താനുൾ​െപ്പടെ ആരും അനിവാര്യരല്ല; ചെറുപ്പക്കാർക്ക് പ്രാതിനിധ്യം വേണം -കെ.വി. തോമസ് എം.പി

കൊച്ചി: ലോക്സഭ തെരഞ്ഞെടുപ്പിൽ ചെറുപ്പക്കാരായ സ്ഥാനാർഥികൾക്ക് പ്രാതിനിധ്യം നൽകണമെന്ന് പ്രഫ. കെ.വി. തോമസ് എം.പി. കൊച്ചിയിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. ഇക്കാര്യത്തിൽ യൂത്ത് കോൺഗ്രസി​​െൻറ ആവശ്യം ന്യായമാണ്. യുവാക്കളാണ് രാജ്യത്തെ നയിക്കേണ്ടവർ. എന്നാൽ, സ്ഥാനമാനങ്ങൾ കിട്ടുന്നതിനൊപ്പം ഉത്തരവാദിത്തവും അവർ പ്രകടിപ്പിക്കേണ്ടതുണ്ട്.

തെരഞ്ഞെടുപ്പിൽ ജയസാധ്യതക്കാണ് പ്രധാനം. പുതുമുഖങ്ങളാണെങ്കിലും ജയിക്കേണ്ടതുണ്ട്. രാഷ്​ട്രീയത്തിൽ താനുൾ​െപ്പടെ ആരും അനിവാര്യരല്ല. താൻ മത്സരിക്കണമോയെന്നത് തീരുമാനിക്കേണ്ടത് ഡൽഹിയിൽ നിന്നാണ്. പാർട്ടി പറയുന്നതെന്തായാലും അനുസരിക്കും. സിറ്റിങ് എം.പിമാർ മത്സരിക്കണമോയെന്ന കാര്യം തീരുമാനിക്കേണ്ടത് ഹൈകമാൻഡും കെ.പി.സി.സി നേതൃത്വവുമാണെന്ന് ചോദ്യത്തിന് മറുപടിയായി അദ്ദേഹം പറഞ്ഞു. എം.പി എന്ന സ്ഥാനമില്ലെങ്കിലും ചെയ്യാൻ മറ്റ്​ നിരവധി കാര്യങ്ങളുണ്ട്. 1984ൽ ജയിച്ച് ഡൽഹിയിൽ പോയപ്പോഴുള്ള കൊച്ചിയല്ല ഇന്നത്തേത്. ഇതുവരെയുള്ള പൊതുപ്രവർത്തനത്തിൽ വ്യക്തിപരമായി സന്തുഷ്​ടനാണെന്നും അദ്ദേഹം കൂട്ടിച്ചേർത്തു.

കൊച്ചി ക​െണ്ടയ്​നർ റോഡ് ടോൾ പിരിവുമായി ബന്ധപ്പെട്ട പ്രശ്നങ്ങൾ ചർച്ച ചെയ്ത് പരിഹരിക്കാൻ മുഖ്യമന്ത്രി മുൻകൈയെടുക്കണമെന്ന് അദ്ദേഹം ആവശ്യപ്പെട്ടു. ഇതുമായി ബന്ധപ്പെട്ട്​ ഫലപ്രദമായ ചർച്ചയൊന്നും നടന്നിട്ടില്ല. ജില്ല ഭരണകൂടവും ദേശീയപാത അധികൃതരും സമ്മതിച്ചതുപോലെ സർവിസ് റോഡ്, അണ്ടർപാസ് റോഡ് എന്നിവ പൂർത്തിയാക്കിയശേഷമേ ടോൾപിരിവ് തുടങ്ങാവൂ. നൂറുകണക്കിന് കണ്ടെയ്​നറുകൾക്ക് പാർക്കിങ് സൗകര്യമുൾ​െപ്പടെ ഒരുക്കണം. സമരവുമായി ബന്ധപ്പെട്ട കേസുകൾ അവസാനിപ്പിക്കണമെന്നും അദ്ദേഹം ആവശ്യപ്പെട്ടു.