ഭരണഘടനയെ ആരാധിക്കുന്ന ക്ഷേത്രം നിർമിച്ച് അധ്യാപകൻ; തന്റെ ദൈവം ഭരണഘടനയെന്നും പ്രതികരണം

തിരുവനന്തപുരം: ഭരണഘടനയെ ആരാധിക്കുന്ന ക്ഷേത്രം നിർമിച്ച് വിരമിച്ച അധ്യാപകൻ. ശിവദാസൻ പിള്ളയെന്ന സാമൂഹ്യശാസ്ത്ര അധ്യാപകനാണ് ക്ഷേത്രം നിർമിച്ചിരിക്കുന്നത്. ക്ഷേത്രത്തിൽ പ്രധാനമായും ആരാധിക്കുന്നത് ഭരണഘടനയെയാണ്. ഹിന്ദുക്ഷേത്രങ്ങളുടെ മാതൃകയിൽ തന്നെയാണ് ശിവദാസൻ പിള്ളയുടേയും ആരാധന.

തന്നെ സംബന്ധിച്ചടുത്തോളം ഭരണഘടനായാണ് ദൈവം. അതാണ് രാജ്യത്തിന്റേയും സാഹോദര്യത്തിന്റേയും വൈവിധ്യ​ത്തിന്റേയും ഭാവിയുടേയും അടിസ്ഥാനം. അതിനാലാണ് താൻ വീടിന് സമീപം ഒരു വർഷം മുമ്പ് ഭരണഘടന ക്ഷേത്രം നിർമിച്ചതെന്നും അദ്ദേഹം പറഞ്ഞു.

ക്ഷേത്രത്തിലെത്തുന്നവർക്ക് സ്റ്റിക്കറാണ് പ്രസാദമായി നൽകുന്നത്. 'ഭരണഘടനയാണ് ദൈവം, അതാണ് ഈ വീടിന്റെ ഐശ്വര്യം' എന്നെഴുതിയ സ്റ്റിക്കറാണ് ഇത്തരത്തിൽ നൽകുന്നത്. ഭരണഘടനനിന്ദയെ തുടർന്ന് സജി ചെറിയാന് മന്ത്രിസ്ഥാനം രാജിവെക്കേണ്ടി വന്ന സാഹചര്യത്തിൽ ശ്രദ്ധേയമാവുകയാണ് ശിവദാസൻപിള്ളയുടെ ഭരണഘടന ക്ഷേത്രം.