കിഫ്​ബി ബോർഡ്​ യോഗം; 743 കോടിയുടെ 32 പദ്ധതികൾക്ക് അനുമതി

തിരുവനന്തപുരം: മുഖ്യമന്ത്രിയുടെ അധ്യക്ഷതയിൽ ചേർന്ന കിഫ്​ബി ബോർഡ്​ യോഗത്തിൽ 743.37 കോടി രൂപയുടെ 32 പദ്ധതികൾക്ക് ധനാനുമതി. ഇതോടെ ആകെ 87,378.33 കോടി രൂപയുടെ 1147 പദ്ധതികൾക്കാണ് ഇതുവരെ കിഫ്ബി അംഗീകാരം നൽകിയത്​.

നെടുമങ്ങാട് ജില്ല ആശുപത്രിക്കും കൊട്ടാരക്കര ഐ.ടി പാർക്കിനും വിഴിഞ്ഞം-കൊല്ലം-പുനലൂർ സാമ്പത്തിക-വ്യാവസായിക വികസന ഇടനാഴിക്കുള്ള സ്ഥലമേറ്റെടുപ്പ് പദ്ധതിക്കും മൈക്രോബയോം, സ്കൂൾ ഓഫ് മാത്തമാറ്റിക്സ്, കാലാവസ്ഥ വ്യതിയാന പഠനങ്ങൾ എന്നിവയിൽ സെന്റർ ഫോർ എക്സലൻസ് സ്ഥാപിക്കുന്നതിനും കണ്ണൂർ മാവിലായിലെ എ.കെ.ജി ഹെറിറ്റേജ് സ്ക്വയർ യാഥാർഥ്യമാക്കുന്നതിനും ചിലവന്നൂർ കനാലിന്‍റെ കനാൽ കേന്ദ്രീകൃത വികസനത്തിനും അംഗീകാരമുണ്ട്​.

കിഫ്​ബി പദ്ധതികൾ ഇതുവരെ

അനുമതി നൽകിയത്​ 87,378 കോടി, പൂർത്തിയായത്​​ 18,423 കോടിയുടേത്​

67,378.33 കോടി രൂപയുടെ 1140 അടിസ്ഥാനസൗകര്യ വികസന പദ്ധതികൾക്കും ലാൻഡ് അക്വിസിഷൻ പൂളിൽ ഉൾപ്പെടുത്തി 20,000 കോടി രൂപയുടെ ഏഴ് പദ്ധതികൾക്കുമാണ്​ ഇതുവരെ കിഫ്​ബി അനുമതി നൽകിത്​. ഫലത്തിൽ ആകെ 87,378 കോടി രൂപയുടെ 1147 പദ്ധതികൾ. അംഗീകാരം നൽകിയ പദ്ധതികൾക്കായി ഇതുവരെ വരെ 31,379 കോടി രൂപ ചെലവഴിച്ചു കഴിഞ്ഞു. 18,423.50 കോടി രൂപയുടെ പൂർത്തീകരിക്കാൻ കിഫ്‌ബിക്ക്​ സാധിച്ചിട്ടുണ്ട്.

ധനാനുമതി നൽകിയ പ്രധാന പദ്ധതികൾ

• തിരുവനന്തപുരത്തെ ടെക്നോപാർക്ക് ആറാം ഡിജിറ്റൽ സയൻസ് പാർക്കിന്‍റെ നിർമാണം.
• വയനാട്ടിലെ കാർബൺ ന്യൂട്രൽ കോഫി പാർക്കിന് ഭൂമി ഏറ്റെടുക്കൽ.
• കൊച്ചിയിലെ നഗര പുനരുജ്ജീവനവും സംയോജിത ജലഗതാഗതവും പദ്ധതിയിലെ 3 വികസന പ്രവർത്തനങ്ങൾ.
• വിവിധ ആശുപത്രികൾക്കായി മെഡിക്കൽ ഉപകരണങ്ങളും ആശുപത്രി ഫർണിച്ചറും വാങ്ങുന്നതിനുള്ള അംഗീകാരം.
• സാമൂഹിക പങ്കാളിത്തത്തിലൂടെ മനുഷ്യൻ-വന്യജീവി സംഘർഷം പരിഹരിക്കുന്നതിനുള്ള പദ്ധതി.
• തിരുവനന്തപുരം സർക്കാർ മെഡിക്കൽ കോളജിൽ ഹൈ ഡോസ് തെറപ്പി വാർഡ് വികസനം.
• എസ്.എ.റ്റി ആശുപത്രിയിലെ വനിത-ശിശു ബ്ലോക്ക്​ പ്രവർത്തനക്ഷമമാക്കുന്നതിനുമുള്ള അംഗികാരം.
• ആധുനിക ഗ്യാസ് ശ്‌മശാനങ്ങളുടെ നിർമാണം.
• വിവിധ പി.ഡബ്ല്യു.ഡി പദ്ധതികൾക്കായി ഭൂമി ഏറ്റെടുക്കുന്നതിന്​ അനുമതി
• ആലപ്പുഴ ജില്ലയിലെ മുണ്ടക്കൽ പാലം ചവറ ഭവൻ സി ബ്ലോക്ക് റോഡ് നിർമാണം.
• കൊട്ടാരക്കര ടൗണിൽ റോഡിന്‍റെ രണ്ടാംഘട്ട നിർമാണം.
• മലയോര ഹൈവേയുടെ ഭാഗമായി കോഴിക്കോട് ജില്ലയിലെ ചാവറാമ്മൂഴി പാലത്തിന്‍റെ നിർമാണം.
• വടകര നാരായണ നഗരം ഇൻഡോർ സ്റ്റേഡിയത്തിന്‍റെ രണ്ടാം ഘട്ടത്തിന്‍റെ നിർമാണം.
• തലശ്ശേരി പൈതൃക പദ്ധതിയുടെ മൂന്നാം ഘട്ടത്തിന്‍റെ ഭാഗമായി ചരിത്രപ്രസിദ്ധമായ തലശ്ശേരി-കടൽത്തറ ഓവർബറി പാലം/പ്ലാസയുടെ വികസനം
• പാൽകുളം തോടിന് കുറുകെ ചെക്ക് ഡാം-കം ബ്രിഡ്‌ജ്‌ നിർമാണം.