ബഹുമാനപ്പെട്ട മുഖ്യമന്ത്രീ, കവളപ്പാറയിൽ എവിടെയാണ് സർക്കാർ​ പുനരധിവാസം ഉറപ്പാക്കിയത്?

മലപ്പുറം: രാജമല പെട്ടിമുടി ദുരന്ത സ്​ഥലം സന്ദർശിക്കുന്നതിനിടെ കഴിഞ്ഞ വർഷം മണ്ണിടിച്ചിലുണ്ടായ കവളപ്പാറയിലും പുത്തുമലയിലും പുനരധിവാസം ഉറപ്പാക്കി എന്ന മുഖ്യമന്ത്രി പിണറായി വിജയന്‍റെ പ്രസ്​താവന കേട്ട്​ അന്തം വിട്ടിരിക്കുകയാണ്​ കവളപ്പാറക്കാർ. പോത്തുകല്‍ അങ്ങാടിയിലെ ഓഡിറ്റോറിയത്തില്‍ ഒരുക്കിയ ദുരിതാശ്വാസ ക്യാമ്പിൽ പട്ടികവര്‍ഗ കോളനിയിലെ 22 കുടുംബങ്ങളിലായി 60 പേർ കഴിയാൻ തുടങ്ങിയിട്ട്​ വർഷം ഒന്നായി. ഇവരെയാണ്​ പുനരധിവസിപ്പിച്ചുവെന്ന്​ മുഖ്യമന്ത്രി പറഞ്ഞത്​.

ദുരന്തം കഴിഞ്ഞ്​ ഒരു വർഷമായിട്ടും മണ്ണ്​ വീണ്​ ജീവിതം ഇരുളിലായ ഒരാൾക്ക്​ പോലും വീട്​ നിർമിച്ചു നൽകാൻ സർക്കാറിനായിട്ടില്ല. 2019 ആഗസ്റ്റ് എട്ടിന് രാത്രി ഏഴരയോടെയാണ് പോത്തുകല്‍ പഞ്ചായത്തിലെ കവളപ്പാറ മുത്തപ്പന്‍കുന്ന് അടർന്നു വീണത്​. 42 വീടുകൾ അടയാളം പോലും ബാക്കിയാക്കാതെ മണ്ണിനടിയിലായി. 59 പേർ ജീവനോടെ പച്ച മണ്ണിൽ അടക്കപ്പെട്ടു. ദുരിതാശ്വാസ ക്യാമ്പിൽ കഴിയുന്ന ആദിവാസികൾ അടക്കം 67 കുടുംബങ്ങള്‍ക്ക് വീടും സ്​ഥലവും വാങ്ങാൻ 10 ലക്ഷം രൂപ വീതം അനുവദിച്ചത്​ ഏതാനും ദിവസങ്ങൾ മുമ്പ്​ മാത്രമാണ്​​. അതിന്​ തന്നെ കവളപ്പാറക്കാർ കോടതി കയറേണ്ടി വന്നു. അനുവദിച്ച തുക കൈയിൽ കിട്ടാൻ ഇനിയും എത്ര നാൾ വേണ്ടി വരുമെന്ന്​ അവർക്കറിയില്ല.

വീടുകൾ വാസയോഗ്യമല്ലാതായ 87 കുടുംബങ്ങൾ അടക്കം മൊത്തം 154 കുടുംബങ്ങളാണ്​ കവളപ്പാറയിൽ ദുരന്തത്തിനിരയായത്​​. ഇവരെ പുനരധിവസിപ്പിക്കാൻ പോത്തുകൽ പഞ്ചായത്തിൽ അന്നത്തെ കലക്​ടർ ജാഫർ മലികി​ന്‍റെ നേതൃത്വത്തിൽ ജില്ല ഭരണകൂടം ഒമ്പത്​ ഏക്കർ ഭൂമി കണ്ടെത്തിയിരുന്നു. സെൻറിന്​ 30,000 രൂപ വീതം 2.7 കോടി രൂപ മുഖ്യമന്ത്രിയുടെ ദുരിതാശ്വാസ നിധിയിൽ നിന്നും വീടൊന്നിന്​ 1,01,900 രൂപ വീതം 68,27,300 രൂപ സംസ്​ഥാന ​ദുരന്ത പ്രതികരണ നിധിയിൽ നിന്നും​ അനുവദിക്കുകയും ചെയ്​തു.​ എന്നാൽ ജാഫർ മലികിനെതിരെ പി.വി അൻവർ എം.എൽ.എ രംഗത്തു വന്നതോടെ സർക്കാർ ഇത്​ റദ്ദാക്കി.

പകരം സ്​ഥലം കണ്ടെത്താൻ വീണ്ടും വിജ്​ഞാപനം ഇറക്കിയെങ്കിലും അതും നടന്നില്ല. ഏറ്റവും ഒടുവിലാണിപ്പോൾ സ്​ഥലം വാങ്ങാൻ ​10 ലക്ഷം രൂപ അനുവദിച്ചിരിക്കുന്നത്​. അപ്പോഴേക്കും വർഷമൊന്നു കഴിഞ്ഞു. ഇതിന്​ പുറമെ 2018ൽ നിലമ്പൂ​ർ, ഏറനാട്​ താലൂക്കുകളിൽ ദുരന്തമുണ്ടായ മതിൽമൂല, ചെട്ടിയംപാറ, ഓടക്കയം എന്നിവിടങ്ങളിലും പുനരധിവാസം രണ്ട്​ വർഷത്തിന്​ ശേഷവും പാതി വഴിയിലാണ്​.അതേസമയം, സർക്കാർ പുനരധിവസിപ്പിച്ചില്ലെങ്കിലും സുമനസുകളുടെ സഹായത്തോടെ നിലമ്പൂർ മേഖലയിൽ നിരവധി കുടുംബങ്ങൾക്ക്​ വീടും സ്​ഥലവും ലഭിച്ചിട്ടുണ്ട്​. ഇതാണോ മുഖ്യമന്ത്രി ഉദ്ദേശിച്ച പുനരധിവാസം എന്നാണ്​ കവളപ്പാറക്കാർ ചോദിക്കുന്നത്​.