ഖമറുദ്ദീനും ഷാജിക്കുമെതിരായ കേസുകൾ നേരിടാൻ ലീഗ്​

മലപ്പുറം: എം.എൽ.എമാരായ എം.സി ഖമറുദ്ദീൻ, കെ.എം ഷാജി എന്നിവർക്കെതിരായ കേസുകൾ നിയമപരമായും രാഷ്​ട്രീയമായും നേരിടാൻ മുസ്​ലിം ലീഗ്​ ഉന്നതാധികാര സമിതി യോഗം തീരുമാനിച്ചു. അറസ്​റ്റിലായ എം.സി ഖമറുദ്ദീൻ എം.എൽ.എ രാജിവെക്കേണ്ടെന്ന നിലപാട്​ നേതൃത്വം ആവർത്തിച്ചു. സ്വർണ കടത്ത്​, മയക്കു മരുന്ന്​ കടത്ത്​, ഡോളർ കയറ്റുമതി തുടങ്ങി ഗുരുതരമായ കേസുകളിൽ കുടുങ്ങി നട്ടം തിരിയുന്ന പിണറായി സർക്കാർ അതിൽ നിന്ന്​ ശ്രദ്ധ തിരിച്ചു വിടാനാണ്​ നിസാരമായ കാര്യങ്ങളിൽ കേസെടുത്ത്​ അറസ്​റ്റു പോലുള്ള നടപടികളിലേക്ക്​ തിരിയുന്നതെന്ന്​ പാർട്ടി നേതൃത്വം വിലയിരുത്തി.

പ്രതികാരം തീർക്കാനാണ് വിജിലൻസ്​ അന്വേഷണമെന്നും പ്രബുദ്ധരായ ജനം ഇത്​ തിരിച്ചറിയുമെന്നുമാണ്​ ലീഗ്​ കരുതുന്നത്​. യു.ഡി.എഫ്​ നേതാക്കൾക്കെതിരായ നടപടികൊ​ണ്ടൊന്നും ഇടതുപക്ഷം രക്ഷപ്പെടില്ലെന്നും വരാനിരിക്കുന്ന തിരഞ്ഞെടുപ്പിൽ വൻ തിരിച്ചടി ലഭിക്കുമെന്നും നേതൃത്വം വിശ്വസിക്കുന്നു. അതേസമയം, ഇ.ഡിയുടെ അന്വേഷണത്തിനെതിരെ ലീഗ്​ ആക്ഷേപമുന്നയിക്കാത്തത്​ ശ്രദ്ധേയമാണ്​. ​അങ്ങനെയൊരു നിലപാട്​ സ്വീകരിച്ചാൽ സി.പി.എം വാദം അംഗീകരിക്കുന്നതിന്​ തുല്യമാവുമെന്നതിനാലാണ്​ പരസ്യമായി ഒന്നും പറയാത്തത്​.

സംസ്​ഥാന അധ്യക്ഷൻ പാണക്കാട്​ ഹൈദരലി ശിഹാബ്​ തങ്ങളുടെ വസതിയിൽ ശനിയാഴ്​ച രാവിലെയാണ്​ യോഗം നടന്നത്​. ഇ.ഡിയുടെ ചോദ്യം ചെയ്യലിന്​ വിധേയനായ കെ.എം. ഷാജി എം.എൽ.എയെ യോഗത്തിലേക്ക്​ വിളിപ്പിച്ചിരുന്നു. കേസുമായി ബന്ധപ്പെട്ട വിശദീകരണം അദ്ദേഹം നൽകി. എം.എൽ.എമാർക്കെതിരെ കേസുകൾ ചർച്ച ചെയ്​തതായി യോഗ ശേഷം​ പി​.കെ കുഞ്ഞാലിക്കുട്ടി അറിയിച്ചു.

ജന ശ്രദ്ധ തിരിച്ചു വിടാനാണ്​ നിസാരമായ സംഭവങ്ങളുടെ പേരിൽ ലീഗ്​ എം.എൽ.എമാരെ ​പ്രതിയാക്കി അറസ്​റ്റ്​ ചെയ്​ത്​ ജയിലിലിടക്കുന്നതെന്ന്​ അദ്ദേഹം കുറ്റപ്പെടുത്തി​. കേസുകൾ കെട്ടിച്ചമക്കുകയാണ്​. അധികാരമൊഴിയാൻ പോകുന്ന സർക്കാരാണ്​ അസാധാരണമായ നടപടികളെടുക്കുന്നത്​. മുമ്പുണ്ടാവാത്ത രീതിയാണിത്​. പട്ടിക തയാറാക്കി വിജിലൻസിനെ ഉപയോഗിച്ച്​ ഒരു ഡസൻ എം.എൽ.എമാ​ർക്കെതിരെ കേസെടുക്കുമെന്നാണ്​ എ. വിജയരാഘവനെ പോലുള്ളവരുടെ ഭീഷണി. തെരഞ്ഞെടുപ്പിൽ 25 ലക്ഷം അധികം ചെലവഴിച്ചു, ബിസിനസ്​ പൊളിഞ്ഞപ്പോൾ നിക്ഷേപം തിരിച്ചു നൽകിയില്ല തുടങ്ങിയ നിസാര കേസുകളുടെ പേരിലാണിത്​. കേസുകൾക്ക്​ മുന്നിൽ പതറുന്ന പാർട്ടിയല്ല ലീഗ്​. എൽ.ഡി.എഫ്​, യു.ഡി.എഫ്​ കേസുകളിൽ ആനയും ഉറുമ്പും തമ്മിലുള്ള വ്യത്യാസമുണ്ടെന്നും കുഞ്ഞാലിക്കുട്ടി പറഞ്ഞു. ഇ.ടി മുഹമ്മദ്​ ബഷീർ, കെ.പി.എ മജീദ്​, സാദിഖലി ശിഹാബ്​ തങ്ങൾ, പി.വി വഹാബ്​, എം​.കെ മുനീർ എന്നിവർ യോഗത്തിൽ പ​ങ്കെടുത്തു.