ഇനി​ ‘കൊല്ലപ്പകിട്ട്​’ കലോത്സവ കഥ പറയും; അഷ്ടമുടിത്തീരം ആഘോഷത്തിരക്കിലേക്ക്

കൊല്ലം: കോഴിക്കോടിന്‍റെ ഹൽവമാധുര്യം നിറഞ്ഞ ‘കലക്കാറ്റ്’​ വീശിയടിച്ച കഴിഞ്ഞ വർഷത്തെ ഓർമകൾക്ക്​ വിട, ഇനി​ ‘കൊല്ലപ്പകിട്ട്​’ കലോത്സവ കഥ പറയും നാളുകൾ. അഷ്ടമുടിയുടെ തീരത്തൊരുങ്ങിയ കലാഅരങ്ങ്​ സംസ്ഥാന സ്കൂൾ കലോത്സവത്തിന്‍റെ പകിട്ടിൽ കൗമാരപ്രതിഭകൾ കീഴടക്കാൻ ഇനി രാപ്പകൽ ദൂരംമാത്രം.

ഏഷ്യൻ വൻകരയിലെ ഏറ്റവും വലിയ കൗമാര കലാമേളയുടെ 62ാം പതിപ്പിന്​​ വ്യാഴാഴ്ച തിരിതെളിയുമ്പോൾ ദേശിംഗനാടിന്‍റെ 16 വർഷം നീണ്ട കാത്തിരിപ്പിന്​ കൂടിയാണ്​ അവസാനമാകുന്നത്​. കൊല്ലത്തിന്‍റെ സാംസ്കാരിക മണ്ഡലങ്ങളിൽ തിളങ്ങുന്ന നക്ഷത്രങ്ങളായ മഹാരഥന്മാരുടെ സ്മരണ നിറയുന്ന 24 വേദികളിൽ കൗമാരം നിറഞ്ഞാടും. കൊല്ലം നഗരഹൃദയത്തിൽ ചരിത്രമുറങ്ങുന്ന ആശ്രാമം മൈതാനത്ത്​​ ഒരുക്കിയ വിശാലമായ വേദിയാണ്​ ഒന്നാം വേദിയാകുന്ന ഒ.എൻ.വി സ്മൃതി. തുടർന്ന്​ നഗരത്തിന്‍റെ വിവിധ ഭാഗങ്ങളിലെ 18 കേന്ദ്രങ്ങളിലായി ഒരുക്കിയിരിക്കുന്ന വേദികളിലാണ്​ അഞ്ച്​ ദിനരാത്രങ്ങൾ നീളുന്ന കലോത്സവം അരങ്ങേറുന്നത്​.

എച്ച്​.എസ്​, എച്ച്​.എസ്​.എസ്​ ജനറൽ, എച്ച്​.എസ്​ സംസ്കൃതം, അറബിക്​ വിഭാഗങ്ങളിൽ ആകെ 239 ഇനങ്ങളിലാണ്​ മത്സരങ്ങൾ നടക്കുന്നത്​. 14 ജില്ല കലോത്സവങ്ങളിൽനിന്ന്​ 10000ത്തോളം വിദ്യാർഥികൾ ഒന്നാം സ്ഥാനം നേടിയെത്തുമ്പോൾ 4000ത്തോളം പേർ അപ്പീലിലൂടെ എത്തുമെന്നാണ്​ പ്രതീക്ഷിക്കുന്നത്​. കലോത്സവ സ്വർണക്കപ്പ്​ കോഴിക്കോടുനിന്ന്​ പര്യടനം തുടങ്ങി. ബുധനാഴ്ച വൈകീട്ട്​​ കലോത്സവ നഗരിയിൽ സ്വർണക്കപ്പ്​ എത്തിച്ചേരുന്നതോടെ ആവേശക്കാഴ്ചകൾക്ക്​ കൂടുതൽ പകിട്ടേറും, പിന്നെ ആഘോഷത്തിരക്കിലാകും അഷ്ടമുടി തീരം.