മദ്യനയം: സർക്കാറിനെതിരെ കെ.സി.ബി.സി; ചെങ്ങന്നൂരിൽ കാണാമെന്ന് മുന്നറിയിപ്പ്

കോഴിക്കോട്: സംസ്​ഥാന സർക്കാറി​​​െൻറ പുതിയ മദ്യനയം മറ്റൊരു ഒാഖി ദുരന്തമാണെന്ന്​ കെ.സി.ബി.സി മദ്യവിരുദ്ധ സമിതി ചെയർമാൻ കൂടിയായ താമരശ്ശേരി രൂപത ബിഷപ്​ മാര്‍ റെമിജിയോസ് ഇഞ്ചനാനിയിൽ. സ്വകാര്യ വാർത്ത ചാനലിനോടാണ്​ അദ്ദേഹം സർക്കാറിനെതിരെ തുറന്നടിച്ചത്​. 

കൊടുംവഞ്ചനയാണ്​ ഇൗ നയം. തെരഞ്ഞെടുപ്പ് പ്രകടന പത്രികയോടെങ്കിലും സര്‍ക്കാര്‍ ആത്മാർഥത കാണിക്കണം. ചെങ്ങന്നൂര്‍ ഉപതെരഞ്ഞെടുപ്പില്‍ മദ്യനയത്തിനെതിരായ വികാരം പ്രതിഫലിക്കുമെന്ന് ഇഞ്ചനാനിയില്‍ മുന്നറിയിപ്പ്​ നൽകി. ‘‘ചെങ്ങന്നൂരിൽ സർക്കാറിനെതിരെ പ്രചാരണത്തിനിറങ്ങും. മദ്യനയത്തിനെതിരായ ഹിതപരി​േശാധനയായി ഉപതെരഞ്ഞെടുപ്പ്​ മാറും. അവിടത്തെ ജനങ്ങളെ ബോധ്യപ്പെടുത്താൻ മദ്യവിരുദ്ധ പ്രസ്​ഥാനം ശക്തമായി മുന്നിലുണ്ടാകും’’ -ബിഷപ്​ പറഞ്ഞു. മദ്യനയത്തിനും സർക്കാറിനും എതിരെ വോട്ടുചെയ്യാൻ ആഹ്വാനം ​െചയ്യു​ം. ഏപ്രില്‍ രണ്ടിന് സംസ്ഥാന വ്യാപകമായി മദ്യവിരുദ്ധ പ്രക്ഷോഭം സംഘടിപ്പിക്കുമെന്നും​ അദ്ദേഹം പറഞ്ഞു.

സിനിമ താരങ്ങളെ ഉള്‍പ്പെടെ അണിനിരത്തി നല്‍കിയ വാഗ്ദാനങ്ങളുടെ ലംഘനമാണ് നടപ്പാക്കുന്നത്. മദ്യവര്‍ജനം എന്ന പൊള്ളയായ വാഗ്ദാനം നല്‍കി വഞ്ചിക്കുകയാണ് സര്‍ക്കാര്‍ ചെയ്തത്​. മദ്യം പോലുള്ള സാമൂഹിക തിന്മകള്‍ക്കെതിരെ പോരാടുന്ന സാമൂഹിക പ്രവര്‍ത്തകരുടെ വീര്യം തകര്‍ക്കുന്ന സർക്കാർ ജനങ്ങളെ കൊഞ്ഞനംകുത്തുകയാണ്​. മുറുക്കാൻ കടപോലെ മദ്യശാലകൾ തുറന്ന്​​ ഏതു വിധേനയും പണമുണ്ടാക്കാനാണ്​ ശ്രമം. പാവപ്പെട്ട തൊഴിലാളികളെയാണ്​ സർക്കാർ മദ്യം കുടിപ്പിച്ച്​​ കൊല്ലുന്നത്​ -ഇഞ്ചനാനിയിൽ പറഞ്ഞു.

ചെങ്ങന്നൂരിൽ മദ്യനയം മുഖ്യ പ്രചാരണവിഷയമാക്കും -കെ.സി.ബി.സി
േകാട്ടയം: സർക്കാറി​​​െൻറ പുതിയ മദ്യനയം ചെങ്ങന്നൂർ ഉപതെരഞ്ഞെടുപ്പിൽ മുഖ്യ പ്രചാരണവിഷമാക്കുമെന്ന്​ കെ.സി.ബി.സി മദ്യവിരുദ്ധ സമിതി. മനുഷ്യജീവന് വിലകൽപിക്കുന്ന മുഴുവൻ സമുദായങ്ങളെയും സാമൂഹിക സംഘടനകളെയും  പ്രചാരണ-പ്രതികരണ പരിപാടികളിൽ പങ്കാളികളാക്കും. മണ്ഡലത്തിലുടനീളം പ്രചാരണജാഥകളും കവല യോഗങ്ങളും കൺവെൻഷനുകളും ഭവനസന്ദർശനങ്ങളും നടത്തും. സ്ഥാനാർഥി ഇല്ലാത്ത തെരഞ്ഞെടുപ്പ് പ്രചാരണപരിപാടികളായിരിക്കും നടത്തുക. 

സുപ്രീംകോടതി വിധിയുടെ മറവിൽ സംസ്ഥാനത്താകെ മദ്യപ്രളയം സൃഷ്​ടിക്കാനുള്ള ഇടതു സർക്കാറി​​​െൻറ ജനവിരുദ്ധ നയത്തിനെതിരെ ശക്തമായ പ്രക്ഷോഭസമരപരിപാടികൾ സംഘടിപ്പിക്കും.  21ന് രാവിലെ 11ന്​ കെ.സി.ബി.സി മദ്യവിരുദ്ധ സമിതിയുടെയും കേരള മദ്യവിരുദ്ധ ഏകോപന സമിതിയുടെയും നേതൃത്വത്തിൽ പുതിയ നയം കത്തിക്കും. ഏപ്രിൽ രണ്ടിന്​ രാവിലെ 10മുതൽ വൈകീട്ട്​ നാലുവരെ സാമുദായികനേതാക്കളും ബിഷപ്പുമാരും വി.എം. സുധീരനും ഉൾപ്പെടെയുള്ളവർ പങ്കെടുക്കുന്ന ഏകദിനസമ്മേളനം നടക്കും.  

കെ.സി.ബി.സി മദ്യവിരുദ്ധ കമീഷൻ ചെയർമാൻ ബിഷപ് റമജിയൂസ്​ ഇഞ്ചനാനിയിൽ അധ്യക്ഷത വഹിച്ചു. ബിഷപ് ജോഷ്വ മാര്‍ ഇഗ്​നാത്തിയോസ്, ബിഷപ് ഡോ. ക്രിസ്​തുദാസ്​ ആർ., ഫാ. ജേക്കബ് വെള്ളമരുതുങ്കൽ, അഡ്വ. ചാർലി പോൾ തുടങ്ങിയവർ സംസാരിച്ചു.