആ​രോ​ഗ്യ​ വി​ഭാ​ഗ​വും ര​ണ്ടു​ത​ട്ടി​ൽ

കാ​സ​ർ​കോ​ട്: പ​ന​ത്ത​ടി കു​ടും​ബാ​രോ​ഗ്യ​കേ​ന്ദ്ര​ത്തി​ൽ ബു​ധ​നാ​ഴ്ച ന​ട​ന്ന വി​വാ​ദ സം​ഭ​വ​ത്തി​ൽ ഭ​ര​ണ​സ​മി​തി​യും ജി​ല്ല ആ​രോ​ഗ്യ​വ​കു​പ്പും ര​ണ്ടു ത​ട്ടി​ൽ. പ​ഞ്ചാ​യ​ത്ത് ഭ​രി​ക്കു​ന്ന എ​ൽ.​ഡി.​എ​ഫ് ഭ​ര​ണ​സ​മി​തി​യും ജി​ല്ല ആ​രോ​ഗ്യ വി​ഭാ​ഗ​വു​മാ​ണ് ഏറ്റുമുട്ടുന്നത്.പാ​ലി​യേ​റ്റി​വ് ന​ഴ്സി​ന്റെ ക​രാ​ർ പു​തു​ക്കു​ന്ന​ത് സം​ബ​ന്ധി​ച്ച ​വി​ഷ​യ​ത്തി​ൽ ബു​ധ​നാ​ഴ്ച മെ​ഡി​ക്ക​ൽ ഓ​ഫി​സ​റു​ടെ മു​റി പൂ​ട്ടി താ​ക്കോ​ലു​മാ​യി പ​ന​ത്ത​ടി പ​ഞ്ചാ​യ​ത്ത് പ്ര​സി​ഡ​ന്റ് പോ​വു​ക​യാ​യി​രു​ന്നു.

ഈ ​സം​ഭ​വ​ത്തി​ൽ കെ.​ജി.​എം.​ഒ.​എ പ്ര​തി​ഷേ​ധ​ക്കു​റി​പ്പു​മി​റ​ക്കി​. സ്റ്റാ​ഫ് ന​ഴ്സി​ന്റെ ക​രാർ പു​തു​ക്കി ന​ൽ​കാനുള്ള ഭരണസമിതി തീരുമാനമാണ് വിവദത്തിനടിസ്ഥാനം. സ്റ്റാ​ഫ് ന​ഴ്സ് പ​ല പ്രാ​വ​ശ്യം ആ​ത്മ​ഹ​ത്യ​ക്ക് ശ്ര​മി​ച്ച സാഹചര്യത്തിൽ മെ​ഡി​ക്ക​ൽ ഓ​ഫി​സ​ർ ഡോ. ​ഷ​ബാ​ന ഫി​റ്റ്ന​സ് ചോ​ദി​ക്കുകയും പു​തു​ക്കു​ന്ന​തി​ൽ വി​യോ​ജി​പ്പ് പ​റ​യുകയും ചെയ്തു. ഇ​തി​നെ​തി​രെ​യാ​ണ് പ​ന​ത്ത​ടി പ​ഞ്ചാ​യ​ത്ത് ഭ​ര​ണ​സ​മി​തി രം​ഗ​ത്തു​വ​ന്നത്.

അ​തി​ക്ര​മ​ങ്ങ​ൾ നോ​ക്കി​നി​ൽ​ക്കി​ല്ല -കെ.​ജി.​എം.​ഒ.​എ

കാ​സ​ർ​കോ​ട്: പാ​ണ​ത്തൂ​ർ കു​ടും​ബാ​രോ​ഗ്യ കേ​ന്ദ്ര​ത്തി​ൽ പ​ഞ്ചാ​യ​ത്ത് പ്ര​സി​ഡ​ന്റി​ന്റെ നേ​തൃ​ത്വ​ത്തി​ൽ മു​റി താ​ഴി​ട്ടു​പൂ​ട്ടിയ ന​ട​പ​ടി​യി​ൽ കേരള ഗവ. മെഡിക്കൽ ഓഫിസേഴ്സ് അസോസിയേഷൻ (കെ.​ജി.​എം.​ഒ.​എ) പ്ര​തി​ഷേ​ധി​ച്ചു.

