കോവിഡ്​: കേരളത്തിൽ ഇന്നത്തെ പോലെയല്ല നാളെ​ മുതൽ; സൂക്ഷിച്ചില്ലേൽ പണികിട്ടു​​ം

തിരുവനന്തപുരം: കോവിഡിന്‍റെ രണ്ടാം വ്യാപനം രാജ്യത്ത്​ രൂക്ഷമാകുന്നതിനിടെ കേരളത്തിലും കോവിഡ്​ നിയന്ത്രണം കടുപ്പിക്കുന്നു. ഇതിന്‍റെ ഭാഗമായി പൊലീസ്​ പരിശോധന കർശനമാക്കും. മാസ്​ക്​ ധരിക്കു​ന്നുണ്ടോ​െയന്നും സാമൂഹിക അകലം പാലിക്കുന്നുണ്ടോയെന്നും പൊലീസ്​ ഉറപ്പാക്കും. നിയന്ത്രണങ്ങൾ ലംഘിക്കുന്നവർക്കെതിരെ കർശന നടപടിയുണ്ടാകും. കോവിഡുമായി ബന്ധപ്പെട്ട കോർകമ്മിറ്റി യോഗത്തിലാണ്​ തീരുമാനമുണ്ടായത്​.

കൂടുതൽ സെക്​ടറൽ മജിസ്​ട്രേറ്റുമാരെ നിയമിക്കാനും യോഗത്തിൽ ധാരണയായിട്ടുണ്ട്​. ഇതര സംസ്ഥാനങ്ങളിൽ നിന്നും വിദേശരാജ്യങ്ങളിൽ നിന്ന്​ വരുന്നവർക്കും ഏഴ്​ ദിവസത്തെ ക്വാറന്‍റീൻ ഉറപ്പാക്കും. ഇപ്പോഴും ഈ നിർദേശം നിലവിലുണ്ടെങ്കിലും കർശനമായി പാലിക്കപ്പെടുന്നില്ല. ​ഇത്​ കർശനമായി പാലിക്കാനുള്ള നടപടികൾ സ്വീകരിക്കും.

​തെരഞ്ഞെടുപ്പ്​ പ്രവർത്തനങ്ങളുടെ ഭാഗമായ പോളിങ്​ ഏജന്‍റുമാരെ കോവിഡ്​ പരിശോധനക്ക്​ വിധേയമാക്കും. രോഗലക്ഷണങ്ങൾ ഉള്ളവരെല്ലാം പരിശോധനക്ക്​ വിധേയമാകണം. സംസ്ഥാനത്തെ കോവിഡ്​ പരിശോധനകളുടെ എണ്ണം ഉയർത്താനും യോഗത്തിൽ ധാരണയായി.