'എന്റെ വിധി' തീരുമാനിച്ചതാരെന്ന് കേരളത്തിനറിയാം; ടി.പി ഇപ്പോഴും സി.പി.എമ്മിനെ ഭയപ്പെടുത്തുന്നു -കെ.കെ.രമ

തിരുവനന്തപുരം: ടി.പി. ചന്ദ്രശേഖരൻ സി.പി.എമ്മിനെ ഇപ്പോഴും ഭയപ്പെടുത്തുന്നുണ്ടെന്ന് കെ.കെ. രമ എം.എൽ.എ. നിയമസഭയിൽ ഉൾ​പ്പടെ ടി.പി ചന്ദ്രശേഖരൻ ജീവിക്കുകയാണ്. പേടി കൊണ്ടാണ് എം.എം മണി ഇന്ന് നിയമസഭയിൽ വരാതിരുന്നതെന്നും കെ.കെ.രമ പറഞ്ഞു.

​'എന്റെ വിധി' തീരുമാനിച്ചതാരെന്ന് കേരളത്തിലെ ജനങ്ങൾക്കറിയാം. ടി.പി കേസിലെ പ്രതികളെ സംരക്ഷിക്കാൻ മുന്നോട്ടുവന്നത് സി.പി.എമ്മാണെന്നും ഇപ്പോഴും സംരക്ഷിക്കുന്നത് അവരാണെന്നും കെ.കെ രമ പറഞ്ഞു. ധീരജിന്റെ ​രക്തസാക്ഷിത്വത്തെ അപമാനിച്ചത് സംബന്ധിച്ചുള്ള മാധ്യമപ്രവർത്തകരുടെ ചോദ്യത്തിനും രമ മറുപടി പറഞ്ഞു. രക്തസാക്ഷിത്വത്തെ ആരും അപമാനിക്കരുതെന്നാണ് നിലപാടെന്നും വടകര എം.എൽ.എ പറഞ്ഞു.

കെ.കെ.രമക്കെതിരായ എം.എം മണിയുടെ പരാമർശത്തിനെതിരെ പ്രതിപക്ഷം നിയമസഭയിൽ വലിയ പ്രതിഷേധം ഉയർത്തിയിരുന്നു. എം.എം മണി മാപ്പു പറയാ​തെ പ്രതിഷേധത്തിൽ നിന്ന് പി​ന്നോട്ടില്ലെന്നും വി.ഡി സതീശൻ പറഞ്ഞിരുന്നു. എന്നാൽ, ഇക്കാര്യത്തിൽ നടപടിയെടുക്കാതെ ​നിയമസഭ നടപടികളുമായി സർക്കാർ മുന്നോട്ട് പോയതോടെ പ്രതിപക്ഷം നടുത്തളത്തിലിറങ്ങി. തുടർന്ന് നിയമസഭ ഇന്നത്തേക്ക് പിരിയുകയായിരുന്നു.