ശബരിപാതക്ക്​ പകുതി ചെലവ്​ വഹിക്കാമെന്ന്​ കേരളം; മുഖ്യമന്ത്രിയുടെ കത്ത് കെ.വി​ തോമസ് കൈമാറി

ന്യൂഡൽഹി: അങ്കമാലി-എരുമേലി ശബരി പാത നിർമാണ ചെലവിന്‍റെ പകുതി കേരളം വഹിക്കാമെന്ന്​ സംസ്ഥാന സർക്കാർ കേന്ദ്രത്തെ അറിയിച്ചു. മുഖ്യമന്ത്രി പിണറായി വിജയന്‍റെ ഇതുസംബന്ധിച്ച കത്ത്​ ഡൽഹിയിലെ പ്രത്യേക പ്രതിനിധി കെ.വി തോമസ്​ റെയിൽവേ മന്ത്രി അശ്വിനി വൈഷ്ണവിന്​ കൈമാറി.

നിർദിഷ്ട ശബരി പാതയുടെ അലൈൻമെന്‍റിൽ മാറ്റം വരുത്താൻ റെയിൽവേ ആലോചിക്കുന്നതായി മന്ത്രി അറിയിച്ചുവെന്ന്​ കെ.വി തോമസ്​ വാർത്തസമ്മേളനത്തിൽ പറഞ്ഞു. ബദൽ പാതാ പഠനം പൂർത്തിയായാൽ മുൻഗണന നൽകി പദ്ധതി പരിഗണിക്കും. സിൽവർ ലൈൻ പദ്ധതി വേഗത്തിലാക്കണമെന്ന ആവശ്യം ഉന്നയിച്ചപ്പോൾ, കേരളത്തിൽ പാത ഇരട്ടിപ്പിക്കൽ ഇഴയുന്ന സാഹചര്യം ഉയർത്തിക്കാട്ടുകയാണ്​ മന്ത്രി ചെയ്തത്​. പാതയിരട്ടിപ്പിക്കൽ വേഗത്തിൽ പൂർത്തിയാകുന്നതിന് ആവശ്യമായ ഇടങ്ങളിൽ സംസ്ഥാന സർക്കാരിന്റെ ഇടപെടൽ ഉണ്ടാകണമെന്ന്​ മന്ത്രി നിർദ്ദേശിച്ചു.

നേമം കോച്ചിംഗ് ടെർമിനൽ പ്രോജക്ട് നടപ്പിലാക്കണമെന്ന്​ കൂടിക്കാഴ്ചയിൽ ആവശ്യപ്പെട്ടിട്ടുണ്ട്​. കാഞ്ഞങ്ങാട്-പാണത്തൂർ- കണിയൂർ ന്യൂ ലൈൻ പ്രോജക്ടിന്​ ചെലവിന്‍റെ പകുതി സംസ്ഥാന സർക്കാർ വഹിക്കാമെന്ന്​ അറിയിച്ചു. കേരളം സന്ദർശിച്ച്​ മുഖ്യമന്ത്രിയുമായി തുടർചർച്ച നടത്തുമെന്ന്​ അശ്വിനി വൈഷ്ണവ്​ അറിയിച്ചു.