കൊച്ചി അന്താരാഷ്​ട്ര വിമാനത്താവളം തുറന്നു

നെടുമ്പാശ്ശേരി: വെള്ളപ്പൊക്കത്തെത്തുടർന്ന് രണ്ടാഴ്​ചയായി അടച്ചിട്ട കൊച്ചി അന്താരാഷ്​ട്ര വിമാനത്താവളം പൂർണതോതിൽ പ്രവർത്തനം പുനരാരംഭിച്ചു. ബുധനാഴ്​ച ഉച്ചക്ക്​ 2.06ന് അഹമ്മദാബാദിൽ നിന്നുള്ള ഇൻഡിഗോ (6ഇ 667) വിമാനമാണ് ആദ്യമെത്തിയത്.

പെരിയാർ കരകവിഞ്ഞൊഴുകിയതോടെ ആഗസ്​റ്റ്​ 15ന് പുലർച്ചയാണ് വിമാനത്താവളം അടച്ചത്. പരിസര പ്രദേശങ്ങൾക്കൊപ്പം വിമാനത്താവളവും വെള്ളത്തിനടിയിലായി. ചുറ്റുമതിൽ തകർന്നതുൾപ്പെടെ സാരമായ കേടുപാടുകൾ സംഭവിച്ചു. വൈദ്യുതി വിതരണ സംവിധാനം, റൺവേ ലൈറ്റുകൾ, ജനറേറ്ററുകൾ എന്നിവയെല്ലാം തകരാറിലായി. വെള്ളം ഇറങ്ങി ആഗസ്​റ്റ്​​ 20 നാണ് സിയാൽ പുനരുദ്ധാരണ പ്രവർത്തനങ്ങൾ തുടങ്ങിയത്. ഡയറക്ടർ ജനറൽ ഓഫ് സിവിൽ ഏവിയേഷൻ പരിശോധന പൂർത്തിയായതോടെ വിമാനത്താവളം സമ്പൂർണ പ്രവർത്തനസജ്ജമായി. 

ബുധനാഴ്​ച ഉച്ചക്ക്​ 3.25നുള്ള ബംഗളൂരു ഇൻഡിഗോയാണ് ആദ്യമായി ടേക് ഓഫ് നടത്തിയത്. ആദ്യ ടേക് ഓഫിന് അപ്രതീക്ഷിതമായി വി.ഐ.പി യാത്രക്കാരനും ഉണ്ടായിരുന്നു; കോൺഗ്രസ് അധ്യക്ഷൻ രാഹുൽ ഗാന്ധി. സംസ്ഥാനത്തെ വെള്ളപ്പൊക്ക ബാധിത പ്രദേശങ്ങൾ സന്ദർശിച്ചശേഷം രാഹുൽ ബുധനാഴ്​ച ഉച്ചയോടെ ഹെലികോപ്​ടറിൽ വിമാനത്താവളത്തിലെത്തിയിരുന്നു.

പ്രവർത്തനം പൂർണതോതിലായതോടെ രാഹുൽ തുടർയാത്ര ഇവിടെ നിന്നാക്കി. മസ്‌കത്തിൽ നിന്നുള്ള ജെറ്റ് എയർവേസ് വിമാനം വൈകീട്ട് നാലരയോടെ എത്തി. പുനരുദ്ധരിച്ച വിമാനത്താവളത്തിൽ എത്തിയ ആദ്യ രാജ്യാന്തര സർവിസാണിത്. ആദ്യദിനം ഉച്ചക്ക്​ രണ്ടുമണി മുതൽ അർധരാത്രി വരെ 33 ലാൻഡിങ്ങും 30 ടേക് ഓഫും നടന്നു. ഒരു സർവിസ് പോലും റദ്ദുചെയ്തിട്ടില്ല.