ഇലക്​ട്രോണിക്​ സാധനങ്ങളുടെ കയറ്റിറക്കിന്​ ഉടമക്ക്​ സ്വന്തം തൊഴിലാളികളെ ഉപയോഗിക്കാമെന്ന്​ ഹൈകോടതി

കൊച്ചി: സൂക്ഷിച്ച്​ കൈകാര്യം ചെയ്യേണ്ട ഇലക്​ട്രോണിക്​ സാധനങ്ങളടക്കമുള്ളവയുടെ കയറ്റിറക്ക്​ ജോലിക്ക്​ പ്രത്യേക പരിശീലനം ലഭിച്ച സ്വന്തം തൊഴിലാളികളെ തൊഴിലുടമക്ക്​ ഉപയോഗിക്കാമെന്ന്​ ​ഹൈകോടതി ഡിവിഷൻ ബെഞ്ച്​. മൊബൈൽ, ടെലിവിഷൻ, റെഫ്രിജറേറ്റർ തുടങ്ങിയ പെട്ടെന്ന്​ തകരാറിലാവുന്ന സാധനങ്ങളുടെ കയറ്റിറക്കുമായി ബന്ധപ്പെട്ട​ സിംഗിൾ ബെഞ്ച്​ ഉത്തരവ്​ ശരിവെച്ചാണ്​ ഈ വിധി.

സിംഗിൾ ബെഞ്ച് ഉത്തരവ് ചോദ്യംചെയ്ത് ആലപ്പുഴയിലെ ചുമട്ടുതൊഴിലാളികൾ നൽകിയ അപ്പീൽ ഹരജിയാണ്​ ജസ്റ്റിസ് അമിത് റാവൽ, ജസ്റ്റിസ് സി.എസ്. സുധ എന്നിവരടങ്ങുന്ന ഡിവിഷൻ ബെഞ്ച്​ പരിഗണിച്ചത്​.

ആലപ്പുഴയിലെ ശ്രീലക്ഷ്മി ഡിസ്ട്രിബ്യൂട്ടേഴ്സ് നൽകിയ ഹരജിയിലാണ്​ ഇത്തരം സാധനങ്ങളുടെ കയറ്റിറക്കിന്​ സ്വന്തം തൊഴിലാളികളെ ഉപയോഗിക്കാമെന്ന്​ 2021ൽ സിംഗിൾ ബെഞ്ച്​ ഉത്തരവിട്ടത്​. മൊബൈലും ടെലിവിഷനുമൊന്നും പെട്ടെന്ന് തകരുന്നവയല്ലെന്നും ഇവ കൈകാര്യം ചെയ്യാൻ പ്രത്യേകം പരിശീലനം ലഭിച്ച തൊഴിലാളികളുടെ ആവശ്യമില്ലെന്നുമായിരുന്നു അപ്പീൽ ഹരജിക്കാരുടെ വാദം.

എന്നാൽ, ചെറിയ ശ്രദ്ധക്കുറവോ കൈകാര്യം ചെയ്യുന്നതിലെ പിഴവോ മൂലം വേഗം കേടുവരാവുന്ന സാധനങ്ങളാണ്​ ഇവയെന്ന്​ കോടതി പറഞ്ഞു. ഇവ ഇറക്കാനും കയറ്റാനും പരിശീലനം ലഭിച്ച തൊഴിലാളികളെ നിയമിക്കാൻ തൊഴിലുടമക്ക്​ അവകാശമുണ്ടെന്ന്​ വിലയിരുത്തിയ കോടതി, അപ്പീൽ ഹരജി തള്ളുകയായിരുന്നു.