ലക്ഷദ്വീപിന്​ പിന്തുണയുമായി കേരള കാത്തലിക്​ യൂത്ത്​ മൂവ്​മെൻറ്; പിന്നാലെ വധഭീഷണിയും വ്യാജ അക്കൗണ്ടുകളിൽ നിന്ന്​ തെറിവിളിയും

കൊച്ചി: ലക്ഷദ്വീപി​െൻറ തനത്​ സംസ്​കാരങ്ങളെ തകർക്കാനുള്ള നീക്കങ്ങൾക്കെതിരെ പ്രതിഷേധം രേഖപ്പെടുത്തി കേരള കാത്തലിക്​ യൂത്ത്​ മൂവ്​മെൻറ് (കെ.സി.വൈ.എം)​. എന്നാൽ ഇതിന്​ പിന്നാലെ കെ.സി.വൈ.എം നേതാകൾക്ക്​ വധഭീഷണിയും വ്യാജ അക്കൗണ്ടുകളിൽ നിന്നും സൈബർ ആക്രമണവും നേരിട്ടു. ഇതിനെതിരെ നടപടി എടുക്കണം എന്നാവശ്യപ്പെട്ട്​ സംസ്ഥാന സമിതി മുഖ്യമന്ത്രിക്കും കേരള പോലീസിനും പരാതി നൽകിയിട്ടുണ്ട്​.

കെ.സി.വൈ.എം ലക്ഷദ്വീപ് ജനതയുടെ ബുദ്ധിമുട്ടുകളോട് അനുഭാവം പ്രകടിപ്പിച്ചതിനെയും പൗരാവകാശത്തിന്റെ മേലുള്ള അധികാരികളുടെ കടന്നുകയറ്റത്തോട് പ്രതികരിച്ചതിനും പിന്നിൽ വർഗീയതയോ രാഷ്ട്രീയമോ മതചിന്തയോ അല്ല, കേവലം മനുഷ്യത്വം മാത്രമാണെന്ന്​ ഭാരവാഹികൾ പത്രക്കുറിപ്പിലൂടെ പ്രതികരിച്ചു. മനുഷ്യത്വത്തിന്റെ സ്വരത്തെ വർഗീയതയുടെ കണ്ണിലൂടെ കാണരുതെന്നും കെ.സി.വൈ.എം ആവശ്യപ്പെട്ടു. മുസ്​ലിം സംഘടനകളുമായി യോജിച്ചു പ്രവർത്തിക്കാൻ യാതൊരു ആഹ്വാനവും കെ.സി.വൈഎം നൽകിയിട്ടില്ല, നൽകുകയുമില്ല. എന്നിട്ടും സ്വാർഥലാഭത്തിനു വേണ്ടി വസ്തുതകളെ വളച്ചൊടിക്കുന്ന മാധ്യമ ധർമത്തെ ശക്തമായി അപലപിക്കുന്നുവെന്നും കെ.സി.വൈ.എം അറിയിച്ചു.

എന്നാൽ കെ.സി.വൈ.എമ്മി​െൻറ പേജിൽ സൈബർ ആക്രമണം നടത്തിയ അക്കൗണ്ടുകളിൽ ബഹുഭൂരിപക്ഷവും വ്യാജഅക്കൗണ്ടുകളാണെന്നത്​ സംശയമുനകൾ ഉയർത്തുന്നുണ്ട്​. ഇത്​ സൈബർ ആക്രമണത്തിന്​ പിന്നിൽ സംഘ്​പരിവാർ എന്നതിലേക്ക്​ വിരൽ ചൂണ്ടുന്നുണ്ട്​.