കൊച്ചിയിൽ 200 കോടിയുടെ എം.ഡി.എം.എ പിടികൂടി; സംസ്​ഥാനത്തെ ഏറ്റവും വലിയ മയക്കുമരുന്ന് വേട്ട

കൊച്ചി: കൊച്ചിയിൽ 200 കോടി രൂപ വിലവരുന്ന ലഹരി മരുന്ന് എക്സൈസ് എൻഫോഴ്​സ്​മ​​െൻറ്​ ആൻഡ്​​ ആൻറി നാർകോട്ടിക്​ സ്​പെഷൽ സ്​ക്വാഡ്​ പിടികൂടി. 32 കിലോ തൂക്കമുള്ള എം.ഡി.എം.എ(മെത്തലിൻ ഡയോക്സി മെത്തഫിറ്റമിൻ) എന്ന ലഹരി പദാർഥമാണ്​ പിടികൂടിയത്. കേരളത്തിൽ ആദ്യമായാണ് ഇത്രയും വലിയ തുകയുടെ ലഹരിമരുന്നു പിടികൂടുന്നത​്​. നഗരത്തിലെ പാഴ്‌സൽ സർവിസ് വഴി എട്ട് വലിയ പെട്ടികളിലാക്കി മലേഷ്യയിലേക്ക്​ കടത്താൻ പദ്ധതിയിട്ടതായി​ കരുതുന്ന ലഹരിമരുന്ന്​ എക്സൈസ് ഡെപ്യൂട്ടി കമീഷണർ എ.എസ്. രഞ്ജിത്തിനു ലഭിച്ച രഹസ്യവിവരത്തി​​​െൻറ അടിസ്ഥാനത്തിൽ നടത്തിയ പരിശോധനയിലാണ്​​ പിടികൂടിയത്​.

എറണാകുളം ഷേണായിസ്​ തിയറ്ററിന്​ സമീപത്തെ കൊറിയർ സർവിസിലാണ്​ പാഴ്സലുകൾ​ക്കിടയിൽ സുരക്ഷിതമായി പൊതിഞ്ഞ്​ കൈമാറ്റത്തിന്​ ഒരുക്കിയ നിലയിൽ മയക്കുമരുന്ന്​ കണ്ടെത്തിയത്​. പരിശോധനയിൽ കണ്ടെത്താതിരിക്കുന്നതിന് കറുത്ത ഫിലിമുകൾ കൊണ്ടു പൊതിഞ്ഞ ശേഷം തുണികൾക്കിടയിൽ ഒളിപ്പിച്ചാണു കടത്താൻ ശ്രമിച്ചത്. സംഭവത്തിൽ രണ്ടുപേരെ കേന്ദ്രീകരിച്ച് അന്വേഷണം പുരോഗമിക്കുകയാണെന്ന് എക്സൈസ് ഉദ്യോഗസ്ഥർ വ്യക്തമാക്കി. രാജ്യത്തിന്​ പുറത്തേക്കും അന്വേഷണം വ്യാപിപ്പിക്കും. പ്രതികളെ ഉടൻ അറസ്​റ്റ്​ ചെയ്യാൻ കഴിയുമെന്നാണ്​ പ്രതീക്ഷയെന്നും ഉദ്യോഗസ്​ഥർ പറഞ്ഞു.

കടുത്ത മയക്കുമരുന്ന് ഇനത്തിൽപെട്ടതും അന്താരാഷ്​്​്ട്ര വിപണിയിൽ 200 കോടി വിലമതിക്കുന്നതുമാണ് ഈ ലഹരി പദാർഥം. എക്സൈസ് വകുപ്പി​​​െൻറ ചരിത്രത്തിലെ ഏറ്റവും വലിയ മയക്കുമരുന്ന് വേട്ടയാണിത്. 1927ൽ കണ്ടുപിടിക്കപ്പെട്ട സിന്തറ്റിക് ഇനത്തിൽപ്പെട്ട ഇൗ മയക്കുമരുന്ന്​ ലോക വ്യാപകമായി നിരോധിച്ചിട്ടുള്ളതാണ്​. എം.ഡി.എം.എ ചെറിയ അളവിൽ ഉപയോഗിച്ചാൽ പോലും എട്ട് മുതൽ 10 മണിക്കൂർ വരെ ഇതി​​​െൻറ ലഹരി നിലനിൽക്കുമെന്നാണ്​ വിദഗ്​ധർ പറയുന്നത്​. സ്പെഷൽ സ്ക്വാഡ് സർക്കിൾ ഇൻസ്പെക്ടർ ബി.സുരേഷ്, എക്സൈസ് ഇൻസ്പെക്ടർ ടി.ജി. കൃഷ്ണകുമാർ, സിവിൽ എക്സൈസ് ഓഫിസർ എൻ.ജി അജിത്കുമാർ, എൻ.ഡി ടോമി, പി.ഇ. ഉമ്മർ എന്നിവർ അന്വേഷണ സംഘത്തിലുണ്ടായിരുന്നു. ​