പാർട്ടി നേതാവ്​ ദേവസ്വം ബോർഡ്​ പ്രസിഡൻറാകുന്നതിൽ തെറ്റില്ല; വിശ്വാസ സംരക്ഷണമാണ് ലക്ഷ്യമെന്ന്​ കോടിയേരി

പത്തനംതിട്ട: പാർട്ടി നേതാവ്​ ദേവസ്വം ബോർഡ്​ പ്രസിഡൻറാകുന്നത്​ ആദ്യമായ​െല്ലന്ന്​ സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ണൻ. സി.പി.എം ജില്ല സമ്മേളനത്തിൽ പ്രതിനിധികൾ ഉയർത്തിയ വിമർശനങ്ങൾക്ക്​ മറുപടി പറയുകയായിരുന്നു അദ്ദേഹം. പി.കെ. ചന്ദ്രാനന്ദൻ ബോർഡ്​ പ്രസിഡൻറായത്​ അദ്ദേഹം ചൂണ്ടിക്കാട്ടി. വിശ്വാസ സംരക്ഷണമാണ് ലക്ഷ്യം. കെ. അനന്തഗോപ​െൻറ നിയമനത്തിൽ ഒരുതെറ്റുമില്ല. ദേവസ്വം ബോർഡ്​ പ്രസിഡൻറ്​ സ്ഥാനത്തേക്ക് ഇനിയും പാർട്ടി നേതാക്കളെ നിയമിക്കേണ്ടിവരും.

ആത്മാർഥമായി പ്രവർത്തിക്കുന്നവർക്ക്​ പാർട്ടിയിൽ അംഗീകാരം ലഭിക്കും. പാർട്ടി അംഗങ്ങൾ ദൈവനാമത്തിൽ സത്യപ്രതിജ്ഞ ചെയ്യുന്നതിൽ തെറ്റില്ല. പാർട്ടി ബോധവും ബൗദ്ധികനിലവാരവും അനുസരിച്ചാണ് ജനപ്രതിനിധികൾ സത്യപ്രതിജ്ഞ ചെയ്യുന്നത്​. ദൈവനാമത്തിൽ സത്യപ്രതിജ്ഞ ചെയ്യരുതെന്ന് പാർട്ടി ആരെയും വിലക്കിയിട്ടില്ല. ഇടതുപക്ഷം ഇടതുപക്ഷ മുന്നണിയായിതന്നെ തുടരും. സി.പി.ഐയുമായി ബന്ധപ്പെട്ട വിഷയങ്ങൾ ചർച്ച ചെയ്തുപരിഹരിക്കും.

കെ-​റെയിൽ സംസ്ഥാനത്ത് അനിവാര്യമായ പദ്ധതിയാണ്​. എതിർപ്പ് ഉന്നയിക്കുന്നവരെ കാര്യങ്ങൾ ബോധിപ്പിക്കും. മുമ്പും എതിർപ്പുയർന്ന പദ്ധതികൾ ഇടതു സർക്കാറുകൾ നടപ്പാക്കിയിട്ടുണ്ട്. അത്തരത്തിൽ വിവിധ വിഷയങ്ങളിൽ ഉയർന്ന എതിർപ്പുകൾ മറികടക്കാൻ ഇടതുസർക്കാറുകൾക്കായിട്ടുണ്ടെന്നും കോടിയേരി പറഞ്ഞു.