ആ​രോ​ഗ്യ​കേ​ന്ദ്ര​ത്തി​ന് സം​ര​ക്ഷ​ണ​മൊ​രു​ക്കേ​ണ്ട പ​ഞ്ചാ​യ​ത്ത​ധി​കൃ​ത​ർ ത​ന്നെ ഇ​ത്ത​രം പ്ര​വൃ​ത്തി​ക​ൾ ചെ​യ്യു​ന്ന​ത് കു​റ്റ​ത്തി​ന്റെ ഗൗ​ര​വം വ​ർ​ധി​പ്പി​ക്കു​ന്നു. മെ​ഡി​ക്ക​ലി ഫി​റ്റ​ല്ലെ​ന്ന് തോ​ന്നി​യ ഒ​രാ​ൾ​ക്ക് ജോ​ലി ന​ൽ​ക​ണ​മെ​ന്നാ​വ​ശ്യ​പ്പെ​ട്ടാ​ണ് ഇ​വ​ർ മെ​ഡി​ക്ക​ൽ ഓ​ഫി​സ​റെ സ​മ്മ​ർ​ദ​ത്തി​ലാ​ക്കി​യ​ത്.

സ്വ​ന്തം ആ​ൾ​ക്കാ​രെ തി​രു​കിക്കയ​റ്റു​ന്ന​തി​ന് ആ​ശു​പ​ത്രി​ക​ളെ ഉ​പ​യോ​ഗി​ക്കു​ന്ന​ത് തെ​റ്റാ​യ പ്ര​വ​ണ​ത​യാ​ണ്. ഇ​ത്ത​രം ആ​വ​ശ്യ​ങ്ങ​ൾ പ​റ​ഞ്ഞ് ആ​ശു​പ​ത്രി​ക​ളി​ൽ വ​ന്ന് അ​തി​ക്ര​മം കാ​ണി​ക്കു​ന്ന​ത് കൊ​ൽ​ക്ക​ത്ത​യി​ൽ ന​ട​ന്ന​തി​ന്റെ മ​റ്റൊ​രു രൂ​പ​മാ​ണെ​ന്ന് പ​റ​യേ​ണ്ടി​വ​രും. ഡോ​ക്ട​ർ​മാ​ർ​ക്കെ​തി​രെ​യു​ള്ള ഇ​ത്ത​രം അ​തി​ക്ര​മ​ങ്ങ​ൾ നോ​ക്കി​നി​ൽ​ക്കി​ല്ലെ​ന്നും നീ​തി​ക്കു​വേ​ണ്ടി ശ​ക്ത​മാ​യ സ​മ​ര​ങ്ങ​ളി​ലേ​ക്ക് പോ​കാ​ൻ​ സം​ഘ​ട​ന നി​ർ​ബ​ന്ധി​ത​മാ​കു​മെ​ന്നും കെ.​ജി.​എം.​ഒ.​എ അ​റി​യി​ച്ചു.

ഇ​ത്ത​രം പ്ര​വ​ണ​ത​ക​ൾ ത​ട​യാ​ൻ അ​ധി​കൃ​ത​രു​ടെ ഭാ​ഗ​ത്തു​നി​ന്ന് ക​ർ​ശ​ന​ ന​ട​പ​ടി​ക​ളു​ണ്ടാ​ക​ണം. ചി​കി​ത്സ നി​ഷേ​ധി​ക്ക​പ്പെ​ടു​ന്ന അ​ത്ത​രം സ​മ​ര​ങ്ങ​ളി​ലേ​ക്ക് ഡോ​ക്ട​ർ​മാ​രെ ത​ള്ളി​വി​ട​രു​തെ​ന്നും കെ.​ജി.​എം.​ഒ.​എ നേ​താ​ക്ക​ളാ​യ ഡോ. ​എ.​ടി. മ​നോ​ജ്, ഡോ. ​വി.​കെ. ഷി​ൻ​സി എ​ന്നി​വ​ർ അ​റി​യി​ച്ചു.

