ഇ.പി. ജയരാജനെ സി.പി.എം ബലിയാടാക്കിയെന്ന് കെ.സി. വേണുഗോപാൽ

ആലപ്പുഴ: എൽ.ഡി.എഫ്​ കൺവീനർ സ്ഥാനത്തു നിന്ന് ഇ.പി. ജയരാജനെ നീക്കിയ നടപടി സി.പി.എമ്മിന്‍റെ കൈകഴുകലാണെന്ന്​ എ.ഐ.സി.സി ജനറൽ ​സെക്രട്ടറി കെ.സി. വേണുഗോപാൽ എം.പി. മുഖ്യമന്ത്രിയുടെ മൂക്കിന് താഴെ നടന്ന കാര്യങ്ങൾക്ക് അന്നൊന്നും ചെയ്യാതെ, ഇപ്പോൾ സ്വീകരിച്ച നടപടി ജനങ്ങളു​​ടെ​ കണ്ണിൽ പൊടിയിടാനാണെന്ന് അദ്ദേഹം മാധ്യമപ്രവർത്തകരോട് പറഞ്ഞു.

യഥാർഥ കുറ്റം ചെയ്തവരെ മറച്ചുനിർത്തി ജയരാജിനെ സി.പി.എം ബലിയാടാക്കിയെന്നും വേണുഗോപാൽ ആരോപിച്ചു.

ഭരണകക്ഷി എം.എൽ.എ എസ്​.പി ഓഫിസിന്​ മുന്നിൽ സമരം നടത്തുന്ന സംഭവത്തോ​ടെ സർക്കാറിന്​ തുടരാനുള്ള ധാർമികത നഷ്ടപ്പെട്ടു. എ.ഡി.ജി.പിക്കെതിരായ ആരോപണം ഗുരുതരമാണ്​. എം.എൽ.എ പറഞ്ഞത്​ തെറ്റാണെങ്കിൽ അത്​ തെറ്റാണെന്ന്​ പറയാൻ ആർജവം കാണിക്കണമെന്നും കെ.സി. വേണുഗോപാൽ പറഞ്ഞു.