നഷ്ടക്കണക്കിൽ കെ.എസ്​.ആർ.ടി.സി; ലാഭക്കള്ളിയിൽ കെ.എസ്​.എഫ്​.ഇ

തിരുവനന്തപുരം: പൊതുമേഖലാ സ്ഥാപനങ്ങളിൽ നഷ്ടക്കണക്കിൽ മുന്നിൽ കെ.എസ്​.ആർ.ടി.സി. 2020-21 കാലയളവിൽ 1976 കോടിയാണ്​ നഷ്ടം. തൊട്ടുപിന്നിൽ 1822 കോടി നഷ്ടത്തിൽ കെ.എസ്​.ഇ.ബിയും. ബിവറേജസ്​ കോർപറേഷനാണ്​ മൂന്നാംസ്ഥാനത്ത്​ -1608 കോടി. 504 കോടിയുടെ നഷ്​ടമുള്ള ജല ​അതോറിറ്റിയും ഒട്ടും പിന്നിലല്ല.

ബജറ്റിനൊപ്പം നിയമസഭയിൽ സമർപ്പിച്ച പൊതുമേഖലാ സ്ഥാപനങ്ങളു​ടെ പ്രവർത്തനം സംബന്ധിച്ച്​ അവലോകന റി​പ്പോർട്ടിലാണ്​ ഇക്കാര്യമുള്ളത്​. കെ.ടി.ഡി.എഫ്​.സി -63.30 കോടി, കശുവണ്ടി വികസന കോർപറേഷൻ-55.48 കോടി, സിവിൽ സപ്ലൈസ്​ കോർപറേഷൻ 39.44 കോടി, സ്​റ്റേറ്റ്​ ടെക്​സ്​റ്റൈൽ കോർപറേഷൻ 38.87 കോടി എന്നിങ്ങനെയാണ്​ നഷ്ടത്തിലുള്ള മറ്റ്​ സ്ഥാപനങ്ങൾ.

ലാഭക്കണക്കിൽ മുന്നിലുള്ള 10​ പൊതുമേഖലാ സ്ഥാപനങ്ങളിൽ ഒന്നാമത്​​ കെ.എസ്​.എഫ്​.ഇയാണ്​. 146.41 കോടിയുടെ മികവാണ്​ 2020-21 കാലയളവിൽ കെ.എസ്​.എഫ്​.ഇക്ക്​ അവകാശപ്പെടാനുള്ളത്​. തൊട്ടുപിന്നിലുള്ള കെ.എം.എം.എല്ലിന്​ 85.28 കോടിയുടെ നേട്ടമാണുള്ളത്​. 36.07 കോടി ലാഭം കൊയ്ത കേരള ഫീഡ്​സാണ്​ മൂന്നാമത്​. ഇൻഡസ്​ട്രിയൽ ഡെവലപ്​മെന്‍റ്​ കോർപറേഷൻ -26.62 കോടി, സംസ്ഥാന പിന്നാക്കവിഭാഗ വികസന കോർപറേഷൻ-23.60 കോടി, കെ.എം.എസ്​.സി.എൽ-22.89 കോടി, റോഡ്​ ഇൻഫ്രാസ്​ട്രക്​ചർ കമ്പനി-17.80 കോടി, ഫാർമസ്യൂട്ടിക്കൽ കോർപറേഷൻ -16.92 കോടി, സ്​​റ്റേറ്റ്​ ​ഡ്രഗ്​സ്​ ആൻഡ്​​ ഫാർമസ്യൂട്ടിക്കൽസ്​ ലിമിറ്റഡ്​ -15.75 കോടി, ഇൻഡസ്​ട്രിയൽ ഇൻഫ്രാസ്​ട്രക്​ചർ ഡെവലപ്​മെന്‍റ്​ കോർപറേഷൻ-15.48 കോടി എന്നിങ്ങനെയാണ്​ ലാഭത്തിലുള്ള മറ്റ്​ സ്ഥാപനങ്ങൾ. നഷ്ടത്തിലാണെങ്കിലും വിറ്റുവരവിന്‍റെ കാ​ര്യത്തിൽ മുന്നിലാണ്​ കെ.എസ്​.ഇ.ബി. 2020-21 കാലയളവിൽ 14420 കോടിയാണ്​ കെ.എസ്​.ഇ.ബിയുടെ വിറ്റുവരവ്​. 5176 കോടി വിറ്റുവരവുള്ള സിവിൽ സപ്ലൈസ്​ കോർപറേഷനാണ്​ രണ്ടാമത്​. കെ.എസ്​.എഫ്​.ഇയാണ്​ മൂന്നാമത്​ (2991 ​കോടി). 2527 കോടിയുടെ വിറ്റുവരവുള്ള ബിവറേജസ്​ കോർപറേഷൻ തൊട്ടുപിന്നിലുണ്ട്​. ജീവനക്കാരുടെ കാര്യത്തിൽ മുന്നിൽ കെ.എസ്​.ഇ.ബിയാണ്​. 32,518 പേരാണ്​ കെ.എസ്​.ഇ.ബിയിലുള്ളത്​. 30,060 ജീവനക്കാരുള്ള കെ.എസ്​.ആർ.ടി.സിയാണ്​ രണ്ടാം സ്ഥാനത്ത്​.