അ​ടി​യ​ന്ത​ര ഭ​ര​ണ​സ​മി​തി വി​ളി​ക്ക​ണം -പ്ര​തി​പ​ക്ഷം

രാ​ജ​പു​രം: കു​ടും​ബാ​രോ​ഗ്യ​കേ​ന്ദ്രം ര​ക്ഷാ​ധി​കാ​രി കൂ​ടി​യാ​യ പ​ഞ്ചാ​യ​ത്ത് പ്ര​സി​ഡ​ന്റ് മെ​ഡി​ക്ക​ൽ ഓ​ഫി​സ​റെ ഭീ​ഷ​ണി​പ്പെ​ടു​ത്തി ഔ​ദ്യോ​ഗി​ക കൃ​ത്യ​നി​ർ​വ​ഹ​ണം ത​ട​സ്സ​പ്പെ​ടു​ത്തി മു​റി പൂ​ട്ടി താ​ക്കോ​ലു​മാ​യി ക​ട​ന്നു​ക​ള​ഞ്ഞ​ത് കേ​ട്ടു​കേ​ൾ​വി​പോ​ലു​മി​ല്ലാ​ത്ത സം​ഭ​വ​മാ​ണെ​ന്ന് പ​ന​ത്ത​ടി പ​ഞ്ചാ​യ​ത്തിലെ പ്ര​തി​പ​ക്ഷ അംഗങ്ങൾ ആ​രോ​പി​ച്ചു. പ​ന​ത്ത​ടി പ​ഞ്ചാ​യ​ത്ത് പ്ര​സി​ഡ​ന്റും സ്ഥി​രം​സ​മി​തി അ​ധ്യ​ക്ഷ​രും ചേ​ർ​ന്ന് ന​ട​ത്തി​യ നാ​ട​ക​ത്തി​ലൂ​ടെ ജ​ന​ങ്ങ​ളു​ടെ മു​ന്നി​ൽ പ​രി​ഹാ​സ്യ​രാ​യെ​ന്നും ഇ​വ​ർ പ​റ​ഞ്ഞു.

നി​ശ്ചി​ത യോ​ഗ്യ​ത​യി​ല്ലാ​ത്ത പാ​ലി​യേ​റ്റി​വ് ന​ഴ്സി​നെ രാ​ഷ്ട്രീ​യ യോ​ഗ്യ​ത​യു​ടെ മാ​ത്രം അ​ടി​സ്ഥാ​ന​ത്തി​ൽ തു​ട​ർ നി​യ​മി​ക്കു​ന്ന​ത് അം​ഗീ​ക​രി​ക്കാ​നാ​വി​ല്ല. ക​ഴി​ഞ്ഞ മാ​ർ​ച്ച് 31ന് ​ക​രാ​ർ കാ​ലാ​വ​ധി അ​വ​സാ​നി​ച്ച ന​ഴ്സി​ന്റെ സേ​വ​നം അ​വ​സാ​നി​പ്പി​ച്ച് പു​തി​യ പാ​ലി​യേ​റ്റി​വ് ന​ഴ്സി​നെ നി​യ​മി​ക്ക​ണ​മെ​ന്നും ന​ഴ്സി​നെ​തി​രെ ചാ​മു​ണ്ഡി​ക്കു​ന്ന് സ്വ​ദേ​ശി വി.​എ​സ്. അ​നു​രാ​ജ് ന​ൽ​കി​യ പ​രാ​തി ച​ർ​ച്ച ചെ​യ്യു​ന്ന​തി​ന് അ​ടി​യ​ന്ത​ര ഭ​ര​ണ​സ​മി​തി യോ​ഗം വി​ളി​ച്ചു​ചേ​ർ​ക്ക​ണ​മെ​ന്നും പ്ര​തി​പ​ക്ഷാം​ഗ​ങ്ങ​ളാ​യ കെ.​കെ. വേ​ണു​ഗോ​പാ​ൽ, കെ.​ജെ. ജെ​യിം​സ്, എ​ൻ. വി​ൻ​സെ​ന്റ്, രാ​ധാ സു​കു​മാ​ര​ൻ, കെ.​എ​സ്. പ്രീ​തി എ​ന്നി​വ​ർ പ​ഞ്ചാ​യ​ത്ത് പ്ര​സി​ഡ​ന്റി​ന് ന​ൽ​കി​യ ക​ത്തി​ൽ ആ​വ​ശ്യ​പ്പെ​ട്ടു.

