പീഡനക്കേസിൽ പ്രതിയായ അഭിഭാഷകൻ മുൻകൂർ ജാമ്യ ഹരജി നൽകി

കൊച്ചി: നിയമസഹായം തേടിയെത്തിയ യുവതിയെ പീഡനത്തിനിരയാക്കിയ കേസിൽ പ്രതിയായ അഭിഭാഷകൻ പി.ജി. മനു ഹൈകോടതിയിൽ മുൻകൂർ ജാമ്യ ഹരജി നൽകി. പീഡനമടക്കം കുറ്റങ്ങൾ ചുമത്തി ചോറ്റാനിക്കര പൊലീസ്​ രജിസ്റ്റർ ചെയ്ത കേസിൽ അറസ്റ്റ്​ തടയണമെന്ന്​ ആവശ്യ​പ്പെട്ടാണ്​ ഹരജി.

മറ്റൊരു പീഡനക്കേസിൽ ഇരയായ ​യുവതി ഈ കേസ്​ ഒത്തുതീർക്കാൻ നടപടികൾ സ്വീകരിക്കേണ്ടതുമായി ബന്ധപ്പെട്ട കാര്യങ്ങൾക്ക്​ നിയമസഹായം തേടിയാണ്​ തന്നെ സമീപിച്ചതെന്ന്​ ഹരജിയിൽ പറയുന്നു. പരാതിക്കാരി ആരോപിക്കുന്ന വിധത്തിലുള്ള കുറ്റകൃത്യം തന്നിൽനിന്നുണ്ടായിട്ടില്ല. ജോലിസംബന്ധമായ ശത്രുതയെ തുടർന്ന്​ ചിലരുടെ ആസൂത്രിത ശ്രമഫലമായി ഉണ്ടായ കേസാണെന്നും ഇവർ ചോറ്റാനിക്കര പൊലീസുമായി ചേർന്ന്​ ​യുവതിയുടെ വ്യാജ മൊഴിയെടുപ്പിക്കുകയായിരുന്നുവെന്നും ഹരജിയിൽ ആരോപിച്ചു.

തന്‍റെ അന്തസ്സും സൽപേരും തകർക്കാൻ പരാതിക്കാരിയുമായി ചേർന്ന്​ ചിലർ നടത്തിയ ആസൂത്രിത ശ്രമമാണിത്​. ഇതിന്‍റെ ഭാഗമായാണ്​ തന്നെ അപകീർത്തിപ്പെടുത്തുന്ന വിധത്തിലുള്ള സ​ന്ദേശങ്ങളും ചിത്രങ്ങളും വിഡിയോയും സമൂഹ മാധ്യമങ്ങൾ വഴി പ്രചരിപ്പിക്കുന്നത്​. ഇത്തരമൊരു ആരോപണം തന്‍റെ തൊഴിൽ ജീവിത​െത്തയും കുടുംബ ജീവിതത്തെയും മോശമായി ബാധിച്ചിരിക്കുകയാണ്​. ഈ സാഹചര്യത്തിൽ അന്വേഷണവുമായി സഹകരിക്കാൻ തയാറാണെന്നും അറസ്റ്റ്​ ചെയ്താൽ ജാമ്യത്തിൽ വിടാൻ ഉത്തരവിടണമെന്നുമാണ്​ ഹരജിയിലെ ആവശ്യം.