ഓടിക്കൊണ്ടിരുന്ന ബസിന്‍റെ വാതിൽ തുറന്നു; വിദ്യാർഥിക്ക് റോഡിൽ വീണ് പരിക്ക്​

ആലുവ: ഓടിക്കൊണ്ടിരുന്ന കെ.എസ്.ആർ.ടി.സി ബസിന്‍റെ വാതിൽ തുറന്ന്​ റോഡിൽ വീണ വിദ്യാർഥിക്ക്​ ഗുരുതര പരിക്ക്​. തൃക്കാക്കര ഭാരത് മാത കോളജ് വിദ്യാർഥി ഉളിയന്നൂർ ഇന്ദീവരത്തിൽ വിഷ്ണുവിനാണ് (19) പരിക്കേറ്റത്.

ചൊവ്വാഴ്ച രാവിലെ 8.30ഓടെ ദേശീയ പാതയിൽ കമ്പനിപ്പടി എഫ്.ഐ.ടി പരിസരത്താണ് സംഭവം. ആലുവയിൽ നിന്നാണ്‌ വിഷ്ണു ബസിൽ കയറിയത്. തിരക്കായിരുന്നതിനാൽ ചവിട്ടുപടിയിലാണ് നിന്നിരുന്നത്​. ഇതിനിടയിലാണ് വാതിൽ തുറന്നു പോയത്.

റോഡിൽ തലയടിച്ച് വീണ വിഷ്ണുവിനെ ഉടൻ ആലുവയിലെ സ്വകാര്യ ആശുപത്രിയിലും പിന്നീട്​ എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു. കൈയോ മറ്റോ ലോക്കിൽ തട്ടിയതിനെ തുടർന്നാണ് വാതിൽ തുറന്നു പോയതെന്നാണ് കരുതുന്നതെന്ന്​ പൊലീസ് പറഞ്ഞു.