ബ്രഹ്മപുരത്തെ തീയും പുകയും നിയന്ത്രിക്കാൻ എത്രനാൾ വേണമെന്ന്​ ഹൈകോടതി; മറുപടിയില്ലാതെ സർക്കാർ

കൊച്ചി: ബ്രഹ്മപുരത്തെ തീയും പുകയും നിയന്ത്രിക്കാൻ എത്രനാൾ വേണമെന്ന ഹൈകോടതിയുടെ ചോദ്യത്തിന്​ മറുപടിയില്ലാതെ സർക്കാർ. രണ്ടുനാൾ വേണമെന്ന പതിവ്​ മറുപടിയിലൊതുങ്ങിയപ്പോൾ ഫലപ്രദമായ നടപടികളുണ്ടായില്ലെങ്കിൽ സ്വരം കടു​പ്പിക്കേണ്ടിവരുമെന്ന്​ ഡിവിഷൻ ബെഞ്ച്​ മുന്നറിയിപ്പ്​ നൽകി.​ തുടർന്ന്​ പ്രത്യേക നിരീക്ഷണ സമിതിക്ക്​ രൂപംനൽകിയ കോടതി 24 മണിക്കൂറിനകം ബ്രഹ്മപുരത്തെത്തി പരിശോധിച്ച്​ സമിതി റിപ്പോർട്ട്​ നൽകാൻ ഉത്തരവിട്ടു.

ബ്രഹ്മപുരത്തുനിന്ന്​ ​കൊച്ചി നഗരത്തിലടക്കം എത്തുന്ന പുകയും തീയും നിയന്ത്രിക്കാൻ എത്രനാൾ വേണമെന്നായിരുന്നു ഹരജി പരിഗണിക്കവെ ജസ്റ്റിസ് എസ്.വി. ഭാട്ടി, ജസ്റ്റിസ് ബസന്ത് ബാലാജി എന്നിവരടങ്ങുന്ന ഡിവിഷൻ ബെഞ്ച്​ സർക്കാറിനോട്​ ആരാഞ്ഞത്​. രണ്ട് ദിവസംകൂടി വേണമെന്നാണ് ഫയർ ഫോഴ്സ് ഉദ്യോഗസ്ഥർ പറയുന്നതെന്നായിരുന്നു ജില്ല കലക്ടർ എൻ.എസ്.കെ. ഉമേഷിന്‍റെ വിശദീകരണം. കഴിഞ്ഞ ദിവസവും രണ്ട് ദിവസംകൂടി മതിയെന്നാണ് ഫയർ ഫോഴ്സ് ഉദ്യോഗസ്ഥർ പറഞ്ഞതെന്നുകൂടി കഴിഞ്ഞ ദിവസം ചുമതലയേറ്റ കലക്ടർ കൂട്ടിച്ചേർത്തു. തുടർന്നാണ്​ ശുചിത്വ മിഷൻ ഡയറക്​ടർ, തദ്ദേശ ഭരണ ചീഫ് എൻജിനീയർ, ജില്ല കലക്ടർ, മലിനീകരണ നിയന്ത്രണ ബോർഡ്​, ചീഫ് എൻവയൺമെന്‍റ്​ എൻജിനീയർ, കൊച്ചി കോർപറേഷൻ സെക്രട്ടറി, ജില്ല ലീഗൽ സർവിസ് അതോറിറ്റി സെക്രട്ടറി എന്നിവരടങ്ങുന്ന സമിതിക്ക്​ രൂപംനൽകിയത്​.

ബ്രഹ്മപുരത്തെ എട്ട് മേഖലകളിൽ ആറിടത്തെ തീ നിയന്ത്രിക്കാനായെന്ന്​ കലക്ടർ വിശദീകരിച്ചു. നാല് ഏക്കറോളം വരുന്ന പ്രദേശത്തെ തീ നിയന്ത്രിക്കാൻ ശ്രമം നടക്കുകയാണ്. സ്ഥലപരിമിതിമൂലം കൂടുതൽ മണ്ണുമാന്തി യന്ത്രങ്ങൾ ഉപയോഗിക്കാനാകുന്നില്ല. ദേശീയ തലത്തിലുള്ള വിദഗ്ധരുടെ സഹായമടക്കം തേടുന്നുണ്ടെന്നും കലക്ടർ അറിയിച്ചു.

ബ്രഹ്മപുരത്തെ അവസ്ഥ മോശമാണെന്നായിരുന്നു മലിനീകരണ നിയന്ത്രണ ബോർഡ്​ ചെയർമാൻ എ.ബി. പ്രദീപ് കുമാറിന്‍റെ വിശദീകരണം. കാറ്റിന്റെ ഗതി കടലിൽനിന്ന്​ കരയിലേക്കായത്​ നിയന്ത്രണ ശ്രമങ്ങൾക്ക്​ തടസ്സമാണെന്ന്​ ബോർഡ്​ ചെയർമാൻ പറഞ്ഞു.

ദേശീയ ഹരിത ട്രൈബ്യൂണലിന്​ കോർപറേഷൻ നൽകിയ ഉറപ്പുകളിൽ 30 ശതമാനമെങ്കിലും നടപ്പാക്കിയിരുന്നെങ്കിൽ ഇപ്പോഴത്തെ അവസ്ഥ ഉണ്ടാകുമായിരുന്നില്ലെന്ന് കോടതി അഭിപ്രായപ്പെട്ടു. ഉത്തരവാദികളായ ഉദ്യോഗസ്ഥർക്കെതിരെ പ്രോസിക്യൂഷൻ നടപടിക്ക്​ ഉത്തരവിടുമെന്നും കോടതി വാക്കാൽ പറഞ്ഞു. പ്രശ്നത്തിന് ശാശ്വത പരിഹാരം സംബന്ധിച്ച്​ തദ്ദേശ ഭരണ അഡീ. ചീഫ് സെക്രട്ടറി ശാരദ മുരളീധരൻ സത്യവാങ്മൂലം നൽകണമെന്ന്​ കോടതി നിർദേശിച്ചു. വീടുകളിൽനിന്നുള്ള മാലിന്യം ശനിയാഴ്ച മുതൽ ശേഖരിക്കണമെന്നും ആവശ്യപ്പെട്ടു.