പ​ല കാ​ര​ണ​ങ്ങ​ൾ പ​റ​ഞ്ഞ് ന​ട​ത്തി​ച്ചു -പ​ഞ്ചാ​യ​ത്ത് പ്ര​സി​ഡ​ന്റ്

രാ​ജ​പു​രം: സ്റ്റാ​ഫ് ന​ഴ്സി​നെ പ​ല കാ​ര​ണ​ങ്ങ​ൾ പ​റ​ഞ്ഞ് ന​ട​ത്തി​ച്ച​തി​ൽ പ്ര​തി​ഷേ​ധി​ച്ചാ​ണ് ബു​ധ​നാ​ഴ്ച മെ​ഡി​ക്ക​ൽ ഓ​ഫി​സ് പൂ​ട്ടാ​നിടയായ​ത് പ​ഞ്ചാ​യ​ത്ത് പ്ര​സി​ഡ​ന്റ് പ്ര​സ​ന്ന പ്ര​സാ​ദ് ‘മാ​ധ്യ​മ’​ത്തോ​ട് പ​റ​ഞ്ഞു.ഒ​ന്ന​ര​മാ​സ​മാ​യി ന​ഴ്സ് ലീ​വാ​യി​രു​ന്നു. അ​വ​രെ തി​രി​ച്ചെ​ടു​ക്ക​ണ​മെ​ങ്കി​ൽ ഫി​റ്റ്ന​സ് സ​ർ​ട്ടി​ഫി​ക്ക​റ്റ് വേ​ണ​മെ​ന്ന് മെ​ഡി​ക്ക​ൽ ഓ​ഫി​സ​ർ ആ​വ​ശ്യ​പ്പെ​ട്ടു. പാ​ലി​യേ​റ്റി​വ് മാ​നേ​ജ്മെ​ന്റ് ക​മ്മി​റ്റി (പി.​എം.​സി) ചേ​ർ​ന്ന് ഇ​വ​രു​ടെ കാ​ലാ​വ​ധി 2025 മാർച്ച് 31വ​രെ ദീ​ർ​ഘി​പ്പി​ക്കാൻ തീ​രു​മാ​നി​ച്ചി​രു​ന്നു. ഇ​തി​ന്റെ അ​ടി​സ്ഥാ​ന​ത്തി​ൽ തി​ങ്ക​ളാ​ഴ്ച ജോ​ലി​യി​ൽ പ്ര​വേ​ശി​ക്കാ​ൻ വ​രു​ക​യും മെ​ഡി​ക്ക​ൽ ഓ​ഫി​സ​ർ അവധിയാ​യ​തി​നാ​ൽ തി​രി​ച്ചു​പോ​വു​ക​യു​മാ​യി​രു​ന്നു. ചൊ​വ്വാ​ഴ്ച ഓ​ഫി​സ് അവധിയുമാ​യി​രു​ന്നു. ബു​ധ​നാ​ഴ്ച വ​ന്ന​പ്പോ​ഴാ​ണ് സ്റ്റോ​ക്ക് ക്ലി​യ​ർ ചെ​യ്യാ​തെ നി​യ​മി​ക്കാ​ൻ പ​റ്റി​ല്ല എ​ന്ന് മെ​ഡി​ക്ക​ൽ ഓ​ഫി​സ​ർ പ​റ​ഞ്ഞ​ത്.

12 വ​ർ​ഷ​മാ​യി ഇ​വി​ടെ ജോ​ലി ചെ​യ്തി​രു​ന്ന ന​ഴ്സാ​ണി​വ​ർ. പ​ല​കാ​ര്യ​ങ്ങ​ളും പ​റ​ഞ്ഞ് ഇ​വ​രെ ന​ട​ത്തി​പ്പി​ക്കു​ന്ന​ത് ക​ണ്ട​പ്പോ​ൾ ഇ​ട​പെ​ട്ട​താ​ണ്. അ​വ​ർ​ക്ക് മ​തി​യാ​യ യോ​ഗ്യ​ത​യു​ണ്ട്. ഇ​പ്പോ​ൾ യോ​ഗ്യ​ത​യി​ല്ല എ​ന്നും മ​റ്റും പ​റ​യു​ന്ന​ത് രാ​ഷ്ട്രീ​യ താ​ൽ​പ​ര്യ​മാ​ണ്. 9.15 മു​ത​ൽ 12.30വ​രെ ഞാ​നും മ​റ്റ് പ്ര​തി​നി​ധി​ക​ളും മെ​ഡി​ക്ക​ൽ ഓ​ഫി​സ​റെ കാ​ത്തി​രു​ന്നു. പ​ല​ത​വ​ണ വി​ളി​ക്കു​ക​യും ചെ​യ്തു. എ​ടു​ക്കാ​താ​യ​പ്പോ​ൾ മ​റ്റൊ​രു ഫോ​ണി​ൽ​നി​ന്ന് വി​ളി​ച്ച​പ്പോ​ഴാ​ണ​റി​യു​ന്ന​ത് അവധിയാണെ​ന്ന്. ഇ​ത​റി​ഞ്ഞ​പ്പോ​ഴാ​ണ് ഓ​ഫി​സ് പൂ​ട്ടി​യ​തെന്നും പ്ര​സി​ഡ​ന്റ് പ​റ​ഞ്ഞു.

