സംസ്ഥാനത്തിന് മേൽ മെക്കിട്ടുകേറുന്ന കേന്ദ്ര സ്വഭാവം ശരിയല്ല; രൂക്ഷമായി വിമർശിച്ച് മുഖ്യമന്ത്രി

തിരുവനന്തപുരം: ഇഷ്ടമുള്ള സംസ്ഥാനങ്ങൾക്ക്​ വാരിക്കോരി നൽകുകയും കണ്ണിലെ കരടായ ചില സംസ്ഥാനങ്ങൾക്ക്​ ആവശ്യമായ സഹായംപോലും നിഷേധിക്കുകയും ചെയ്യുന്നത്​ രാജ്യത്തിന്​ ചേർന്ന നടപടിയല്ലെന്ന്​ മുഖ്യമന്ത്രി പിണറായി വിജയൻ. സംസ്ഥാനങ്ങൾ വഴി ശേഖരിച്ച്​ കേന്ദ്രത്തിന്‍റെ കൈയിലെത്തുന്ന ആഭ്യന്തരവിഭവങ്ങൾ തങ്ങൾക്ക്​ മാത്രം അവകാശപ്പെട്ടതാണെന്ന്​ കേന്ദ്രം കരുതിയാൽ ശരിയാകില്ല.

​കേ​ന്ദ്രത്തിൽനിന്ന്​ കേരളത്തിന്​ ഒട്ടേറെ ദുരനുഭവങ്ങളുണ്ട്​. കേന്ദ്രം അനുമതി നൽകി നടപ്പാക്കേണ്ട പദ്ധതികളുണ്ട്​. വളരെക്കാലമായി എയിംസ്​ ആവശ്യപ്പെട്ടിട്ടും നിരാശ മാത്രമാണ്​. എയിംസ്​ വന്ന സംസ്ഥാനങ്ങളേക്കാൾ എന്ത്​ കുറവ്​ കേരളത്തിനുണ്ടെന്ന്​ കേന്ദ്രത്തിന്​ പറയാമോ?. ഒരു സംസ്ഥാനത്തോട്​ ഏത്​ രീതിയിൽ നീതികേട്​ ചെയ്യുന്നുവെന്നതിന്‍റെ ഉത്തമ ഉദാഹരണമാണിതെന്ന്​ മുഖ്യമന്ത്രി പറഞ്ഞു. ട്രഷറിയുടെ പുതിയ ആസ്ഥാന മന്ദിരം ഉദ്​ഘാടനം ചെയ്യുകയായിരുന്നു അദ്ദേഹം.

കേന്ദ്ര ധനമന്ത്രി നിർമല സീതാരാമനെ അതിരൂക്ഷമായി വിമർശിച്ച മുഖ്യമന്ത്രി പാവപ്പെട്ടവർക്ക്​ ക്ഷേമം ഉറപ്പാക്കുന്നതിനോ തുടർനടപടി സ്വീകരിക്കുന്നതി​നോ നിങ്ങളുടെ തിട്ടൂരം ആവശ്യമില്ലെന്ന്​ വ്യക്തമാക്കി. ഇവിടെ നടപ്പാക്കുന്നത്​ കാണിച്ച്​ വിരട്ടാമെന്നാണ്​ വിചാരിക്കുന്നതെങ്കിൽ ആ വിരട്ടലിന്​ വിധേയമാകുന്നതല്ല കേരളത്തിലെ ഇടത്​ സർക്കാർ. ക്ഷേമ പ്രവർത്തനങ്ങൾ കേന്ദ്ര അനുമതിയോടെയേ നടപ്പാക്കാവൂ എന്നാണ്​​ ധനമന്ത്രി കേരളത്തിൽ വന്ന്​ ഉപദേശിച്ചത്​.

ക്ഷേമ കാര്യങ്ങളിൽ കേന്ദ്ര നയമല്ല കേരളത്തിന്​. കോർപറേറ്റുകൾക്ക്​ മാത്രം ക്ഷേമം വർധിച്ചാൽ മതിയെന്ന്​ ചിന്തിക്കുന്ന കേന്ദ്രം അത്​ ചെയ്താൽ മതി. ഞങ്ങൾ കോർപറേറ്റുകൾക്ക്​ മാത്രം ​ക്ഷേമമെന്ന്​ ചിന്തിക്കുന്നവരല്ല. കേന്ദ്രമായാലും സംസ്ഥാനമായാലും ആവശ്യത്തിന്​ കടം വാങ്ങേണ്ടിവരും. അതിൽ ദുർവ്യായം പാടില്ല. ഇവിടെ നാടിന്‍റെ ഗുണത്തിനാണ്​ വിനിയോഗിച്ചത്​. ഉപദേശിക്കുന്ന കേന്ദ്ര സർക്കാറിന്‍റെ കടം 49 ലക്ഷം കോടി രൂപയാണ്​.

അവരാണ്​ സംസ്ഥാനങ്ങളോട്​ കടം വാങ്ങരുതെന്ന്​ പറയുന്നത്​. സംസ്ഥാന സർക്കാറുകളുടെമേൽ വല്ലാതെ മെക്കിട്ട്​ കയറലാണ്​ തങ്ങളുടെ ജോലിയെന്ന്​ കരുതരുത്​. രാജ്യത്തിന്‍റെ ക്ഷേമത്തിനും ഐശ്വര്യത്തിനും ക്ഷേമത്തിനും വികസനത്തിനും വേണ്ടിയാണ്​ കേരളം നിലകൊള്ളുന്നത്​. രാജ്യത്തിന്‍റെ ഭാഗമാണ്​ കേരളമെന്നും മുഖ്യമന്ത്രി പറഞ്ഞു.