കേരളത്തിലെ സാമ്പത്തികപ്രതിസന്ധിക്ക് കാരണം കേന്ദ്രസർക്കാറെന്ന് കേരളീയം സെമിനാർ

തിരുവനന്തപുരം: സംസ്ഥാനത്തിന്‍റെ സാമ്പത്തിക പ്രതിസന്ധിക്ക്​ കാരണം കേ​ന്ദ്രത്തിന്‍റെ രാഷ്ട്രീയ ഇടപെടലാണെന്ന്​ സെമിനാർ. കേരളീയത്തിന്‍റെ ഭാഗമായി സംഘടിപ്പിച്ച സെമിനാറിലാണ്​ ഈ വിമർശനം.

നിലവിലേത്​ കേന്ദ്രത്തിന്‍റെ രാഷ്​ട്രീയ ഇടപെടൽമൂലമുള്ള പ്രതിസന്ധിയാണെന്നും സംസ്ഥാനം ഇതൊന്നും ചെയ്യേണ്ടെന്നാണ്​ കേന്ദ്ര നിലപാടെന്നും മുൻ മന്ത്രി തോമസ്​ ഐസക്​ പറഞ്ഞു. രാഷ്ട്രീയമായി സൃഷ്ടിച്ച പ്രതിസന്ധിയല്ലാതെ ഒന്നും കേരളത്തിനില്ല. കിഫ്ബി വായ്പകൾ വായ്പ പരിധിയിൾ ഉൾപ്പെടുത്തി സംസ്ഥാനത്തെ വരിഞ്ഞു​മുറുക്കുകയാണ്​.

ആറു പതിറ്റാണ്ടിനിടെ കേരളത്തിന്റെ സാമ്പത്തിക രംഗം വലിയ മാറ്റങ്ങൾക്ക് വിധേയമായിട്ടുണ്ട്​. കേരളം പണ്ടത്തെപ്പോലെ ദരിദ്ര സംസ്ഥാനമല്ല. ഉയർന്ന ഉപഭോഗ ശേഷിയും പ്രതിശീർഷ വരുമാനവും വേഗത്തിലുള്ള സാമ്പത്തിക വളർച്ചയും സ്വന്തമാക്കാനായി. എന്നാൽ, നിക്ഷേപ കാര്യത്തിൽ വലിയ മാറ്റം വന്നിട്ടില്ല. 1987 വരെ സംസ്ഥാനത്തിന്‍റെ സാമ്പത്തിക വളർച്ച രണ്ടു​ ശതമാനമായിരുന്നു. 1987 ന് ശേഷം ഇത് ആറു ശതമാനം വീതമാണ്. ഗൾഫ്​ പ്രവാസമാണ്​ ഈ വളർച്ചക്ക്​ കാരണമെന്ന്​ അദ്ദേഹം പറഞ്ഞു.

രാഷ്ട്രീയം സംസ്ഥാനങ്ങളു​ടെ ധനസ്ഥിതിയെ വരിഞ്ഞു​മുറുക്കുകയാണെന്ന്​ മുൻ കാബിനറ്റ്​ സെക്രട്ടറി കെ.എം. ചന്ദ്രശേഖർ പറഞ്ഞു. ധനകാര്യമേഖലയിലെ ഫെഡറൽ ബന്ധങ്ങൾ സുതാര്യമായില്ലെങ്കിൽ എല്ലാ സംസ്ഥാനങ്ങൾക്കും പ്രതിസന്ധി സൃഷ്ടിക്കും. 16ാം ധനകാര്യ കമീഷൻ മുന്നിൽ കണ്ട്​ പ്രത്യേകം സംഘം രൂപവത്​കരിച്ച്​ ഇ​പ്പോഴേ തയാറെടുപ്പ്​ തുടങ്ങിയില്ലെങ്കിൽ വീണ്ടും അവഗണനയുണ്ടാകുമെന്ന്​ അദ്ദേഹം പറഞ്ഞു.

പരിസ്ഥിതിയാണ് നവകേരള നിർമിതിയിൽ ഒന്നാമതായി പരിഗണിക്കേണ്ടതെന്ന്​ എം.എം. ഉമ്മൻ പറഞ്ഞു. ഒരു ‘ഹരിത ഇക്കോണമി’യാണ് കേരളത്തിന്​ വേണ്ടത്​. ക്വാറികളുടെ പ്രവർത്തനം പരിസ്ഥിതിയെ ഗുരുതരമായി ബാധിക്കുകയാണെന്നും അദ്ദേഹം പറഞ്ഞു.

സാമ്പത്തികമായി വലിയ ബുദ്ധിമുട്ടിലാണ്​ സംസ്ഥാനം മുന്നോട്ടുപോകുന്നതെന്ന്​ ധനമന്ത്രി കെ.എൻ. ബാലഗോപാൽ പറഞ്ഞു. കടമെടുപ്പ് പരിധി വെട്ടിക്കുറച്ചത്​ ഇരുട്ടടിയായി. സാമ്പത്തിക അധികാരങ്ങൾ ഏറ്റവുമധികം വെട്ടിക്കുറക്കപ്പെട്ട സംസ്ഥാനമാണ് കേരളമെന്നും മന്ത്രി പറഞ്ഞു.