ഹേമ കമ്മിറ്റി റിപ്പോർട്ടിൽ സർക്കാർ നടപടി വേണമെന്ന് ഗവർണർ; ‘സ്ത്രീകളോട് മാന്യതയും ബഹുമാനവും കാണിക്കണം’
text_fieldsതിരുവനന്തപുരം: മലയാള സിനിമ മേഖലയിൽ സ്ത്രീകൾ നേരിടുന്ന പ്രശ്നങ്ങൾ വിവരിച്ചു കൊണ്ട് ജസ്റ്റിസ് കെ. ഹേമ സർക്കാറിന് സമർപ്പിച്ച റിപ്പോർട്ടിൽ പ്രതികരിച്ച് കേരള ഗവർണർ ആരിഫ് മുഹമ്മദ് ഖാൻ. സർക്കാറിന് കടമയുണ്ടെന്നും റിപ്പോർട്ടിൽ നടപടി വേണമെന്നും ഗവർണർ പ്രതികരിച്ചു.
നമ്മുടെ സ്വന്തം കുടുംബത്തിലെ സ്ത്രീകളോട് എങ്ങനെ പെരുമാറണമെന്ന് അറിയാവുന്ന നമ്മൾ എന്തിന് കുടുംബത്തിന് പുറത്തുള്ള സ്ത്രീകളോട് മറ്റൊരു രീതിയിൽ പെരുമാറണമെന്നും ഗവർണർ ചോദിച്ചു. സ്ത്രീകളോട് മാന്യതയും ബഹുമാനവും കാണിക്കണമെന്നും ആരിഫ് മുഹമ്മദ് ഖാൻ വ്യക്തമാക്കി.
ഗവർണറുടെ പ്രതികരണം:
''സർക്കാറിന് ഒരു കടമയുണ്ട്, നടപടി വേണം. പക്ഷേ നമ്മുടെ മനഃസാക്ഷി എവിടെ?, എന്താണ് നമ്മുടെ സ്വന്തം കടമ?, സമൂഹത്തിന്റെ കടമ എന്താണ്?, നമ്മൾ ഓരോരുത്തരുടെയും വ്യക്തിപരമായ കടമ എന്താണ്?, നമ്മുടെ സ്വന്തം കുടുംബത്തിലെ സ്ത്രീകളോട് എങ്ങനെയാണ് നമ്മൾ പെരുമാറുന്നത്?, എന്തിന് കുടുംബത്തിന് പുറത്തുള്ള സ്ത്രീകളോട് മറ്റൊരു രീതിയിൽ പെരുമാറണം?.
നമ്മുടെ സമൂഹത്തിൽ ഈ അവബോധം സൃഷ്ടിക്കാൻ നമുക്കൊരു ദീർഘകാല പരിപാടി ആവശ്യമാണ്. സ്ത്രീ-പുരുഷ വേർതിരിവ് നമുക്ക് കാണാനാവില്ല, സ്ത്രീകളെ മാന്യതയോടും ബഹുമാനത്തോടെയും കാണണം. ഈ സമൂഹത്തിൽ സാമൂഹിക അവബോധം വളർത്തിയെടുക്കാൻ ഞാൻ അഭ്യർഥിക്കുന്നു, എവിടെയെങ്കിലും ചില സാമൂഹിക അവബോധവും സാമൂഹിക ക്രമവും രൂപപ്പെടണം, നിയമം സഹായിക്കും, പക്ഷേ നിയമം ഒരു പൂർണ പരിഹാരമല്ല. സർക്കാർ നടപടി സ്വീകരിക്കണം, പക്ഷേ സർക്കാറിന് മാത്രം ആഗ്രഹിച്ച ലക്ഷ്യം കൈവരിക്കാനാവില്ല.''
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.