കലക്ടറേറ്റിനു മുന്നിൽ രാത്രിയിലും ആദിവാസികളുടെ പ്രതിഷേധം

കാസർകോട്​: കൃഷിഭൂമി അനുവദിക്കണമെന്നാവശ്യപ്പെട്ട് കലക്​ടറേറ്റിനു മുന്നിൽ രാത്രിയിലും ആദിവാസികളുടെ പ്രതിഷേധം. 'ആശിക്കും ഭൂമി ആദിവാസിക്ക്' പദ്ധതി പ്രകാരം ജില്ലയിൽ കണ്ടെത്തിയ ഭൂമി ഉടൻ ആദിവാസികൾക്ക് വിതരണം ചെയ്യണമെന്നാവശ്യപ്പെട്ടാണ് ഗോത്രജനത കൂട്ടായ്മയുടെ നേതൃത്വത്തിൽ പ്രതിഷേധിച്ചത്​. വ്യാഴാഴ്​ച വൈകീട്ട്​ എത്തിയ പ്രതിഷേധക്കാർ ട്രൈബൽ ഓഫിസറുടെ ഉറപ്പിൽ രാത്രി ഏഴരയോടെയാണ്​ പിരിഞ്ഞുപോയത്​.

സ്ത്രീകളും കുട്ടികളും ഉൾപ്പെടെ 200ഓളം പേരാണ്​ സമരത്തിനെത്തിയത്​.

പദ്ധതി പ്രകാരം 150 ഏക്കർ ഭൂമിയാണ് ജില്ലയിൽ കണ്ടെത്തിയത്. ഈ ഭൂമിയിൽ നിന്ന് ഒരേക്കർ വീതം കൃഷിഭൂമി വിതരണം ചെയ്യണമെന്നാണ് ഗോത്രജന കൂട്ടായ്മയുടെ ആവശ്യം. അപേക്ഷ നൽകിയ മുഴുവൻ ആളുകൾക്കും ഒരേക്കർ ഭൂമി വീതം വിതരണം ചെയ്യാതെ സമരത്തിൽനിന്ന് പിന്നോട്ടില്ലെന്ന് ഗോത്രജനത കൂട്ടായ്മ നേതാവ് എം.കൃഷ്ണൻ പരപ്പച്ചാൽ പറഞ്ഞു.