'കേരള മുസ്‌ലിം നവോത്ഥാനം, ചരിത്രവും ദർശനവും' ഗ്രന്ഥം ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന് സമ്മാനിച്ച് കെ.എൻ.എം

കെ.എൻ.എം ബുക്സ് പ്രസിദ്ധീകരിച്ച കേരള മുസ്‌ലിം നവോത്ഥാനം ചരിത്രവും ദർശനവും എന്ന ഗ്രന്ഥം ബി.ജെ.പി സംസ്ഥാന പ്രസിഡന്റ് കെ.സുരേന്ദ്രൻ ഉൾപ്പടെയുള്ള പ്രമുഖ വ്യക്തികൾക്ക് സമ്മാനിച്ചു. കെ.എൻ.എം സംസ്ഥാന നേതാക്കളാണ് പുസ്തകം നൽകിയത്. മന്ത്രി ആർ.ബിന്ദു, മുൻ കേരള ഹൈക്കോടതി ആക്ടിംഗ് ചീഫ് ജസ്റ്റീസ് സി.കെ. അബ്ദുറഹീം ഉൾപ്പടെയുള്ളവർ പുസ്തകം ഏറ്റുവാങ്ങി. കെ.എൻ.എം സംസ്ഥാന ഉപാധ്യക്ഷൻ ഡോ: ഹുസൈൻ മടവൂരാണ് തന്റെ ​ഫേസ്ബുക്ക് പേജിലൂടെ പുസ്തകം സമ്മാനിച്ചകാര്യം അറിയിച്ചത്.

കെ.സുരേന്ദ്രനെ സന്ദർശിച്ച സംഘത്തിൽ ഹുസൈൻ മടവൂരിനെക്കൂടാതെ ജില്ലാ സെക്രട്ടരി എൻ.കെ.എം.സകരിയ്യ, മണ്ഡലം ഉപാധ്യക്ഷൻ വി.പി.മുഹമ്മദ് ഉള്ളിയേരി എന്നിവരും ഉണ്ടായിരുന്നു. മുസ്‍ലിം വിരുദ്ധ രാഷ്ട്രീയത്തെ പ്രതിനിധീകരിക്കുന്ന ബി.ജെ.പിയുടെ സംസ്ഥാനഅധ്യക്ഷൻ കെ.സുരേന്ദ്രന് പുസ്തകം നൽകിയതിൽ സമൂഹമാധ്യമങ്ങളിൽ വിമർശനം ഉയർന്നിട്ടുണ്ട്. എന്നാൽ പുസ്തകം നൽകിയത് നല്ല കാര്യമാണെന്ന് അഭിപ്രായപ്പെടുന്നവരും ഉണ്ട്.