കൊടകര ​കുഴൽപ്പണം: തിരൂർ സതീഷിന്‍റെ രഹസ്യമൊഴി തിങ്കളാഴ്ച രേഖപ്പെടുത്തും

തൃശൂർ: കഴിഞ്ഞ നിയമസഭ തെരഞ്ഞെടുപ്പ്​ സമയത്ത്​ ബി.ജെ.പി തൃശൂർ ജില്ല കമ്മിറ്റി ഓഫീസിൽ ആറ്​ ചാക്കുകളിലായി ഒമ്പത്​ കോടി രൂപ കുഴൽപ്പണം എത്തിയെന്ന്​ വെളിപ്പെടുത്തിയ മുൻ ഓഫീസ്​ സെക്രട്ടറി തിരൂർ സതീഷിന്‍റെ രഹസ്യ മൊഴി തിങ്കളാഴ്ച രേഖപ്പെടുത്തും. വൈകിട്ട്​ നാലിന്​ രഹസ്യ മൊഴി രേഖപ്പെടുത്താൻ കുന്നംകുളം ജുഡീഷ്യൽ ഒന്നാം ക്ലാസ്​ മജിസ്​ട്രേറ്റ്​ കോടതിയിൽ ഹാജരാകാനുള്ള നോട്ടീസ്​ ലഭിച്ചതായി സതീഷ്​ ‘മാധ്യമ’ത്തോട്​ പറഞ്ഞു.

വിവാദമായ കൊടകര കുഴൽപ്പണ കേസ്​ അന്വേഷണം മരവിപ്പിൽ നിൽക്കുമ്പോഴാണ്​ അടുത്തിടെ മാധ്യമങ്ങളിലൂടെ സതീഷിന്‍റെ വെളിപ്പെടുത്തൽ ഉണ്ടായത്​. ഒമ്പത്​ കോടി രൂപ എത്തിയെന്നും താൻ അടക്കമുള്ളവരാണ്​ ചാക്കുകൾ ഓഫീസിലേക്ക്​ ചുമന്ന്​ കയറ്റിയതെന്നും പിന്നീട്​ ആ പണച്ചാക്കുകൾക്ക്​ കാവൽ ഇരുന്നുവെന്നും സതീഷ്​ പറഞ്ഞിരുന്നു. ഈ പണത്തിൽ ഒരു ഭാഗം ആലപ്പുഴയിലേക്ക്​ കൊണ്ടുപോകുമ്പോഴാണ്​ ​കൊടകരയിൽ വാഹനാപകടം സൃഷ്ടിച്ച്​ തട്ടിയെടുത്തത്​.

ഈ പണമത്രയും ബി.ജെ.പിക്ക്​ നിയമസഭ തെരഞ്ഞെടുപ്പിൽ ഉ​പയോഗിക്കാൻ കൊണ്ടുവന്നതാണെന്ന്​ കൊടകര കുഴൽപ്പണ കേസ്​ അന്വേഷിച്ച പൊലീസ്​ കണ്ടെത്തിയിരുന്നു. ഇതല്ലാതെ വേറെയും പണം വന്നതായും അതുമായി ബി.ജെ.പിക്ക്​ നേതാക്കൾക്ക്​ ബന്ധമുണ്ടെന്നും പൊലീസ്​ കോടതിയിൽ ഹാജരാക്കിയ കുറ്റപത്രത്തിൽ പറഞ്ഞു. ഇതിന്മേൽ നടപടി ഇല്ലാതിരിക്കെയാണ്​ സതീഷിന്‍റെ വെളിപ്പെടുത്തൽ വന്നത്​.

വെളിപ്പെടുത്തലിന്‍റെ സാഹചര്യത്തിൽ കൊടകര കുഴൽപ്പണ കേസിൽ തുടരന്വേഷണത്തിന്​ സർക്കാർ തീരുമാനിക്കുകയും അന്വേഷണ സംഘം രൂപവത്​കരിക്കുകയും ചെയ്തിരുന്നു. തുടരന്വേഷണത്തിന്​ കോടതിയുടെ അനുമതി ലഭിച്ചതോടെ സതീഷിന്‍റെ വിശദമായ മൊഴിയെടുത്തു. തുടർ നടപടിയുടെ ഭാഗമായാണ്​ ​ഇപ്പോൾ മജിസ്​ട്രേറ്റ്​ രഹസ്യമൊഴി രേഖപ്പെടുത്തുന്നത്​.

അന്ന്​ ​കൊണ്ടുവന്ന പണത്തിൽ ഒന്നര കോടിയോളം രൂപ ഒരു മാസം കഴിഞ്ഞ ബി.ജെ.പി തൃശൂർ ജില്ല പ്രസിഡന്‍റ്​ കെ.കെ. അനീഷ്മാ കുമാറിന്‍റെ കാറിൽ ഒരു ചാക്കിലും രണ്ട്​ ബിഗ്​ ഷോപ്പറിലുമായി കൊണ്ടുപോയിരുന്നുവെന്നും സതീഷ്​ കഴിഞ്ഞദിവസം പറഞ്ഞിരുന്നു.