ബാധ്യത 100 കോടിക്കപ്പുറം; കനിവ്​ 108 ആംബുലൻസ്​ ‘അത്യാഹിതത്തിൽ’

തിരുവനന്തപുരം: കരാർ കമ്പനിക്ക് നൽകാനുള്ള കുടിശിക 100 കോടി കവിഞ്ഞതോടെ സംസ്ഥാന സർക്കാറിന്​ അധിക ബാധ്യതയായി 108 ആംബുലൻസ് പദ്ധതി. സംസ്ഥാനത്ത്​ രോഗികളുടെ പരിചര ണത്തിനായി സർവീസ്​ നടത്തിയ വകയിലാണ്​ ഇത്രയും ബാധ്യത​. ഇതോടെ നൂറുകണക്കിന്​ ജീവനക്കാരും പ്രതിസന്ധിയിലാണ്​. സംസ്ഥാന ആരോഗ്യ വകുപ്പിന്‍റെയും നാഷനൽ ഹെൽത്ത്​ മിഷന്‍റെയും സാമ്പത്തിക സഹായത്തോടെ കേരള മെഡിക്കൽ സർവീസസ്​ കോർപറേഷൻ (കെ.എം.എസ്​.സി.എൽ) ആണ്​ ഇതിന്‍റെ നടത്തിപ്പ്​ ചുമതല. കേന്ദ്ര സർക്കാറിന്‍റെ ഫണ്ട്​ വിഹിതം കിട്ടാത്തതാണ്​ ബാധ്യത വരാൻ കാരണമെന്നാണ്​ മെഡിക്കൽ സർവീസസ്​ കോർപറേഷൻ അധികൃതർ പറയുന്നത്​. എന്നാൽ 40 ശതമാനം കേന്ദ്ര വിഹിതവും 60 ശതമാനം സംസ്ഥാന വിഹിതവുമാണ്​ പദ്ധതിക്കായി വിനിയോഗിക്കുന്നത്​. അതേസമയം ഈ വലിയ സാമ്പത്തിക ബാധ്യത നിലനിൽക്കെ കരാർ കാലാവധി അഞ്ചുവർഷം പൂർത്തിയായതിന്‍റെ അടിസ്ഥാനത്തിൽ പുതിയ കരാർ നടപടികളിലേക്ക്​ മെഡിക്കൽ സർവീസസ്​ കോർപറേഷൻ കടന്നിരിക്കുകയാണ്​.

2021ൽ 108 ആംബുലൻസ് പദ്ധതി അധിക സാമ്പത്തിക ചെലവ് ഉണ്ടാക്കുന്നു എന്നും സർക്കാർ ആംബുലൻസുകളും സമനാമാതൃകയിൽ ഉപയോഗിക്കണം എന്നും ധനവകുപ്പ് നിർദേ​ശം നൽകിയിരുന്നു.

2019ൽ ആരംഭിച്ച ‘കനിവ് 108’ ആംബുലൻസ് പദ്ധതിയുടെ നടത്തിപ്പ് ഹൈദരാബാദ് ആസ്ഥാനമായ സ്വകാര്യ കമ്പനിക്കാണ് ലഭിച്ചത്. കഴിഞ്ഞ മെയ് മൂന്നിന് കരാർ കാലാവധി അവസാനിച്ചിരുന്നു. തുടർന്ന് മൂന്ന്​ മാസത്തേക്ക് നീട്ടി നൽകി. അതും ആഗസ്റ്റ്​ നാലിന്​ കഴിഞ്ഞു. ഈ കമ്പനിക്കാണ്​ 100 കോടിയിലേറെ രൂപ മെഡിക്കൽ സർവീസസ് കോർപറേഷൻ നൽകാനുള്ളത്. 317 ആംബുലൻസുകളാണ് നിലവിൽ പദ്ധതിയുടെ ഭാഗമായി സംസ്ഥാനത്തുടനീളം സേവനം നടത്തുന്നത്. ഇതിൽ 316 എണ്ണം ബേസിക്​ ​ലൈഫ്​ സപ്പോർട്ട്​ ആംബുലൻസുകളും ഒരെണ്ണം അഡ്വാൻസ്​ഡ്​ ലൈഫ്​ സപ്പോർട്ട്​ ആംബുലൻസുമാണ്​. ഇതാണ്​ പ്രതിവർഷം അധിക സാമ്പത്തിക ബാധ്യത ഉണ്ടാക്കുന്നു എന്ന്​ ഇപ്പോൾ പറയുന്നത്​. എന്നാൽ ഈ സാമ്പത്തിക ബാധ്യത മറികടക്കാൻ ആരോഗ്യവകുപ്പ്, എം.എൽ.എ, എം.പി ഫണ്ടുകളിൽ നിന്ന് വാങ്ങിയ ആംബുലൻസുകളും സമാന മാതൃകയിൽ ശൃംഖലയായി പ്രവർത്തിച്ചാൽ സാമ്പത്തിക ചെലവ് ഒഴിവാക്കാം എന്ന്​ ചൂണ്ടിക്കാട്ടപ്പെടുന്നു.