കോടിയേരി ബാലകൃഷ്ണൻ വർഗീയ ശക്​തികളുടെ ടെലി പ്രോംപ്​റ്റർ -ഷാഫി പറമ്പിൽ

സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ വർഗീയ ശക്​തികളുടെ ടെലിപ്രോംപ്​റ്റർ ആയി അധഃപതിച്ചിരിക്കുകയാണെന്ന്​ കോൺഗ്രസ്​ എം.എൽ.എ ഷാഫി പറമ്പിൽ.

വര്‍ഗീയ പ്രചരണം നിര്‍ത്തിയിട്ട് കൊള്ളാവുന്ന ആരെയെങ്കിലും ആഭ്യന്തര വകുപ്പിന്റെ തലപ്പത്ത് ഇരുത്താന്‍ കോടിയേരി തയാറാകണം. ഗുണ്ടകള്‍ക്ക് പൊലീസിനെ പുല്ലുവിലയാണെന്നും ആഭ്യന്തരവകുപ്പ് ദുരന്തമായി മാറിയെന്നും ഷാഫി പറഞ്ഞു. ഭരണ പരാജയത്തെ വർഗീയത കൊണ്ട്​ മറച്ചുപിടിക്കാൻ നടത്തുന്ന ശ്രമങ്ങൾ വൃഥാവിലാകുമെന്ന്​ കോടിയേരിയും സി.പി.എമ്മും മനസിലാക്കണം.

ആഭ്യന്തര മന്ത്രിയുടെ ഭരണ പരാജയം കോൺഗ്രസ്​ നേതാക്കളുടെ ഹിന്ദു മുസ്​ലിം പട്ടിക തയ്യാറാക്കി വെച്ചുകൊണ്ട്​ മറച്ചുവെക്കാൻ കഴിയും എന്ന്​ കോടിയേരി ദിവാസ്വപ്നം കാണേണ്ടതില്ല. ജനകീയ പ്രശ്നങ്ങൾ അതിന്‍റെ മൂർധന്യത്തിൽ നിൽ​ക്കുമ്പോൾ മൈക്ക്​ കെട്ടി വർഗീയത പറയുന്ന ഏർപ്പാട്​ സി.പി.എം നിർത്തണം എന്നും ഷാഫി പറഞ്ഞു.