ഭീ​ഷ​ണി​പ്പെ​ടു​ത്തി -മെ​ഡി​ക്ക​ൽ ഓ​ഫി​സ​ർ

കാ​സ​ർ​കോ​ട്​: ​ഗ​വ​ൺ​മെ​ന്റ് ഉത്തരവ് പ്ര​കാ​​രം പാ​ലി​യേ​റ്റി​വ് ന​ഴ്സി​ന്റെ കാ​ലാ​വ​ധി വ​ർ​ഷാ​വ​ർ​ഷം പു​തു​ക്ക​ലാ​ണ് പ​തി​വ്. പ​ന​ത്ത​ടി കു​ടും​ബാ​രോ​ഗ്യ​കേ​ന്ദ്ര​ത്തി​ലെ പാ​ലി​യേ​റ്റി​വ് ന​ഴ്സ് ഒ​ന്ന​ര​മാ​സ​മാ​യി അവധിയിലായി​രു​ന്നു. ക​രാ​ർ വ്യ​വ​സ്ഥ​യി​ലു​ള്ള ഇ​വ​രു​ടെ നി​യ​മ​നം സം​ബ​ന്ധി​ച്ച് ച​ർ​ച്ച ചെ​യ്യാ​നും ക​രാ​ർ കാ​ലാ​വ​ധി നീ​ട്ടാ​നും പി.​എം.​സി യോ​ഗം ക​ഴി​ഞ്ഞ ശ​നി​യാ​ഴ്ച ചേ​ർ​ന്നി​രു​ന്നു. ഈ ​യോ​ഗ​ത്തി​ൽ പ​ഞ്ചാ​യ​ത്ത് ഭ​ര​ണ​സ​മി​തി​യു​ടെ ഭൂ​രി​പ​ക്ഷം ഉ​പ​യോ​ഗി​ച്ച് ക​രാ​ർ പു​തു​ക്കി.

ഈ നഴ്സ് ഒ​ന്ന​ര​മാ​സം മു​മ്പ് ആശുപത്രിയിൽ പ്ര​ശ്ന​മു​ണ്ടാ​ക്കി​യി​രു​ന്നു. ഇ​ത് ചോ​ദ്യം​ചെ​യ്ത​പ്പോ​ൾ എ​നി​ക്കെ​തി​രെ ആ​ത്മ​ഹ​ത്യ​ക്കു​റി​പ്പ് എ​ഴു​തി അ​മി​ത ഡോ​സി​ൽ മ​രു​ന്ന് ക​ഴി​ച്ച് ആ​ത്മ​ഹ​ത്യ​ക്ക് ശ്ര​മി​ച്ചു. അ​വ​ർ സൈ​ക്യാ​ട്രി​ക് പേ​ഷ്യ​ന്റാ​ണ്.

