പൊലീസി​െൻറ കണ്ണില്ലാ ക്രൂരത; പശുവിന്​ പു​ല്ലരിയാൻ പോയ നാരായണേട്ടന്​ 2000രൂപ പിഴ

കാസർകോട്​: പശുവിന്​ പുല്ലരിയാൻ വിജനമായ പറമ്പിലേക്ക്​ ഇറങ്ങിയ ക്ഷീര കർഷകന്​ 2000രൂപ പിഴ. മൂന്ന്​ പൊലീസുകാർ വീട്ടിലെത്തിയാണ്​ പിഴയടക്കാൻ നോട്ടീസ്​ നൽകിയത്​. പിഴ നൽകിയില്ലെങ്കിൽ ​കേസ്​ കോടതിയിലെത്തിച്ച്​ വലിയ പ്രയാസം നേരിടേണ്ടി വരുമെന്നായിരുന്നു പൊലീസിന്‍റെ​ മുന്നറിയിപ്പ്​. കാസർകോട്​ അമ്പലത്തറ പൊലീസാണ്​ പാവ​പ്പെട്ട കർഷക​െൻറ അന്നംമുട്ടിച്ചത്​.

കോടോം-ബെളൂർ പഞ്ചായത്തിലെ ആറ്റേങ്ങാനം പാറക്കൽ വേങ്ങയിൽ വീട്ടിൽ വി. നാരായണനോടാണ്​ പൊലീസി​െൻറ കണ്ണിൽ ചോരയില്ലാത്ത നടപടി. ഭാര്യ ഷൈലജ കോവിഡ്​ പോസിറ്റിവായതോടെ കുടുംബം ഒറ്റപ്പെട്ടു. പത്തിലും ഏഴിലും പഠിക്കുന്ന രണ്ട്​ കുട്ടികളും നാരായ​ണ​െൻറ അമ്മയും അനിയനും അടങ്ങുന്നതാണ്​ കുടുംബം. അരലക്ഷം രൂപ വായ്​പയെടുത്താണ്​ ഇദ്ദേഹം പശുവിനെ വാങ്ങിയത്​. എട്ട്​ ലിറ്റർ പാൽ കിട്ടുന്നത്​ വിറ്റാണ്​ ഉപജീവനം നടത്തിയിരുന്നത്​.

പൊതുവെ കടുത്ത പ്രയാസം നേരിടുന്ന വേളയിലാണ്​ ഭാര്യക്ക്​ കോവിഡ്​ വന്നത്​. ലക്ഷണമൊന്നുമില്ലായിരുന്നു. ദേശീയ ഗ്രാമീണ തൊഴിലുറപ്പ്​ പദ്ധതിക്ക്​ കീഴിൽ ജോലിക്ക്​ ശ്രമിക്കുന്നതിനാൽ കോവിഡില്ലാ സർട്ടിഫിക്കറ്റ്​ ലഭിക്കാനാണ്​ പരിശോധന നടത്തിയത്​. കോവിഡ്​ സ്​ഥിരീകരിച്ചതോടെ പാൽ വാങ്ങാൻ ആവശ്യക്കാരില്ലാതായി. കറവ നടക്കാത്തതിനാൽ പശുവിന്​ പല അസ്വസ്​ഥതകളും അനുഭവപ്പെട്ടു.

25 സെൻറ്​ പുരയിടത്തിൽ പുല്ലൊന്നുമില്ല. അതിനാൽ തൊട്ടടുത്തെ പറമ്പിൽ മാസ്​കിട്ടശേഷം 46കാരനായ നാരായണൻ പു​ല്ലരിയാൻ പോകുകയായിരുന്നു​. പൂർണമായും വിജനമായ സ്​ഥലം. കന്നുകാലികളെ നിങ്ങൾ ശ്രദ്ധിക്കണമെന്ന മുഖ്യമന്ത്രിയുടെ ഓർമപ്പെടുത്തലായിരുന്നു​ ഇദ്ദേഹത്തി​െൻറ മനസ്സിൽ.

''പശുവിന്​ പുല്ലരിഞ്ഞാൽ കോവിഡ്​ പരക്കുന്നത്​ എങ്ങനെയാണ്​. ക്വാറൻറീനിൽ കഴിയേണ്ട നിങ്ങൾ വേറെ ആരെ കൊണ്ടെങ്കിലും പുല്ല്​ അരിയാൻ പറയണം എന്നാണ്​ പൊലീസുകാർ നിർദേശിച്ചത്​. ആരാണ്​ എ​െൻറ പശുവിന്​ പുല്ലെരിയാൻ വരിക. എന്ത്​ മണ്ടത്തരമാണ്​ പൊലീസ്​ പറയുന്നത്​''- നാരായണൻ മാധ്യമത്തോട്​ പറഞ്ഞു.

മക്കൾക്ക്​ സ്​മാർട്ട്​ ഫോൺ വാങ്ങാൻ കടമെടുത്ത ഇയാൾ എങ്ങനെ രണ്ടായിരം രൂപ ഫൈൻ അടക്കുമെന്ന ചിന്തയിലാണ്​. ഉപജീവന മാർഗവും വഴിമുട്ടിയിരിക്കയാണ് ഇപ്പോൾ​. ഒടുവിൽ അടുത്ത ബന്ധു​ പിഴ അടക്കുകയായിരുന്നു​. ഭാര്യക്ക്​ കോവിഡ്​ വന്നിട്ട്​ 10ദിവസമായെങ്കിലും പശുവിനെ ആര്​ പരിപാലിക്കുമെന്നാണ്​ ഇയാളുടെ ചോദ്യം.