പരിചയക്കാർ ചെയ്യുന്ന തെറ്റുകൾക്ക് ഞാൻ ഉത്തരവാദിയാകുന്നതെങ്ങനെ -ജലീൽ

കോട്ടക്കൽ: വളാഞ്ചേരി നഗരസഭ കൗൺസിലർക്കെതിരായ പീഡനക്കേസുമായി ബന്ധപ്പെട്ട്​ തനിക്കെതിരെ ചിലരുന്നയിച്ച ആരോപണം അടിസ്ഥാനരഹിതമെന്ന് മന്ത്രി ഡോ. കെ.ടി. ജലീൽ. കൗൺസിലറെ രക്ഷിക്കാൻ താൻ ശ്രമിച്ചിട്ടില്ല. തെറ്റ്​ ചെയ്​തവർ ആരായാലും ശിക്ഷിക്കപ്പെടണം. നേരത്തെ പെൺകുട്ടിയുടെ മാതാപിതാക്കൾ തന്നെ ഫോണിൽ വിളിച്ച് പരാതി പറഞ്ഞിരുന്നു. അന്നുതന്നെ വളാഞ്ചേരി പൊലീസിൽ ഇക്കാര്യമറിയിച്ചു. പിറ്റേന്നുതന്നെ സ്​റ്റേഷനി​െല ഒരു ഉദ്യോഗസ്​ഥൻ തന്നെ വിളിച്ച്​ ആ കുട്ടിയെ കിട്ടിയെന്നറിയിച്ചതുമാണ്​.

അതാണ്​ സംഭവിച്ചത്​. സ്​റ്റേഷനിലെ രേഖകൾ പരിശോധിച്ചാൽ ഇക്കാര്യം വ്യക്തമാകുമെന്നും ജലീൽ പറഞ്ഞു. വളാഞ്ചേരിയിലെ ഓരോ വ്യക്തികളുമായും അടുത്ത്​ പരിചയമുള്ളയാളാണ് താൻ. രാഷ്​ട്രീയത്തിനപ്പുറം ബന്ധമുള്ളതിനാലാണ്​ ഞാൻ ലീഗ്​ കോട്ടയായ കുറ്റിപ്പുറത്ത്​ ജയിച്ചത്​. മന്ത്രിയെന്ന നിലയിലും പലരും വിളിക്കാറുണ്ട്​. പരിചയത്തിലുള്ളവർ ചെയ്യുന്ന തെറ്റുകൾക്ക് താൻ ഉത്തരവാദിയാകുന്നതെങ്ങനെയെന്നും മന്ത്രി ചോദിച്ചു.