മൃതദേഹവുമായി പ്രതിഷേധം: മുഹമ്മദ്​ ഷിയാസി​ന്​ ഹൈകോടതിയുടെ രൂക്ഷ വിമർശനം

​കൊച്ചി: കാട്ടാന ആക്രമണത്തിൽ കൊല്ലപ്പെട്ട വീട്ടമ്മയുടെ മൃതദേഹവുമായി പ്രതിഷേധ സമരം നടത്തിയ സംഭവത്തിൽ കോ​ൺഗ്രസ്​ എറണാകുളം ജില്ല പ്രസിഡന്‍റ്​ മുഹമ്മദ്​ ഷിയാസി​ന്​ ഹൈകോടതിയുടെ രൂക്ഷ വിമർശനം. സമ്മതമില്ലാതെ മോർച്ചറിയിൽനിന്ന്​ മൃതദേഹം എടുത്തു ​കൊണ്ടുപോയല്ലേ സമരം നടത്തിയതെന്നതടക്കം​ ചോദ്യങ്ങൾ ഉന്നയിച്ചാണ്​ ജസ്റ്റിസ്​ രാജ വിജയരാഘവൻ വാക്കാൽ വിമർശനം നടത്തിയത്​. സമരം നടത്തിയതിന്‍റെ പേരില്‍ പൊലീസ് നിരന്തരം വേട്ടയാടുകയാണെന്ന് ആരോപിച്ച് ഷിയാസ് നല്‍കിയ ഹരജി പരിഗണിക്കുകയായിരുന്നു കോടതി.

മോർച്ചറിയിൽനിന്ന് മൃതദേഹമെടുത്ത്​ നടത്തിയ പ്രതിഷേധവുമായി ബന്ധപ്പെട്ട്​ കേസ്​ എടുക്കരുതെന്നാണോ ഹരജിക്കാരൻ ആവശ്യ​പ്പെടുന്നതെന്ന്​ കോടതി ആരാഞ്ഞു. പൊലീസ്​ ഉദ്യോഗസ്ഥനെ ഹരജിക്കാരൻ മർദിച്ചിട്ടില്ലേയെന്നും കോടതി ചോദിച്ചു. എന്നാൽ, ജനരോഷം ഉയര്‍ന്ന സാഹചര്യത്തില്‍ ഉത്തരവാദപ്പെട്ട രാഷ്ട്രീയപാര്‍ട്ടിയുടെ ജില്ല അധ്യക്ഷന്‍ എന്ന നിലയിൽ ജനങ്ങള്‍ക്കൊപ്പം പ്രതിഷേധത്തിന് നേതൃത്വം നല്‍കുകയാണ്​ ചെയ്തതെന്ന്​ ഷിയാസ് ചൂണ്ടിക്കാട്ടി.

പ്രശ്നത്തിൽ കോടതിയെ സമീപിക്കാമായിരുന്നല്ലോ എന്ന് കോടതി ചോദിച്ചു. പൊലീസ് തന്നോട് വൈരാഗ്യത്തോടെ പെരുമാറുകയാ​ണെന്നും നാല്​ കേസ്​ എടുത്തിട്ടുണ്ടെന്നും ഷിയാസ് പറഞ്ഞു. ഇക്കാര്യത്തിൽ ഹരജിയിൽ സർക്കാറിനോട്​ നിലപാട്​ തേടി. ഒരു സംഭവത്തിൽതന്നെ ഒരാൾക്കെതിരെ എത്ര കേസാണ്​ രജിസ്റ്റർ ചെയ്തതെന്ന്​​ പൊലീസിനോടും ആരാഞ്ഞു. സംഭവവുമായി ബന്ധപ്പെട്ട്​ ഷിയാസിനെതിരെ നിലവിലുള്ള കേസുകളുടെ വിവരം അറിയിക്കാനും കോടതി നിർദേശിച്ചു. തുടർന്ന്​ ഹരജി വ്യാഴാഴ്ച പരിഗണിക്കാൻ മാറ്റി.