പി.​എം.​സി യോ​ഗ​ത്തി​ൽ ഫി​റ്റ്ന​സ് സ​ർ​ട്ടി​ഫി​ക്ക​റ്റ് ഹാ​ജ​രാ​ക്കാ​ൻ പ​റ​ഞ്ഞ​പ്പോ​ൾ സാധുവല്ലാത്ത മെ​ഡി​ക്ക​ൽ സ​ർ​ട്ടി​ഫി​ക്ക​റ്റാ​ണ് ന​ൽ​കി​യ​ത്. അ​തി​ൽ പ​റ​യു​ന്ന​ത് കൃ​ത്യ​മാ​യി മ​രു​ന്ന് ക​ഴി​ച്ചാ​ൽ ഇ​വ​രു​ടെ അ​സു​ഖം മാ​റു​മെ​ന്നാ​ണ്. എ​ന്ത് ധൈ​ര്യ​ത്തി​ലാ​ണ് ഞാ​ന​വ​ർ​ക്ക് നി​യ​മ​നം പു​തു​ക്കി​ന​ൽ​കു​ക? ഇ​നി​യ​വ​ർ എ​ന്തെ​ങ്കി​ലും ചെ​യ്താ​ൽ മെ​ഡി​ക്ക​ൽ ഓ​ഫി​സ​ർ എ​ന്ന​നി​ല​ക്ക് എ​നി​ക്കാ​യി​രി​ക്കി​ല്ലെ അ​തി​ന്റെ ഉ​ത്ത​ര​വാ​ദി​ത്തം? ഇ​തൊ​ന്നും പ​ഞ്ചാ​യ​ത്ത് ഭ​ര​ണ​സ​മി​തി മ​ന​സ്സി​ലാ​ക്കു​ന്നി​ല്ല. ഞങ്ങൾ പ​റ​യു​ന്ന​ത് ഡോ​ക്ട​ർ കേ​ട്ടാ​ൽ മ​തി​യെ​ന്നും ഈ ​ന​ഴ്സി​നെ ഇ​വി​ടെ​ത​ന്നെ നി​യ​മി​ക്ക​ണ​മെ​ന്നും അ​വ​ർ എ​ന്തെ​ങ്കി​ലും പ്ര​ശ്ന​മു​ണ്ടാ​ക്കി​യാ​ൽ അ​തി​ന്റെ ഉ​ത്ത​ര​വാ​ദി​ത്തം ഏ​റ്റെ​ടു​ക്കാ​മെ​ന്നു​മാ​ണ് ഭ​ര​ണ​സ​മി​തി പ​റ​യു​ന്ന​ത്. എ​ന്നെ ഭീ​ഷ​ണി​പ്പെ​ടു​ത്തു​ക​യും കൃ​ത്യ​നി​ർ​വ​ഹ​ണം ത​ട​സ്സ​പ്പെ​ടു​ത്തുകയും ചെയ്തതിന് ഞാ​നാ​രോ​ടാ​ണ് പ​രാ​തി പ​റ​യേ​ണ്ട​ത്.

ബു​ധ​നാ​ഴ്ച രാ​വി​ലെ ഓ​ഫി​സി​ലെ​ത്തി​യ​പ്പോ​ൾ കു​ത്തി​വെ​പ്പ് ദി​വ​സ​മാ​യ​തു​കൊ​ണ്ട് ഞാ​ൻ ജോ​ലി​യി​ലാ​യി​രു​ന്നു. അ​പ്പോ​ൾ നി​ർ​ത്താ​തെ എ​ന്റെ ഫോ​ണി​ൽ വി​ളി​ക്കു​ക​യും ഒ​പ്പി​ടാ​ൻ ഭീ​ഷ​ണി​പ്പെ​ടു​ത്തു​ക​യു​മാ​യി​രു​ന്നു. ഞാ​ൻ ഇ​തേ​പ്പ​റ്റി എ​ന്റെ മേ​ല​ധി​കാ​രി​ക​ളു​മാ​യി ച​ർ​ച്ച ചെ​യ്യു​മ്പോ​ഴാ​ണ് പ​ഞ്ചാ​യ​ത്ത് പ്ര​സി​ഡ​ന്റി​ന്റെ നേ​തൃ​ത്വ​ത്തി​ൽ ഓ​ഫി​സ് പൂ​ട്ടി​​പ്പോ​യ​ത്. ഓ​ഫി​സ് പൂ​ട്ടി​യ​തി​നെക്കുറിച്ച് പ​ഞ്ചാ​യ​ത്തി​ൽ ചോ​ദി​ച്ച​പ്പോ​ൾ ഞാ​ൻ അ​വി​ടെ പോ​യാ​ലേ താ​ക്കോ​ൽ ത​രൂ എ​ന്നാ​ണ് പ​റ​ഞ്ഞ​ത്. ഇ​തോടെയാണ് പൊ​ലീ​സി​ൽ അ​റി​യി​ച്ചത്. പി​ന്നീ​ട് പ​ഞ്ചാ​യ​ത്ത് പ്ര​സി​ഡ​ന്റ് വ​ന്ന് തു​റ​ക്കു​ക​യായി​രു​ന്നു -ഡോ. ​ഷ​ബാ​ന ‘മാ​ധ്യ​മ’​ത്തോ​ട് പ​റ​ഞ്ഞു.