ഒരുതരി സ്വർണംപോലും വീട്ടിലില്ല; സ്വത്ത്​ വിവരം വെളിപ്പെടുത്തി കെ.ടി. ജലീൽ

കൊച്ചി: എൻഫോഴ്സ്മെന്‍റ് ഡയറക്ടേറ്റിന് (ഇ.ഡി) മുന്നിൽ സ്വത്ത് വിവരം വെളിപ്പെടുത്തി മന്ത്രി കെടി ജലീൽ. ഒരുതരി സ്വർണംപോലും വീട്ടിലില്ലെന്നും നാലര ലക്ഷം രൂപയാണ്​ സ്വന്തം സമ്പാദ്യമെന്നും എൻഫോഴ്​സ്​മെൻറ്​ ഡയറക്​ടറേറ്റിനോട്​ കെ.ടി. ജലീൽ പറഞ്ഞു. സ്വർണക്കടത്ത്​ കേസുമായി ബന്ധപ്പെട്ട അന്വേഷണത്തി​െൻറ ഭാഗമായാണ്​ ജലീലിനോട്​ സ്വത്തുവിവരങ്ങൾ സമർപ്പിക്കാൻ ഇ.ഡി ആവശ്യപ്പെട്ടത്​. സമീപകാലത്ത്​ മന്ത്രിയുടെ സ്വത്തിൽ വർധനയുണ്ടായിട്ടുണ്ടോ എന്ന്​ പരിശോധിക്കുന്നതിനാണ്​ ഇത്​.

നേരത്തെ ചോദ്യം ചെയ്യലിനിടെ സ്വത്ത്​ സംബന്ധിച്ച കാര്യങ്ങൾ ജലീൽ വിശദീകരിച്ചിരുന്നു. തുടർന്ന്​ ഇ.ഡി നിർദേശിച്ചതുപ്രകാരം വിവരങ്ങൾ രേഖാമൂലം സമർപ്പിക്കുകയായിരുന്നു. ആകെയുള്ളത്​ 19.5 സെൻറ്​ സ്ഥലവും വീടുമാണെന്നാണ്​ രേഖകളിൽ വ്യക്തമാക്കിയിട്ടുള്ളത്​. അധ്യാപികയായ ഭാര്യയുടെ 27 വർഷത്തെ ശമ്പളത്തിൽനിന്നുള്ള സമ്പാദ്യമായി 22 ലക്ഷവുമുണ്ട്​. മകൾക്ക്​ 36,000 രൂപയും മകന്​ 500 രൂപയുമാണ്​ ബാങ്ക്​ ബാലൻസ്​. ഭാര്യ​യും മക്കളും സ്വർണം ധരിക്കുന്നവരല്ല. കനറാ ബാങ്ക്​ വളാഞ്ചേരി ശാഖയിൽനിന്ന്​ അഞ്ചുലക്ഷം രൂപ ഭവനവായ്​പ എടുത്തിട്ടുണ്ട്​. ഇതിൽ ഒന്നര ലക്ഷം തിരിച്ചടക്കാനുണ്ട്​.

മലപ്പുറം ജില്ലയിലെ രണ്ട്​ സഹകരണ സംഘത്തിലായി 5000 രൂപയുടെ ഓഹരികളുണ്ട്​. ഒന്നര ലക്ഷം രൂപയിൽ താഴെ വിലയുള്ള ഫർണിച്ചറും 1500 പുസ്​തകങ്ങളും വീട്ടിലുണ്ട്​. നാലര വർഷത്തിനിടെ ആറുതവണ വിദേശരാജ്യങ്ങൾ സന്ദർശിച്ചു. രണ്ടുതവണ യു.എ.ഇയും റഷ്യ, അമേരിക്ക, മാലദ്വീപ്​, ഖത്തർ രാജ്യങ്ങൾ ഒരുതവണ വീതവും സന്ദർശിച്ചെന്ന്​ ജലീൽ വെളിപ്പെടുത്തി.