യുദ്ധഭ്രാന്ത്​ സൃഷ്​ടിച്ച്​ തെരഞ്ഞെടുപ്പ്​ അട്ടിമറിക്കാൻ ശ്രമം -കോടിയേരി

നെടുങ്കണ്ടം: അതിർത്തി കടന്നുള്ള ആക്രമണം രാജ്യത്ത്​ നടക്കാനിരിക്കുന്ന തെരഞ്ഞെടുപ്പ്​ അട്ടിമറിക്കാനുള്ള ആർ.എ സ്​.എസ്​-ബി.ജെ.പി ശ്രമത്തി​​​െൻറ ഭാഗമാണെന്ന്​ സംശയിക്കണമെന്ന്​ സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ ണൻ. യുദ്ധമുണ്ടാക്കി തെരഞ്ഞെടുപ്പ്​ പ്രക്രിയ അട്ടിമറിക്കാനാണ്​ ശ്രമം. കേരള സംരക്ഷണയാത്രക്ക്​ നെടുങ്കണ്ടത്ത് ലഭിച്ച സ്വീകരണത്തിൽ സംസാരിക്കുകയായിരുന്നു അദ്ദേഹം.

രാജ്യത്ത്​ മുസ്​ലിം വിരോധം സൃഷ്​ടിച്ച്​ വർഗീയ ധ്രുവീകരണത്തിനാണ് ആർ.എസ്​.എസ്​ ശ്രമം. കശ്മീർ വിഷയം പരിഹരിക്കുന്നതിന്​ പകരം പ്രശ്നം വഷളാക്കി കാശ്മീരി ജനതയെ ശത്രുക്കളാക്കുന്ന സമീപനമാണ് ബി.ജെ.പി സർക്കാർ സ്വീകരിക്കുന്നത്. കശ്മീരികളെ രാജ്യത്തിനൊപ്പം നിർത്തണം. പരാജയഭീതി മണത്ത ബി.ജെ.പി സർക്കാർ രാജ്യത്ത്​ യുദ്ധഭ്രാന്ത് സൃഷ്​ടിച്ച്​ വർഗീയ ധ്രുവീകരണത്തിനാണ് ശ്രമിക്കുന്നതെന്നും കോടിയേരി ആരോപിച്ചു.

റിസർവ് ബാങ്കി​​​െൻറ പണം പോലും കൊള്ളയടിക്കാൻ ശ്രമിച്ചയാളാണ് മോദി. ലോക്സഭ ​െതരഞ്ഞെടുപ്പിൽ 2004ന് സമാനമായി രാജ്യത്ത് ഇടതുപക്ഷ പ്രസ്ഥാനങ്ങൾ ശക്തമായി തിരിച്ചുവരും. കോൺഗ്രസി​​​െൻറയും ബി.ജെ.പിയുടെയും അടിത്തറ തകരുകയാണെന്ന് ജനം തിരിച്ചറിഞ്ഞ് കഴിഞ്ഞു. എൽ.ഡി.എഫ് വിശ്വാസികൾക്കെതിരാണെന്ന് വരുത്തിത്തീർക്കാൻ ചില കേന്ദ്രങ്ങൾ ശ്രമിക്കുന്നുണ്ട്.

സുപ്രീംകോടതി ഉത്തരവ് ഇറക്കിയതിന്, ​െതരഞ്ഞെടുപ്പിൽ എൽ.ഡി.എഫിനെ ഞങ്ങൾ കാണിച്ചുതരാം എന്നാണ് ചിലർ പറയുന്നത്. ഇവിടെ കോടതി ഒരു നിയോജക മണ്ഡലത്തിലും മത്സരിക്കുന്നില്ല. വിശ്വസ സമൂഹത്തെ ഇടതുപക്ഷത്തിനെതിരെ തിരിച്ച് നേട്ടമുണ്ടാക്കാനാണ് യു.ഡി.എഫും ബി.ജെ.പിയും ശ്രമിക്കുന്നതെന്നും കോടിയേരി പറഞ്ഞു. സംഘാടക സമിതി ചെയർമാൻ പി.കെ. സദാശിവൻ അധ്യക്ഷത വഹിച്ചു.