മുഈനലി തങ്ങൾ​ക്കെതിരെ ലീഗ്​ നേതൃത്വം; 'ശത്രുക്കളുടെ കൈയ്യിലുള്ളവരുടെ പണി'

കോഴിക്കോട്​: കുഞ്ഞാലിക്കുട്ടിക്കെതിരെ ഗുരുതര ആരോപണമുന്നയിച്ച പാണക്കാട്​ ഹൈദരലി ശിഹാബ്​ തങ്ങളുടെ മകൻ മുഈനലി ശിഹാബ്​ തങ്ങളെ തള്ളി മുസ്​ലിംലീഗ്. ശത്രുക്കളുടെ ​ൈകയ്യില്‍ കളിക്കുന്ന ചില ആളുകളുടെ പണിയാണ് ഇന്ന് കണ്ടതെന്ന് ലീഗ് ജനറല്‍ സെക്രട്ടറി പി.എം.എ സലാം മാധ്യമങ്ങളോട്​ പറഞ്ഞു.

''പാര്‍ട്ടി അനുമതിയില്ലാതെയാണ് മുഈനലി വാര്‍ത്താസമ്മേളനം നടത്തിയത്​. ഹൈദരലി തങ്ങളെ അനുസരിക്കാതിരിക്കുന്നത് പാര്‍ട്ടിയെ അനുസരിക്കാതിരിക്കലാണ്. ലീഗ് അഭിപ്രായ സ്വാതന്ത്ര്യമുള്ള പാര്‍ട്ടിയാണ്. എന്നാല്‍ അഭിപ്രായ സ്വാതന്ത്ര്യം ലീഗിന്‍റെ അസ്​തിത്വത്തെ ചോദ്യം ചെയ്യുന്ന തരത്തിലേക്ക് പോകരുത്. പരസ്യ വിമര്‍ശനം പാണക്കാട് തങ്ങള്‍ തന്നെ വിലക്കിയിട്ടുണ്ട്. എന്നാല്‍ മുഈനലിയുടെ ഇന്നത്തെ പ്രതികരണം തങ്ങളുടെ നിര്‍ദേശത്തോടുള്ള വെല്ലുവിളിയാണ്. ലീഗ് ഹൗസിലെത്തി പ്രവര്‍ത്തകന്‍ തെറിവിളിച്ച സംഭവം അന്വേഷിച്ച് നടപടി സ്വീകരിക്കും'' -പി.എം.എ സലാം പറഞ്ഞു.

പാലാരിവട്ടം പാലം അഴിമതിക്കേസുമായി ബന്ധപ്പെട്ടാണ് ചന്ദ്രിക ദിന പത്രത്തിന്‍റെ മാനേജ്‌മെന്‍റിന് ഇ.ഡി നോട്ടിസ് ലഭിച്ചതെന്ന്​ സലാം പറഞ്ഞു. ഇഡിക്ക് മറുപടി നല്‍കും. ആ ആരോപണം ഇതുവരെ തെളിയിക്കപ്പെട്ടിട്ടില്ല. പാര്‍ട്ടി അക്കൗണ്ട് എല്ലാം കൃത്യമാണ്. ഇഡിയ്ക്ക് ഒരു തവണ വിശദീകരണം നല്‍കിയിട്ടുണ്ട്​. പാര്‍ട്ടി ഫണ്ട് സംബന്ധിച്ച കണക്കുകള്‍ തെരഞ്ഞെടുപ്പ് കമ്മിഷന്‍ പരിശോധിക്കുന്നതാണെന്നും സലാം കൂട്ടിച്ചേര്‍ത്തു.

കുഞ്ഞാലിക്കുട്ടിക്കെതിരെ മുഈനലി ശിഹാബ് തങ്ങളുടെ​ ഗുരുതര ആ​രോപണങ്ങൾ

ഇന്നത്തെ വാര്‍ത്താസമ്മേളനത്തില്‍ രൂക്ഷവിമര്‍ശനമാണ് കുഞ്ഞാലിക്കുട്ടിക്കെതിരെ മുഈനലി ശിഹാബ് തങ്ങൾ നടത്തിയത്. 40 വര്‍ഷമായി പാര്‍ട്ടി ഫണ്ട് കൈകാര്യം ചെയ്യുന്നത് പികെ കുഞ്ഞാലിക്കുട്ടി നേരിട്ടാണെന്നും ചന്ദ്രികയിലെ ധനകാര്യ മാനേജ്‌മെന്റ് പാളിയിട്ടുണ്ടെന്നും അദ്ദേഹം പറഞ്ഞു. മുസ്​ലിം ലീഗി​‍െൻറ അഭിഭാഷക വിഭാഗമായ കേരള ലോയേഴ്​സ്​ ഫോറം സംസ്​ഥാന പ്രസിഡൻറ്​ അഡ്വ. മുഹമ്മദ്​ ഷായോടൊപ്പം പ​ങ്കെടുത്താണ്​ മുഈനലി തങ്ങൾ പി.കെ. കുഞ്ഞാലിക്കുട്ടിക്കെതിരെ ആഞ്ഞടിച്ചത്.

പി.കെ. കുഞ്ഞാലിക്കുട്ടി പല തവണ മത്സരിച്ചപ്പോൾ ചെലവാക്കിയ ഫണ്ടിന്​ കണക്കില്ല. പാർട്ടി ഒരു വ്യക്​തിയിൽ കേന്ദ്രീകരിക്കുന്നതുകൊണ്ടാണ്​ ഇങ്ങനെ സംഭവിക്കുന്നത്​. പിതാവ്​ ഹൈദരലി തങ്ങൾ മാനസിക സമ്മർദങ്ങൾക്കടിപ്പെട്ടാണ്​ രോഗാവസ്​ഥയിലായതെന്നും മുഈനലി വികാരാധീനനായി വിശദീകരിച്ചു.

പാർട്ടി രക്ഷപ്പെടണമെങ്കിൽ കാതലായ പുനർവിചിന്തനം ആവശ്യമാണ്​. പഴയ അവസ്​ഥയിലേക്ക്​ പാർട്ടിയെ തിരികെ കൊണ്ടുപോകേണ്ടതുണ്ട്​. ഇതിന്​ ആരും മുന്നിട്ടിറങ്ങിയില്ലെങ്കിൽ പിതാവി​‍െൻറ അവസ്​ഥയാവും ഉണ്ടാവുക. പാണക്കാട്​ കുടുംബത്തി​‍െൻറ ചരിത്രത്തിൽ ഇത്തരം സാമ്പത്തിക ആരോപണത്തിനു​ മുന്നിൽ നിൽക്കേണ്ടിവന്നിട്ടില്ലെന്നും മുഈനലി പറഞ്ഞു.