നഗരസഭയോടാണ്; വനിത വിശ്രമകേന്ദ്രം തുറക്കുന്നില്ലേ?

കാ​സ​ർ​കോ​ട്: ന​ഗ​ര​ത്തി​ലെ​ത്തു​ന്ന സ്ത്രീ​ക​ളു​ടെ​യും കു​ഞ്ഞു​ങ്ങ​ളു​ടെയും പ്ര​ശ്ന​ങ്ങ​ൾ മു​ൻ നി​ർ​ത്തി കാസർകോട് പു​തി​യ ബ​സ് സ്റ്റാ​ൻ​ഡി​ൽ ന​ഗ​ര​സ​ഭ നി​ർ​മി​ച്ച വ​നി​ത വി​ശ്ര​മ​കേ​ന്ദ്രം തു​റ​ക്കു​ന്നി​ല്ലേ? യാ​ത്ര​ക്കാ​രാ​യ സ്ത്രീ​ക​ളും കു​ട്ടി​ക​ളും ചോ​ദി​ക്കു​ന്ന ചോ​ദ്യ​മി​താ​ണ്. ഡി​സം​ബ​ർ 31ന്‌ ​രാ​ജ്‌​മോ​ഹ​ൻ ഉ​ണ്ണി​ത്താ​ൻ എം.​പി. ഉ​ദ്‌​ഘാ​ട​നം ചെ​യ്‌​ത വി​ശ്രമ കേ​ന്ദ്രം ഉ​ദ്ഘാ​ട​നം ക​ഴി​ഞ്ഞ് മാ​സം പ​കു​തി പി​ന്നി​ട്ടി​ട്ടും സ്ത്രീ​ക​ൾക്ക് എ​ത്തിനോ​ക്കാ​ൻ അ​വ​സ​രം ല​ഭി​ച്ചി​ട്ടി​ല്ല.

‘ടേ​ക്ക്‌ എ ​ബ്രേ​ക്ക്‌’ പ​ദ്ധ​തി പ്ര​കാ​രം നി​ർ​മി​ച്ച വ​നി​ത വി​ശ്ര​മ കേ​ന്ദ്രം സ്ത്രീ​ക​ൾ​ക്ക് ഗൃ​ഹ​സ​മാ​ന​മാ​യ അ​ന്ത​രീ​ക്ഷ​മാ​ണ് ഒ​രു​ക്കിക്കൊ​ടു​ക്കേ​ണ്ട​ത്. വി​ശ്ര​മത്തി​നു പു​റ​മെ, ല​ഘു ഭ​ക്ഷ​ണം ക​ഴി​ക്കാ​നും ​പ്രാ​ഥ​മി​കാ​വ​ശ്യ​ത്തി​നും കു​ഞ്ഞു​ങ്ങ​ളെ മു​ല​യൂ​ട്ടാ​നും കൂ​ടി​യാ​ണ് കേ​ന്ദ്രം നി​ർ​മി​ച്ച​ത്. 18.88 ല​ക്ഷം രൂ​പ​യാ​ണ് നി​ർ​മാ​ണച്ചെ​ല​വ്. അ​ടി​സ്ഥാ​ന സൗ​ക​ര്യം ഒ​രു​ങ്ങും മു​മ്പേ ഉ​ദ്ഘാ​ട​നം നി​ർ​വ​ഹി​ക്കു​ക​യാ​യി​രു​ന്നു​വെ​ന്നാ​ണ് ആ​ക്ഷേ​പം. പെ​യി​ന്റി​ങ് ന​ട​ത്തി കാ​ഴ്ച വ​സ്തു​വാ​ക്കി​യെ​ന്ന​ല്ലാ​തെ അ​ക​ത്ത് സൗ​ക​ര്യ​ങ്ങ​ൾ ഏ​ർ​പ്പെ​ടു​ത്തി​യി​ല്ല. ഇ​രി​ക്കാ​നു​ള്ള സൗ​ക​ര്യം പോ​ലു​മി​ല്ല. വൈ​ദ്യു​തി ബ​ന്ധം ല​ഭി​ച്ചി​ല്ല. നാ​പ്‌​കി​ൻ വെ​ൻ​ഡി​ങ്‌ മെ​ഷീ​ൻ ഇ​തോ​ടൊ​പ്പം ഉ​ണ്ടാ​കു​മെ​ന്ന് പ​ദ്ധ​തി​യി​ൽ പ​റ​ഞ്ഞി​ട്ടു​ണ്ട്. കു​ടി​വെ​ള്ള​ത്തി​നു​ള്ള സൗ​ക​ര്യം പോ​ലു​മി​ല്ല.