'ഈ കലക്​ടറെ വെച്ച്​ ഒരു പുണ്ണാക്കും നടക്കില്ല' -കൊല്ലം മുൻ കലക്​ടർക്കെതിരെ ഗണേഷ്​ കുമാർ; ആളില്ലാത്ത പോസ്റ്റിൽ ഗോളടിക്കുന്നു​വെന്ന്​ അബ്​ദുൽ നാസർ

കൊല്ലം: സ്​ഥലം മാറിപ്പോയ കൊല്ലം ജില്ല കലക്​ടർ ബി. അബ്​ദുന്നാസറിനെതിരെ രൂക്ഷ വിമർശനവുമായി കേരള കോൺഗ്രസ്​ ബി. നേതാവ്​ കെ.ബി. ഗണേഷ്​ കുമാർ എം.എൽ.എ. ഈ കലക്​ടറെയും വെച്ച്​ ഒരു പുണ്ണാക്കും നടക്കില്ലെന്നും രാത്രി പന്ത്രണ്ടരക്ക്​ ഫേസ്​ബുക്കിലിടുന്നതല്ലാതെ ഒരുകുന്തവും നടത്താറില്ലെന്നും ഗണേഷ്​ പറഞ്ഞു. യാതൊരു തരത്തിലും സഹകരിക്കില്ലെന്ന കലക്​ടറുടെ നിഷേധാത്മക നിലപാടാണ്​ പട്ടയം വിതരണത്തിന്​ തടസ്സമായതെന്നും പത്തനാപുരത്ത്​ ഒരു പൊതുപരിപാടിയിൽ പ്രസംഗിക്കവെ അ​ദ്ദേഹം ആരോപിച്ചു.

'ജനങ്ങളോട്​ നിഷേധാത്മകമായി പെരുമാറുന്ന കലക്​ടർ വിളിക്കുന്ന യോഗങ്ങളിൽ ഒരു പ്രയോജനവുമില്ലാത്തതിനാൽ ഞാൻ പ​ങ്കെടുക്കാറുണ്ടായിരുന്നില്ല. ഫേസ്​ബുക്കിൽ രാത്രി പന്ത്രണ്ടര മണിക്ക്​ പോസ്റ്റിടുന്നതല്ലാതെ ഒന്നും ചെയ്യാറില്ല. ഈ കലക്​ടറെയും വെച്ച്​ ഒരു പുണ്ണാക്കും നടക്കില്ല. ഓട്ടയുള്ള കലത്തിൽ വെള്ളം കോരിയിട്ട്​ കാര്യമുണ്ടോ? ഒാട്ടയുള്ള കലം മാറ്റി ​വേറൊരു കലം വെച്ചാൽ വെള്ളം കോരാമെന്ന്​ വിചാരിച്ചു കാത്തിരുന്നു. കലക്​ടറേറ്റിൽനിന്ന്​ വിളിച്ച്​ യോഗത്തിന്​ പ​ങ്കെടുക്കണമെന്ന്​ പറഞ്ഞാൽ 'ആ' എന്നു പറയും. വെറും പബ്ലിസിറ്റി മാത്രം ആഗ്രഹിച്ച്​ ചെയ്യുന്നയാളോട്​ സഹകരിക്കേണ്ടതില്ലെന്ന്​ ത​ീരുമനിച്ചതാണ്​' -ഗണേഷ്​ പറഞ്ഞു.

അതേസമയം, എം.എൽ.എക്ക്​ പരോക്ഷ മറുപടിയുമായി അബ്​ദുന്നാസറും രംഗത്തെത്തി. 'ഇതുവരെ മിണ്ടാട്ടം മുട്ടിപ്പോയതാണോ, അതോ ആളില്ലാത്ത പോസ്​റ്റിൽ ചുമ്മാ ഒരു ഗോൾ അടിക്കാമെന്ന്​ വെച്ചതോ..? കൊള്ളാം നേതാവേ..' എന്നായിരുന്നു അദ്ദേഹം ഫേസ്​ബുക്കിൽ കുറിച്ചത്​. ഈ പോസ്റ്റ്​ പിന്നീട്​ നീക്കം ചെയ്​തു.

എം.എൽ.എയുടെ പ്രസംഗത്തിനെതിരെ സമൂഹമാധ്യമങ്ങളിൽ വൻ വിമർശനമാണ്​ ഉയരുന്നത്​. അതേസമയം, അനുകൂലിച്ചും ചിലർ രംഗത്തുണ്ട്​. ഏറെ ജനകീയനായിരുന്ന ബി. ​അ​ബ്​​ദു​ല്‍ നാ​സ​ര്‍ ര​ണ്ടു വ​ര്‍ഷ​ക്കാ​ലമാണ്​ ജില്ലയിൽ കലക്​ടറായി സേവനമനുഷ്​ടിച്ചത്​. നിലവിൽ മ​ഹാ​ത്മ ഗാ​ന്ധി ദേ​ശീ​യ തൊ​ഴി​ലു​റ​പ്പ് പ​ദ്ധ​തി​യു​ടെ ഡ​യ​റ​ക്ട​റാ​ണ്.