വല്ലിയും മകളും ഈ മഴയിൽ എങ്ങോട്ടുപോകും?

തൃക്കരിപ്പൂർ: കഴിഞ്ഞ വർഷം കുടിലിനകത്ത് മഴ പെയ്യാതിരിക്കാൻ പുതപ്പിച്ച പ്ലാസ്​റ്റിക് ഷീറ്റിലെ തുളകളിലൂടെ ദ്രവിച്ച കഴുക്കോലുകൾ മാനം നോക്കുന്നു. നിന്നുതിരിയാൻ ഇടമില്ലാത്ത  അടുക്കള. മേൽക്കൂര ഏതുനിമിഷവും പതിക്കാവുന്ന കുടുസ്സുമുറി. ഇവിടെയാണ് കാരോളം രാമവില്യം ഗേറ്റ് പരിസരത്തെ  വിജയവല്ലിയും ഏക മകളും ദിവസങ്ങൾ തള്ളിനീക്കുന്നത്. 

ഈ മഴക്കാലത്ത് നമ്മളെന്ത് ചെയ്യും അമ്മേ എന്ന മകളുടെ ചോദ്യം അവളെ ചേർത്തുനിർത്തി വല്ലി പ്രതിരോധിക്കും. അമ്മക്കൊറ്റക്ക് ഒന്നും ചെയ്യാനാവില്ലെന്ന് ഒമ്പതാം ക്ലാസുകാരിയായ  അവൾക്കറിയാം. പയ്യന്നൂരിലെ ഷോപ്പിങ്​ മാളിൽ ജോലിക്ക് പോകുന്നതുകൊണ്ട് പട്ടിണിയില്ലാതെ കഴിയുന്നു. ലോക്ഡൗണിൽ പെട്ടതോടെ ആ വരുമാനവും ഇല്ലാതായി. 

ഇൗ കുടുംബം ലൈഫ് പദ്ധതിയിലും പെട്ടിട്ടില്ല. പത്തുവർഷം മുമ്പ് ജീവിതപങ്കാളി ഉപേക്ഷിച്ചുപോയി. ഭവന പദ്ധതിക്കായി പ്രതീക്ഷയോടെയാണ് അധികൃതരെ സമീപിച്ചത്. പട്ടിക വന്നപ്പോൾ ഈ അമ്മയും മകളും ഇല്ല. തുടർവർഷങ്ങളിലെ പട്ടികകളിലും വല്ലിക്ക് ഇടം കിട്ടിയില്ല.  റേഷൻ കാർഡ് ഇല്ലെന്ന് പറഞ്ഞപ്പോൾ അത് സംഘടിപ്പിച്ചു. പിന്നെ  സ്വന്തമായി ഭൂമി വേണമെന്നായി. അമ്മയുടെ മണ്ണിൽനിന്ന് അഞ്ച് സ​​െൻറ്​ ഭൂമിയും വിഹിതമായി കിട്ടി. എന്നിട്ടും പട്ടികയിൽപെട്ടില്ല.

ഗ്രാമസഭകളിലേക്കുള്ള യാത്രകൾ അവർ തുടരുകയാണ്. വല്യമ്മയുടെ പേരിലുള്ള ചായ്പ്പിലാണ് ഇപ്പോൾ കഴിയുന്നത്. തകർന്നുവീഴാറായ തറവാട്ടിൽ പ്രായമായ അമ്മയും ഭിന്നശേഷിക്കാരനായ അനിയനും കഴിയുന്നു. അഞ്ചു സഹോദരങ്ങളിൽ മൂന്നുപേർ സ്​്രതീകളാണ്​. എല്ലാവരും അവരുടെ പ്രാരബ്​ധങ്ങളിൽ ഓരോ ഇടങ്ങളിൽ കഴിയുന്നു.